Psalms 47

Bepaŋ adi meeniŋ kwetkwet hatiiŋ’walaŋ mapme

Metam hogohogok, hidi nadifo tiŋa kohopapa utneŋ! Hidi nadifo tiŋa kap wapum toŋa Bepaŋ nintiloneŋ. Indi Yahwe Loloŋnitdok munta tiŋa gikiŋgoŋ timinim. Adi Mapme Loloŋnitdi metam hogohogok kwetfoloŋ hatiiŋ u yabudokolak. Adi metam noli hogohogok yanagibefodapmaaŋ indi’walaŋ hebetnineŋ yapmeune indi yabudokoyam. Bepaŋ negoŋ inditok yoŋa kwet i kahileeŋ inditok gigit yodapmaaŋ nimguk. Bepaŋdi Jekop’walaŋ yalakiŋiye inditok welesiloŋ tinimguk, doktiŋa indi kwetnik yendok nadifo tiyaneem.

Bepaŋ kunum foloŋ loguk. Yahwedi loguk nai uŋaniŋ memetam adi nadifo tiŋa kakaliŋa bai maaŋ fedikiŋ. Indi Bepaŋ nintilooŋ kap tominim, indi mapmenik nintilooŋ kap tominim. Bepaŋdi mapme ilaŋa kwet wapum i hatak i kaulidokolak. Wendoktiŋa indi kap toŋa nintilonim. Bepaŋ adi mapme ilaŋa metambop hogohogok yabudokolak. Tiŋa undugoŋ Bepaŋ adi mapme kumopopŋiŋ foloŋ ilune tuwot tilak. Metambop hatiiŋ’walaŋ talitimeŋ heki adi metam Abalaham’walaŋ Bepaŋ keleiŋ heki dut bopneiŋ. Mikme heki’walaŋ saŋiniŋhik u Bepaŋ’walaŋ kohoŋ gineŋ hatak. Adi yadi mapme loloŋnit.

Copyright information for `NOP