Psalms 82

Bepaŋ adi Mapme Loloŋnit hinek

Kunum foloŋ bop wapum gineŋ Bepaŋ adi loloŋnit hinek tilak. Tiŋa bepaŋ yalayalaŋ heki adi bop tubune Bepaŋdi nadinadiŋiŋ yohautaaŋ yodapmalak.

Adi indiŋ yolak, “Hidi adi mede nadinadi kwanai didimeŋgoŋ mu tiŋa mede mu yotubudidimeiŋ. Hidi detiŋa me kadakahi yehiulihi tiŋa yayem tiiŋ?

“Hidi adi me fiyewakahi tiŋa wapmihi kondiŋahi u yehitubu-lodayaneeŋ. Tiŋa meeniŋ malabumuŋ gineŋ hali iutumba mu tiiŋ, aditok adi titiŋ didimeniŋ hogok tiyemaneeŋ.

“Metam iutumba mu tiŋa nemenemekdok baniŋ tiiŋ, adi yadi me kadakahi heki’walaŋ kohohik gineniŋ kotigoŋ yahaŋeyaneeŋ.

“Hidi adi nadinadihinit mokit, tiŋa hidi adi kaulehi hinek. Hidi hide mambip gineŋ hati yawiiŋ, doktiŋa metam kwetkwet adi titiŋ didimeniŋ mu takaliŋa bikabune fodapmalak.”

Unduŋ doktiŋa nu adi indiŋ yolat, “Hidi adi bepaŋ. Hidi adi Bepaŋ loloŋnit’walaŋ wapmihiŋiye.

“Iŋgoŋ hidi adi kwetfoloŋ medi kumuiŋ undugoŋ kumuneeŋ. Eŋ hatihatihik adi mapme wapmihiŋiye’walaŋ hatihatihikdi dapmalak undugoŋ dapmawaak.”

Bepaŋ, du adi bubuŋ hinek tiŋa metam hogohogok kwetfoloŋ iŋoŋ hatiiŋ u yabudokoweŋ. Metam hogohogok wanakaŋ u da’walaŋ hogok.

Copyright information for `NOP