Mark 3

IESU EMBO INGO AMBARI ETIRI EWAMEI ISIRA

Iesu Jew embomei da dada ari oro da mambudo embo da ainda gosisira uso ingo awa ambari. Edo Pharisee embomei ainda atisera awa Iesu bekuba ari dipapa edo gido Iesu diti jimba isera edo umo embo ingo ambari awa Jew embomei da tumondebain ari iji de ari ewamei eita awa gadi. Edo ungo ditini ero Iesu mi embo ingo ambari da sisira, “Naso yei po.”

Sedo Iesu mi embomei da yei sisira, “Ingodenaso agodari mi tumondebain ari iji de ro orase siri? Ingodenaso agodari mo sita embo da yei ewamei ari itadera mo awata ko embo da yei biae orase siri? Edo ingodenaso agodari mi embo kondade oro ewamei eita ko ingodenaso agodari mi ingodena embo awa kondade ae doro betarase siri?” Setiri ungo ge da nei ro sae isera.

Ge sae etero Iesu ungo gido umo tini gambari isira te iji da ainde awa Iesu embomei awa gido umo jo isira ko ungo awa embo jo okain de awasedo. Edo Iesu mi embo ainda yei sisira, “Iso ingo besugeio.” Setiri embo awa uso ingo besuguriri uso ingo awa ewamei isira. Awasedo Pharisee embomei Jew embomei da dada ari oro awa dodo gitijigari Herod da ambojimbi de dada isera. Dada edo ungoi Iesu doro betarase kiki dirisera.

EMBO JIWAE BE IESU AMBO AMBO ISERA

Iesu uso ambojimbi de Galilee umo da mambutero embo jiwae be umo ambo ambo isera. Embomei eiawa Galilee busu de Judea de Jerusalem nati de Idumea busu de edo busu umo Jordan be neinda ainde edo busu Tyre nati demonda ainde Sidon nati de awa dodo bugusera. Edo embo jiwae be eiawa Iesu ro ira ainda binga awa ingido gido ungoi Iesu gadi bugusera. Ungoi bugero Iesu setiri uso ambojimbi nga sia isira umo embo ko embo jiwae be mi Iesu umo awa misoro umo da wosadiri ta rora sedo. 10 Edo Iesu embo jiwae be etiri ewamei isera awasedo embo nenei misoro demonda yeoro Iesu da yei Iesu jigadi bugudo isera. 11 Edo embo asisi bebegae mi sirari Iesu gido embomei eiawa Iesu da jo da durido gogo dimbudo sedo isera, “Imo awa God da mei.”

12 Seoro Iesu tini gambari de asisi bebegae da yei umo embo averi awa seorase sedo isira.

IESU EMBO 12 AWODO KATABURISIRA

13 Iesu doriri da vitido unemi embo dipapa edo isira awa uso yei setiri bugusera. 14 Edo ungo uso yei bugero Iesu embo 12 awa kataburisira edo jawo Iesu da binga atopapotegari embomei awa ungoda yei ititisira. Edo Iesu ungoda jawo awa itido Iesu ungoda yei sisira, “Nanemi ingo nangae atawase katabetena. 15 Edo daedo nanemi ingo itano mambudo binga sadewa edo nanemi ingoda yei goroba ari itano asisi bebegae ondawo bugujegadera.”

16 Edoembo 12 Iesu mi kataburisira ainda jawo re Simon uso jawo nei Iesu mi ititisira Peter edo Zebedee da memei James de John de awa Iesu mi jawo nei ititisira Boanerges ainda be awa duberi dimbari embo edo Andrew de Philip de Bartholomew de Matthew de Thomas de James awa Alphaeus da mei de Thaddeus de Cana busu embo Simon de Judas Iscariot indiga sisira embo ainde.

IESU ASISI BEBEGAE ONDETIRI MAMBUSERA

20 Edo Iesu nati da mambiri embo jiwae be mi sekago mando da dada etero gido Iesu uso ambojimbi de indari sia ari sago ae isera. 21 Edo Iesu da orobe ge awa ingido sisera Iesu jiro biae etira awasedo nango Iesu bari dipapa era.

22 Edo agodari da atopapotegari mi Jerusalem nati dodo bugudo sisera, “Asisi bebegae da gitijigari Beelzebul awa Iesu da jo da atima ira amimi Iesu da yei goroba itiri asisi bebegae ondiri ijegurera.”

23 Setero gido Iesu embo jawo setiri uso yei bugusera. Bugero Iesu ungoda yei inia da mi kiki sisira, “Satan rawodo edo umo umosuka ondari ponda bugae etiri? 24 Busu da embo awa ungosuka diti diti edo embogo mina ara ae etera busu ainda embo awa atae ae etera. 25 Edo embo orobe da amimi ewoga ewoga edo embogo mina ara ae etera orobe awa atae ae etera. 26 Da awodo Satan da buro ari embomei awa ewoga ewoga ae etera awa ungo atae ae etera.

27 “Embo amemi goroba embo da mando bejedo torido uso rora bengono adi dipapa adira embo awa giti goroba embo awa ingo tei bundedo awa adira. Bundedo atae edo awa goroba embo ainda rora awa bengono ae etira.

28 “Eiawa giwo. God mi embo da wasiri bebegae berari de edo ge bebegae sedo ira awa kotembedo doadira te embo amemi Asisi Kotopu da yei biae sadira awa God mi mana embo ainda wasiri bebegae awa mana kotembedo doadira ainda be awa embo awa wasiri biae matawa atari wasiri biae awa etira awasedo.”

30 Edo embo nenei mi sisera asisi bebegae mi Iesu da yei atima ira awasedo Iesu ge eiawa sisira awa sisera.

IESU DA OROBE BUGUSERA

31 Iesu da ai de nanonamendi de bugudo ponda simba atise Iesu gadi dipapa isera edo binga itero Iesu da yei mambusira. 32 Edo embo jiwae Iesu ga da atisera amimi Iesu da yei sisera, “Gi iso ai de nanonamendi de ponda imo gadi simba atera.”

33 Setero Iesu mi mina sisira, “Naso aia de nanonamendi de mo averi?”

34 Sedo embo daga atisera awa gido ungoda yei sisira, “Giu emone naso aia de nanonamendi de ra. 35 Embo ave God mi ro orase dipapa ira awa era embo amone naso aia de ru aimono de nanonamendi de ra.”

Copyright information for `NOU