Revelation of John 10

ASISI EWAMEI MI JIWARI JOHN DA YEI ITITISIRA

Edo asisi ewamei nei goroba jiwae awa utu dodo wowosiri gosisena. Edo asisi ewamei awa bo teta poroga inge ombusira edo eriri mi uso kopiri jiroroka isira. Edo uso dombu awa teta waiko mi janibarago isira. Edo uso tei etoto awa teta riawo avewa inge isira. Edo umo jiwari kiambu pirigari uso ingo da jijigurisira. Edo umo uso tei be awa ewa tamo da itido uso tei anda awa busu da derido edo umo gogo teta lion mane mi dimbarago edo ge sisira. Edo umo gogo dimbiri binga barara 7 awodo uso ge mina gogo de sisera. Edo ungo ge mina sero na ungo ro sisera awa gaiadi isena te ge javi utu da siri ingisena. Edo na ingeno ge javi mi sisira, “Duberi 7 mi ro setera awa jiwose ta ungoda ge awa unjugari da doio atare.”

Edo ge javi awodo setiri na asisi ewamei tei nei ewa da edo tei nei busu da edo derido atiri gosisena amimi uso ingo be awa utu kena jigiri eriri sari gari ge sisira. Edo umo ge awawa God utu de edo rora berari ainda atima ira ainde edo busu de edo rora berari ainda atima ira ainde edo ewa de edo rora berari ainda atima ira awa isira embo matawa atima ira ainda jawo da ge awa sisira, “Iji bugari iji nei awa simba eose. Edo asisi ewamei ambo be ambo awa uso puin pusari God mi jo ge matu uso binga sari embobo da yei sisira awawa awodo teta awa adira.”

Edo umo awodo setiri ge javi utu da siri ingisena ge javi awa sekago naso yei sisira, “Mambuio jiwari pirigari asisi ewamei tei nei ewa da derido tei nei busu da derido edo atira amimi jigido atira awa kumbase.”

Edo ge javi awodo setiri na mambudo asisi ewamei da yei jiwari kiambu awa naso yei itarase sedo gosisena. Edo sedo geteno umo naso yei sisira, “Kumbudo indio. Edo imo indaso jiwari awa iso be da awa porere teta jou mi arago adira te iso tini da awa tokaka biae be adira.”

10 Setiri na jiwari kiambu awa uso ingo da kumbudo edo indisena. Edo indisena awa naso be da awa porere teta jou mi porere arago isira te nukegurisena awa naso tini da awa tokaka isira. 11 Edo na awodo eteno umo naso yei sisira, “Imo sekago God da binga awa busu da embo diti jiwae de edo ungoda gitijijigegari embobo de ungoda ge neinde kainde de edo tamo neinde kainde da yei God da binga awa minonu seio.”

Copyright information for `NOU