Revelation of John 4

JOHN UTU DA TUMONDEBAIN ERO GOSISIRA

Edo na rora berari awa gido atae ise edo utu da mangiro pirigedo atiri gosisena.

Edo ge javi teta puin da javi inge matu naso yei ge siri ingisena awa sekago ingisena. Edo ingeno umo sisira, “Imo einda vitio. Edo einda vitaso nanemi ro amboda adi ira awa isaga ano gase.”
Edo umo awodo setiri Asisi Kotopu mi bugudo naso joda goroba edo gitijijigurisira. Etiri edo na utu da gitijigari embo da anumba gosisena. Edo na embo anumba ainda anumbedo atiri gosisena. Edo uso dombu awa teta ri munju mi ewarago isira. Edo uso agu da awa eriri gari neinde kainde mi umo jiroroka isira. Edo gitijijigegari embobo 24 ainda anumba nenei mi gitijigari da anumba awa joda atiri jiroroka edo atisera. Edo gitijijigegari embobo 24 awawa gitijijigegari embobo 24 ainda anumba da anumbedo atisera. Edo gitijijigegari embobo awa bo parara awa ombari berari isera edo ungoda kopiri da awa gobe auri gold mi ari gitijigari embo mi asugurisira da awodo awa asugurisera. Edo gitijigari embo ainda anumba soropu da atisira ainda edo birigi biri jara iri edo binga barara diviri edo javi neinde kainde bugusira. Edo gitijigari da anumba soropu da atisira ainda dombu da awa goriwo 7 awodo benibedo ewuse atisira. Edo goriwo 7 awa God da asisi ewamei 7 awa ra. Edo gitijigari da anumba soropu da atisira ainda joda rora teta ewa binonu edo atima ira da awodo awa atisira. Edo na rora ainda jo awa isaga be gosisena.

Edo rora 4 awodo gitijigari embo da anumba soropu da atisira ainda demonda wasiri de derido atisera. Edo rovi ravi 4 ainda oka de gun da awa diti mi ato ae ari ra.
Edo rora da wasiri de ainda uso gari awa teta wo Lion da gari da awodo ra. Edo nei ainda uso gari awa teta wo cow da mei da gari da awodo ra. Edo nei da uso gari awa teta embo da dombu da gari da awodo ra. Edo nei uso gari awa teta ri wakana mi pupusari inge da awodo ra. Edo rovi ravi wasiri de 4 awa ungo dada da piki awa berari 6 awodo ra. Edo piki ainda be nei benei awa diti mi ato ae ari ra. Edo iji berari iji de tumba de ungo iji berari God jasiga ise ya sedo isera,

“God Mamo imo Kotopu. God Mamo imo awa Kotopu edo imo awa goroba jiwae. God Mamo nangoda Bada imo awa Kotopu be Kotopu. Imo atima esa, atesa edo matawa atadesa.”
Edo rovi ravi wasiri de 4 ungo ya de da God jasiga edo isera. Edo embo gitijigari embo da anumba da anumbedo atisira ainda yei jasiga ise ategedo isera. Edo embo re amimi matawa atima ira. 10 Edo ungo ya de God jasiga eoro gitijijigegari embobo 24 awawa embo gitijigari da anumba da anumbedo atima isira embo ainda joda baingo dederi edo isera. Edo ungo baingo dederi ise embo matawa atima ira embo awa tumondebain edo isera. 11 Edo ungoda gitijigari embo da gobe ungoda kopiri da awa kumbudo gitijigari embo da jo da ititise sedo isera,

“Nangoda Bada God inemi rora berari isesa. Edo inemi dipapa eoso ungo wasiri de bugudo isera. Awasedo embo berari mi imo jasiga ise imo sapo ise edo imo goroba nembodiba de atari sore.”
Copyright information for `NOU