Romans 9

EMBOMEI GOD MI KATABURISIRA

Na ro adi sena awa gebe ra. Na ge busae ra ainda be awa na awa Keriso da topo ra. Edo ge javi mi naso joda ge sira edo Asisi Kotopu mi daedo naso yei siri na ge sena awa gebe ra. Edo na naso embo topo Iesu Keriso awa ujo ae isira awasedo dubo vevera nembodiba budo ena. Edo na naso orobe da jawo da ge sedo ena Jew embobo. Edo na naso joda ungo embo memesi budo ena awa atae mana adira. Edo naso embomei awa Iesu gebe orase sedo na nasuka dubo ewamei de da God da isibari awa budo edo Keriso seugedo dodo atima ena. Edo embomei Abraham da apipie jawo Israel da orobe awa God mi kataburisira. Edo God mi etiri ungo uso kinapeina isera. Edo unemi ungoda tumondebain ari oro bo mi ari ainda joda torido uso usasa mi ungoda yei da isaga isira. Edo unemi uso agodari awa ungoda yei da ititisira. Edo unemi soregari embo awa itiri bugarase sedo ungoda yei adi sari mono gousira. Edo unemi ungoda yei tumondebain ari gebe da emboro awa ititisira. Edo ungo awa embo umbogo nembodiba Abraham de Isaac de edo Jacob de tuturo da embo orobe dada da jawo ititisera ainda orobe ra. Edo Iesu Keriso embo da tamo awa budo ombudo ungoda embo nei isira. Rora berari eiawa Iesu Keriso mi ungo awa embo isira awarate ungo uso mei Iesu Keriso awa ujo ae isera awarate ingode iji matawa Iesu Keriso rora berari awa gitijigido ira awa jasiga ore, awara.

Israel embobo jiwae be Keriso bero isera te edo emimi ae God umo ro adi sisira awawa aera. Edo Israel da orobe jiwae atera te nenei awawa uso kinapeina aera.

Edo daedo Abraham da orobe jiwae awawa uso kinapeina moka be aera. Awarate God mi Abraham da yei da sisira awodo awa, “Isaac da yei da awodo awa iso orobe awawa bugadera.” Edo eiawa ge ainda be ra, embo ave God mi Abraham da yei adi sari sisira awa gebe adera embobo awa God da kinapeina na awarate embo ave gebe ae adera awa uso kinapeina aera. Abraham da orobe nenei awawa God da kinapeina na te Abraham da orobe nenei awa God da kinapeina aera. Edo God mi Abraham da yei adi sari sisira re eire, “Gaeko da atae ari na engenembedo bugudo imonde Sarah de da yei mei itadena.” Setiri Abraham gosisira uso orobe be awa uso mei nei Ishmael awodo bugadi ae.

10 Edo amboda mei Isaac emimi bajido aro jimbusira edo Rebecca uso aro awa mei dindiga badi iri iji ainde God mi Rebecca da yei sisira mei bugo Esau mi uso namendi nei Jacob awa sapo adira sisira. Edo jiwari mi ainda jawo da ge sedo sisira,

“Na Jacob ewamei adi kotetena te na Esau ewamei adi kotaera.”
Edo Rebecca memei dindiga eiawa bae etiri edo ungo wasiri ewamei de wasiri biae de ae etero giti da God mi awawa sisira. Awasedo amimi isaga ira God umo tuturo da uso embo katabadi kotisira awa isira. God mi Esau ta mo ko Jacob ro isera awodo kataburisiri? Awodo aera.

14 Awasedo ingode ro seri? God mi katabari inono da ae isita? 15 Awodo aera ainda be awa God mi Moses da yei sisira, “Embo amenda yei na jo adena embomei ainda yei jo adena edo embo amenda yei na dubo badena awa dubo badena.” 16 Edo ingodena ro dipapa edo era edo, edo era awa God da uso ewamei da susu awa aera te God ingodena jo edo ira awa umo ingodena katabedo ira ainda susu ra. 17 Awasedo God mi ro Pharaoh da yei sisira awa gaisera,

“Naso goroba awa iso yei awodo isaga adi edo daedo busu berari da embo berari mi naso jawo awa gorase sedo gido na eteno imo gitijigari nembodiba isesa edo na eteno imo durido woseteso iso jigari erari iji atae isira.”
18 Awasedo embo amenda yei God umo jo adi dipapa adira embomei ainda yei umo jo adira te embo nenei da yei awa uso dipapa awodo ari ungo teta Pharaoh inge embo ge ewagaewa ingari ujo ae edo era da awodo ra.

GOD KASEDO IRA TE UMO DAEDO JO EDO IRA

19 Awarate embo da ingoda teda mi naso yei nganega adewa, “Eiawa gebe ta God rawodo edo embo umo ro edo ira awa embo bekuba eiri? Edo God embo da amemi rora ro arase dipapa adira embo awa mana God mi umo ro arase dipapa ira awa beuso adira.” 20 Edo ingo naso yei awodo sadewa awa na emboro eiedo sadena, naso otao imo God da yei ge mina imo embo rawodiri awa sadesita rora? Edo ou gono mi mana umo isira embo ainda yei sadira, “Roedo imo na eiedo isesi?” 21 Edo embo ou isira embo awa busu awa budo umo ro adi dipapa ira awa adira. Embo awa busu ou isira da awa budo ou da embo awasedo edo nei awa wo mane awasedo adira awa awara.

22 Edo da awodo God umo ro dipapa edo ira awa edo ira. Edo God umo uso tini gambari de goroba de awawa isaga adi dipapa edo embo nenei da yei awodo adira amone awara awarate umo amenda yei tini gambari ira amone burigi burigi mana usibesi adira edo umo usasa isaga adi dipapa adira embo amenda yei edo jo adira. 24 Awawa ingodena awa unemi jawo sisira embobo awasedo. Edo ingodena nenei awa Jew embobo da teda edo ingodena nenei awa embo Jew ae ainda teda jawo sisira. 25 Edo eiawa ro Hosea God da binga sari embo mi God mi sisira awa matu gaisira,

“Embo naso topo ae awawa nanemi naso embobo jawo sadena. Embo ungo dubo bae edo isena awa nanemi ungoda jawo, ‘Na ungo dubo budo ena embobo ra,’ sadena.
26 Edo yei embo mi ungoda yei sisera ingo awa God da embobo aera sisera ainda ungo mi ungo awa God wasiri natopo de atira ainda memei sadera.”
27 Edo Israel embobo da jawo da Isaiah mi sedo sisira,

“Israel embobo da ajigari awa teta awa kora bengi da da awodo awa embo jiwae soregadi ae rate embo enumba ae awa God mi soregadira.
28 Ainda be awa Bada God mi burigi be goroba de busu da embobo awa kasadira.”
29 Edo iji nei Isaiah mi ge nei sisira,

“God rora berari asisi de utu da atima era awa jigido ira amimi ingodena jo etiri ingodenaso orobe nenei atera. Awarate God ingodena jo ae aetira awa Sodom nati de Gomorrah nati de da rawodo isira awodo awa ingodenaso yei aetira.”

JEW EMBOBO GOROBA BE EDO EWAMEI ADI JARISERA

30 Awasedo ingode ro seri? Ingode eiawa sadera, embobo Jew ae awa God ga da umo jigari ewamei adi sedo ungo God iaviri arase buro aera te ungo God tumonda edo era awasedo God mi etiri ungo God ungae da umo jigari ewamei etera. 31 Awarate Israel embobo embo God unemi kataburisira awa ungo God ga da umo jigari ewamei adi sedo gido emboro eura edo era awarate ungo emboro awa mana tambadera. 32 Edo roedo ungo God ga da umo jigari ewamei ae edo eri? Ungo ari sago ae ainda be awa tumonda ari awa ungo ro edo era ainda susu ae awasedo awarate agodari awa kera adi jarera awa ungo ro era ainda susu ra awasedo. Edo awodo ise ungo emboro da ganuma da dedo dudurera. 33 Edo ungoda durari awa jiwari mi emboro eiedo sira,

“Giwo, ganuma nanemi Jerusalem nati doriri da ititena ganuma amimi ari embo dedo duradera. Awarate embo ave umo gebe adera awa mana jo ambadera.”
Copyright information for `NOU