a2.32Ti 1.8
b2.52Ti 4.8
c2.61Ko 9.7
e2.9Epe 3.1,13; Pil 1.12-14
f2.112Ko 4.11
i2.141Ti 6.4; Tai 3.9
j2.151Ti 4.6
k2.161Ti 4.7
l2.171Ti 1.20
m2.19Aha 16.5; Ais 52.11; Jon 10.14; 1Ko 8.3
n2.221Ti 6.11
o2.231Ti 4.7

2 Timothy 2

O Mahar 2

Kalekinale keip tar nitagorong man tang Iesu Kristo

Timoti ger tuguo, ingga o uatampopokoho tun tar nimalauelhir menia tar niueldolom geke heirin Iesu Kristo. Kale tar ualatut geko longoro turugia totoguo ku menmene to tun pe tar matasir bureher tamat, karo heir tasir tamata gesir uauaman mara turung ualasira uain tasir gisiameh.

a Huata pono tar niduhene tamiueim misiana tar tamatang uiluiliatung ger uia tun ger nang Iesu Kristo. A tamata gere kalekinale nomana tun te pare, a tamatang uiluiliatung, kare uauaha tena tamatang ualualatouk, inggon ahik pahe uauelhoubour teilin tasir tamata ueltebeir puk. b Ter siokono kompe tar tamatang ualo gera ueluelpeikie tar ualualo, ahik pahe matot e kale mena inete ke to pe i mud toso uanoton, e banoto tun gete uakeluk tar ualatut. c Tanener iom, pake ter uakikilanganar tamata tar kale tar niening uamun. Namana tar inetenine ku menegio, ge a tamata Nomana pe e turung uanaman manate totomua tar mamang inetelik.

d Namana huara dedempe tang Iesu Kristo geke tua tapokis tur toro mata geke kotpokoso tur toro matina tang Debit ger toia tero hire teil pe ro Uelhire Uaia rone ru hirhire tauete teilio. e Doh tero Uelhire Uaia roono rone ku hirhire tauete teilio, temaeit ku huato tar uleikir niduh, kara uih taneio misiana tar tamatener mamantou. Bo no uelhire puk God ahik pah ka uih tanein. 10 Temaeit inggo u siokor huata tar niduh tar mamang inetelik tas maisir tamata geke kedangais God, maeit re turung uaudeil pono Iesu Kirsto tasisin, kara kale tar uinatoro gere moko dedengua.

11  f Rone tero uelhire tun gero man.

Geti mata keipeig tatanon,
inggeig i tua keip tatanon.
12  g Geti huateig tar niduh,
inggeig i turung siokor uoum keip tokaha mes Iesu Kristo.
Geti uoliheig tatanon,
inggon e turung uolih pono tagigeig.
13  h Geta hikieig pahi tagorong man,
inggon e uangoul keip dedempe tar nitagorong man,
teeit inggon ahik pahe banot e boho katongoin.

Ter tamata ke bang parokoin God tena kalekinale

14  i Timoti uanamana dedempe tar inetenine tosnongo tamat, uatagin tasisina tang God mara hikisina pah ra uelperere tar men. Ginin ahik pahe guata uaia tasisin, bo e uasuasa kompe teres nitagorong manasit ra longoro taninin. 15  j Tur uatampopokoho tar heir katongoia tang God pare, ter tang sioko ka bang parokoia ter tamatang kalekinale tun, ahik pah ko matal, ko ualasira uakodkodoho tun pe toro uelhire gero man. 16  k Tur uagele liu dede tar mene gere uasuasa tar hangana God, ge ginina pe e uoum keip uasantiehengua kompe tasir tamat mara uairehe tang God. 17  l A menenin e haiala ueltebeir misiana tar pang kubar gere uabueir tar singsinginar tamat. A tang torikir tamata ke kale uoumis tar puhonene, Himeneus me Piletus, 18 Rasina kura lih sioko manasa tar lel gere hire toro man. Rasina kura kula pare, a nitua tapokis ke la manasain na binak, doh rasina kura mamantouongua teres nitagorong manar gisiameher tamat.

19  m Bo God ke uahohoto tun tar tengkana roon, ahik paho matotong uagun. Doh roono ka boloin tar puhunine, “A tamata Noman e ate tas maisir nan, doh mais uakapa tun ra hire tauete tar hanganar Tamata Noman ra hiliu tar niguataniner sa.”

20 I uma tar uma uleik, a dis uakapa tun a kahakah, ahik pah ka tuha keip pukig tar goul ue a silva, bo a giniameh a douk doha giniameh a nouh. Doh taninin a giniameh a nituha uamatoto tun tar haua ra guata keipin, doha giniameh e laig tar inete ueltebeir. 21 Ge me tamata re uadelauana liu katongo turin tar niguata uasanine, inggono te misianar dis ger nituha uamatoto tun tena kalekinale, teeit inggono ka uadedeil manasain, e matoto tunin, e uanguangoul puk manasa tar Tamata Noman tar kalekinale keip tar mamang niguata uaialikininer uia tun.

22  n Bo ingga, o ualo liu tar niguataniner sa gera guatguataigir kalan, uakeluk kompe tar niguataniner kodkodoh, a nitagorong man, uelmalauelhir, karo hiarou menia tas mais gera kila keip tar Tamata Noman tar kolous a delauan.

23  o Tur uagele dede tar meneniner nasir tuktukar, kara uelperere ger tabo tengkan, ge ingga pe o ate ginin e uakotpokoso kompe tar nimalian. 24 Na tamatang kalekinaler Tamata Noman ahik paha uoto perer, e uaha tasir tamata uakapa tun, kara tang ualasira uaia tun, kara uanguangoul sikor. 25 Doh mais ra ueluelde tar ualasira gere ualasiragion, inggono pake matakaluana tasisin, kare ualualatut hamas tun tasisina tar nitagorong manene ri tagorong mana teilisieig mare heir binaka sikoro baka poluk God tasisina ra uapalih pe tenas niguat mara lame, kara ate toro man. 26 Doh mare turung kodkodoho tapokis poluk res ninaman, kara lukup liu tur tono lolo Satan geke reih tasisina, kare guata tasisina ra uakeluk tena nimalaron.

Copyright information for `NSN