a7.1Jer 49.36; Dan 7.2
b7.3Isk 9.4,6; UGO 9.4
c7.4UGO 14.1,3
d7.10UGO 5.6-7
e7.12UGO 5.12
f7.14Dan 12.1; Mat 24.21
g7.16Ais 49.10
h7.17Ker 23.2; Ais 25.8; UGO 21.4

Revelation of John 7

O Mahar 7

144 taoseinir tamata ka uaanasais

a I muduhia tanininanine, song ku bango tar tang toueitir anggelou ra tur toro toueit ro gon tar pang uanene i kot, gisina ra turtur tane tar toueitir rom gane i kot gete ume i rana tar uanene i kot ue i rana tar laur ue i rana tang hingiampe ro douk.

Song ku banga polukuo tar tang giameher anggelou e la turuha tar butur re hara turuhar pisar. Inggon e kale teil tar inete gere uaanasa tasir tamat gesir nanar God ger tua. Inggono ke kula ualeikintiehe tun tasir tang toueitir anggelou geka heiris tar nitampopokoho tar uauelmahing gane i kot, doh gane i laur.

b “Ahik pah mung uauelmahing tar uanene i kot ue i laur ue tar douk e matoto geting uaanasa bakeim tar pores no tamatang kalekinale nami God.”

c Song ku longoro tunuo a tang touiha tun ka bubunis. O tamatang toro mamang matinalik gera la tur i Israel a 144 taosein.

Toro matina tang Juda, a 12 taosein ka uaanasais.

  • Toro matina tang Ruben, a 12 taosein.
  • Toro matina tang Gad, a 12 taosein.
  • Toro matina tang Aser, a 12 taosein.
  • Toro matina tang Naptali, a 12 taosein.
  • Toro matina tang Manase, a 12 taosein.
  • Toro matina tang Simion, a 12 taosein.
  • Toro matina tang Libai, a 12 taosein.
  • Toro matina tang Isakar, a 12 taosein.
  • Toro matina tang Sebulun, a 12 taosein. Toro matina tang Josep, a 12 taosein. Toro matina tang Benjamin, a 12 taosein.

    O burehentieh tunur tamata ra hiku teil tar hikhiku gaugauil e baraha uatuk i kot

    I muduhia tanininanine, inggo ku banga poluk gane i uoum totoug, o burehentiehe tunur tamat ahik me tamata re matotong ah, ra la tur toro mamang pang uanilik, kare toro mamang matinalik, karo mamang tamatalik, kare tar mamang uelhirelik. Gisina uakapa tun ra tur i uoum tono tabtabilar toia, dohi uoum tar Tunar Sipsip. Gisina ra hiku teil uakapa tun tar hikhiku gaugauil a baraha uatuk i kot, kara kale teil tar rang kuen. 10  d Doh gisina ra kulkula ualeikintiehe tun pare, “A niuaudeil e la tur tang God ger nagigeig gere tabila tono tabtabilang toia, doh tar Tunar Sipsip”.

    11 Doho anggelou uakapa tun gera tur uiloho toro tabtabilar toia, kare tasir mamahoholik, kare tar toueitir inete gesir tua. Gisina ka siokor baka uahiuais, kara kokolo uahiu, kara uatakai tang God, 12  e kara kula pare,

    “O mana tun! A niuatakai, kara nitampopokoh, kara ninamana ger i ranantiehe tun,
    kara niueltad, kara niuelpipih,
    kara nitampopokoho uakapa tun e la tur tang God ger nagigeig gere uangoul dede tar mamang binakalik, o mana tun!”

    13 Song ke dangatar tang siokor mamahoholik totoguo pare, “Maisir tasisinasine nas hikhiku gaugauil ger barah pare? Ia ra la turusin?”

    14  f Doh inggo ku hire tapokis pare, “Tamata Uleik, ingga o ate.”

    Kare hireono pare, “Gisinasine te geka la tur tar niduh uleikintiehe tun, kara kale tar uelmahing ger uleikintiehe tun. Gisina ka uabusa uadelauana tenas hikhiku, kara uagaugauil keip taninina tar deuatinginar Tunar Sipsip.
    15 Temaeit gisina ra siokor tur i uoum tono tabtabila God ger toia, kara kalekinale tatanono tar marein, doh tar boung tena umang lotuono ger dedeil. Doh inggonene re tabila toro tabtabilar toia e turung uangoul tagu tasisin, kare kaueke tasisin, kare biana uauleik uain tena uma mare matoto tasisina uakap. 16  g Gisin ahik pah ra matotong gogo uapoul poluk, doh ahik pah ra matotong kamadaka uapoul poluk. A pisar ahik pahe matotong uauelmahing baka poluk tasisin. Ahik baka poluk me butur re kaukauele tar tukunusisin. 17  h Ge a Tunar Sipsip pe gere tur i uoum tono tabilar toia, inggono tenas tang kauekesin. Inggon e turung uoum keip tasisina tar uatauete tar kodomo ger tua. Doh God e turung uamamahoul, kare tunaha liu tar kirkirininar matasisin.”

    Copyright information for `NSN