Genesis 25

Hu tumbu Aparaham hayah kamai ara iye i

Aparaham ara iyesou paiwe pe iwiri pihin hamou ngalan Keturah. Keturah ikuni norun hu, ngalahu ara iye kene: Simran, Yoksan, Metan, Mitiyan, Yispak pe Suwah. Yoksan ara tama Sepa pe Tetan. Pe Tetan ara ndrayehu Assur, hu Letus pe yihu Leyum. Mitiyan ara norun hu iye kene: Epah, Eper, Hanok, Apita pe Elitaah. Ariyo ara ndraye Keturah hu masih.

Aparaham ara iyki meltan masih iya kili norun Yisak. Hapeko Aparaham ara kinmat mapu, pe iyki yukyuk hayah iya kili norun hu kamai para nondriya pihi mulan. Pwen pe ipwandrisa hu huyau huya pwen te Kup huya mawen kili Yisak.

Aparaham imat pe huroni yiy

Aparaham iyen pe hayou tan masih iya harong ara sangat andrtingui pe yimah (175). Pe Aparaham ara iya parangoloh masih, pe hayou tan ara hiyan pe soyon iya. Pwen pe imat iho ndruwa tumbun hu. Norun malmou Yisak pe Yismayel ara hilya hiltoni yiy iro ngat sou para Makpelah pakeh Mamre, nepo pwan ta Eporon koluw, yiy noru Sohar ndramira Hit. 10 Pwen pwan hambut tahu Hit nepo Aparaham isowaniy, ara Yisak iyasura Yismayel ara hiltoni Aparaham iya ngat sou mepo Aparaham ironi Sarah iro aliy mamu. 11 Hiltoni Aparaham ihipwen, pwen Ngindrai itoholi Yisak. Yisak ara impwan ngilse ndran ndrikou iro kol Nekep, ngalan Peer-Lahai-Roi.

Ndraye Yismayel hu

12 Iye ara titiye ta Yismayel hu, noru Aparaham nondriya Hakar, pihi Yisip para mbulya Sarah.

13 Iye ara ngala noru Yismayel hu kamai: yiy ndrihou ara ngalan Nepayot, mundruwa Nepayot ara Ketar, Atpeel, Mipsam, 14 Misma, Tuma, Masa, 15 Hatat, Tema, Yetur, Napis pe Ketemah. 16 Ariyo ara ngala ndraye noru Yismayel hu kamai songui pe lumou. Pe ngalahu ara kinrayah ngalahu kol mendre-mendreheh mepo humimpwan aliy. 17 Yismayel iyen pe hayou tan iho sangat tingui pe andrtoyoh (137) pwen pe imat pe iho ndruwa tumbun hu. 18 Pe ndraye Yismayel hu huya pe huye kol namandran ndrokolo Hawilah pe Sur. Pe Sur ara ita pakeh Yisip ngilse sai iya pwen te Assiriya. Hapeko yihu ara hu konohompwan hiyan pwi.

Repekah imwalahiy ta Esau pe Yakop

19 Iye ara titiye ta noru Aparaham, Yisak.

Aparaham ara tama Yisak.
20 Pwen Yisak ara hayou tan iro mahaangui pe iwiri Repekah, mepo noru Petuwel pihin. Pe Petuwel ara ndramira Aram mepo para kol Mesopotemiya,
25:20 Eng:Paddan Aram; TP:Mesopotemia
pe Repekah ara pisu Lapan.

21 Repekah ara kinlahiy para kikun mbunah pwi, pwen Yisak itohun iya kili Yapan iyata Repekah, pe Yapan ihilingi totohun tan, pe Repekah ara mapwindriyan. 22 Yiy ara norun mwan,
25:22 Eng:twins; TP:tupela pikinini man
pe mapu kinmwalahiy ta hilu, hilu sopaiwe iro nondriya tina hilu, pe yiy ipa, “Weh, aripo tapeh? Sehe melit iriporayah isa kili yo? Pwen yiy iya sike Yapan para kiyki lohongai paraliy.”

23 Pe Yapan ipwai iyatan ipa,

“Hilu ndramat malpat hiltora ndriyam.
Pe hilmalpat ara andre hilu konto wule pwi.
Andre hu hapat kaya pwokeyahu katahu hapat.
Pe yiy mepo nakisarayah mu andre kiya pwandrendres ta yiy para mulan.”
24 Pwen pe iro mwonen lang nakimwalahiy kiyata norun kamai malmou mwan,
25:24 Eng:twins; (tehe 25:22)
25 pe imwalahiy tan imu ara sangin laman pe yomun soyon iramburuhi yiy, tehe hasai koyau, pwen pe huyoh ngalan Esau.
25:25 “Esau” iya nongna kol tahu Hipuru ara ndringen pakimbus tehe nongan handra ipa “yomun soyon”; Eng: “hairy”; TP: “planti gras”
26 Pwen Repekah imwalahiy iyata nalin hamou paiwe, pe yiy imbultuwe tisingi mbutika Esau. Pwen pe huyoh ngalan Yakop.
25:26 “Yakop” iya nongna kol tahu Hipuru ara ipa “imbultuwe mbutikan”; Eng: “he grasps the heel”; TP: “lek”
Yisak hayou tan iro mannongui (60) pwen norun mwan malmou hilsarayah.

Esau itali nokun tehe yiy ndrohan

27 Hilu mbunah malmou kanna wihou pwen, pe Esau irayah ndramat hamou para kahaya yohou iya kene yangiy masih. Yakop ara mbunah hamou waison pe ngara kiye wum o. 28 Yisak ara ngara kinamili Esau, paratesah yiy ndramat para kahaya yohou para namnam; hapeko Repekah ara ngara kinamili Yakop.

29 Lang sih aro Yakop ara iro tuwe suw hayah, pe Esau iro yangiy pe isarayah isa wum mamundruwan. 30 Pe Esau ipwai iyata Yakop ipa, “Kileh, kunmundrui turuwe yo. Aiki hayah suw laman mahapo antuwaniy ita kisa.” Ndroiyin ara ko pe huyoh ngala Esau handra “Etom.”
25:30 “Etom” Iya nongna kol tahu Hipuru, ara ndringen pakimbus tehe nongan sahin “laman”; Eng: “red”; TP: “retpela”


31 Pe Yakop ipwai iya kili yiy ipa, “Aiki ndrohonokum tehe ndrohan ara kisa kili yo pe andre kuiki suw kisa kili wou.”

32 Pe Esau ipwai ipa, “Animei! Yo ara pakeh nakumat. Kapa kumat, tesah hiyan ndrokonan ita ndrohonoku tehe ndrohan?”

33 Pwen Yakop ipa, “Apwatisingiy ndrokonan, pwen aiki ndrohonokum tehe ndrohan ara kisa kili yo.” Pwen Esau ipwatisingiy ndrokonan, pe iyki ndrohonokun tehe ndrohan ara iya kili Yakop.

34 Pwen Yakop iyki ndrina nohun hayah iyasura suw nepo imbusiy iyau mbuwa malkei handra para kaniyai,
25:34 Eng:lentil (a kind of bean); TP:wanpela kain bin
pe iykiy iya kili Esau. Pe Esau iyan pe iyin ndran, pwen itine pe iyau. Tehen torako, Esau inime ndrohonokun tehe ndrohan ara kinna mwaihei o.

Copyright information for `NSS