Genesis 34

Sekem irakultuw mwomwan iya kili Tainah

Pwen lang sih aro noru Yakop hilu Leyah pihin, ngalan Tainah ara, iya saisai iyapolo hu pihi Kanaan. Hamor ara pohon tahu Hipi, pe norun hamou ngalan Sekem ara inime Tainah pe iya luwi yiy pe imbusi kultuw mwomwan iyatan. Pe Sekem inime Tainah ara pihi lahayan iya pe inamili yiy. Pe iro hinonou para kiwiri lohonga Tainah para kimbuluhi yiy. Pwen ipwai iya kili taman ipa, “Yo unamiliy para awiri pihin iye kiya nambuyu.”

Pe Yakop ihilingiy tehe Sekem imbusi kultuw mwomwan iyata norun pihin, hapeko norun hu kamai masih ara huro ndron ndrohonoku mbulen, iyasura hu kan para hanghang tahu. Pwen Yakop ara kinpo hapesah pwi ipo norun hu masih husarayah.

Pwen Hamor tama Sekem iya pe iwong iyasura Yakop. Hilu ro wong ndron, pe noru Yakop hu kamai husarayah. Hu ara kanhilong pwen tehe Sekem imbusi kultuw mwomwan iyata pisuhu. Pwen pe husa nun o huro, pe ndrinahu ara ilokuh pe hundrangis. Paratesah, kultuw ara iya lohonga hu Yisrayel ara nonombun masih.

Hamor ipwai iyatahu toro, “Noru ara inamili norum pihin, pwen usok lohonga wawu; hiyan para hilu kayesou ndre pwi? Worou tukapa hiyan kiya handra lohongai, pe noru tou hu pihin ara hu kayesou kaya kasa. 10 Pwen andre wawu korosura yowu pe akambusi sehe melit kiro pwan iye ara kiya lohonga wawu ko. Pe akamangse ndroho peheya wawu, pe andre kiya mbukenan wawu.”

11 Pwen Sekem ipwai iya kili tama Tainah pe wayin hu ipa, “Kapa wawu kasomwi soksok to iye, pwen andre kuiki sehe melit nepo wawu namiliy. 12 Kapa wawu kaya hiyan sato para kuwiri Tainah; pwen akapwai kisa to sehe melit wawu namiliy. Wawu kapohowe kenne Tainah kiya masahayeh kiya lohonga wawu, hapeko andre kuiki sehe melit wawu kasoksok kiyaliy. Hapeko akaiki pihin ara ko kisato tehe nambuyu.”

13 Sekem ara kinmbusi kultuw mwomwan kinnata pisuhu pwen, pe yihu noru Yakop kamai ara hupwandritiye nongan para hu kapwasike Sekem pe taman Hamor. 14 Pwen hupwai iyatan hupa, “Kinlahiy para yowu kaiki pisu yowu kiyesou kiya kili hu ndramat nepo sosondrih kinna tahu pwi, ara pwi yoh. Andre kiyki masirai kisa mwalinga yowu. 15 Yowu andre kapa hiyan kiya soksok tam, kapa wawu kasomwi yowu kiya lohongai handra iye: hu kamai tawawu masih andre kasosondrih katahu pe hu kasarayah tehe yowu. 16 Tehen tora ko andre yowu kapa hiyan para noru tou hu pihin andre kayesou kaya kasa. Pe yowu andre kampwan sura wawu pe tukasarayah hapat o. 17 Hapeko kapa wawu kansomwi lohongai para sosondrih iye pwi, pwen andre yowu kawiri pisu yowu pe yowu kayau.”

18 Pe Hamor iyapolo norun Sekem ara hilpa hiyan iya lohongai ara.

19 Pwen Sekem ara kinlonge ndragan niwen pwi, paratesah inamili noru Yakop pihin ara namandran iya. Yiy ara ndramat hamou ngara hu kasikiye yiy nondriya wum tan. 20 Hamor pe norun Sekem hiluya ndrohonoku mbultere pakeh kili pohomara karam para kol namandran ara, pe hilu wong iya kili hu kamai masih para kolohu. 21 Pe hilu pa, “Yihu ndramat ara yihu hiyan iya; hiyan para hu keyempwan sura tou pe hu kambus melit kiya lohongahu ko. Pwenerou ara namandran pe ilahi hu yi. Andre tukayesou kaya kasa. 22 Hapeko hu ndramat ara hupwes iya lohongai sahin o para hu korosura tou. Tehen tora ko andre tuka sosondrih kiyata hu kamai torou masih tehe yihu kansosondrih kinna tahu pwen. 23 Pwen andre hu sipsip pe mbulmwakau tahu masih andre kisa torou. Kapa tukasomwi nongna hu, pwen andre hu koro sura tou.”

24 Yihu ndramat masih para kol namandran ara, hupa hiyan iya sehe nongan Hamor pe norun Sekem hilu wong iyaliy. Pwen yihu masih huro nondriya kol namandran ara, ara husosondrih iyatahu topwei.

25 Iro mwonen nondriya lang maroyoh, pe hu ndramat neken tahu ara iro lek ndron, pwen wayi Tainah malmou kamai, Simeyon pe Lepi, hilu wiri semen pe hilya nondriya kol namandran ara. Pe mwoiwahu masih ara ihin pe hamou ndramat kinlahiy para kinmbultuwe hilu pwi. Pwen hilu tingundru hu kamai masih para kol namandran ara, 26 iyasura Hamor pe norun Sekem. Pwen hilu wiri Tainah iro wum ta Sekem pe huyau. 27 Pwen iyamulan para hu kamai masih kanmat topwei, noru Yakop hu kamai masih, huya nondriya kol ara para kaya pahana melit iya konoha kultuw mwomwan humbusi iyata pisuhu. 28 Hu wiri hu meme, sipsip, mbulmwakau, pe tongki iyasura melit masih iro nondriya kol namandran ara, iyapolo hu melit masih iro ngawan i. 29 Huya pe hulokuhuyani topwei melit masih mepo kennehu namandran pe lahayan, iyapolo hu pihin pe hu mbunah pe melit masih iro nondriya seu.

30 Yakop ipwai iyata Simeyon hilu Lepi ipa, “Walu kaniyki nopwaran kinsa kili yo ara. Nahapo yihu para Kanaan, pe hu Peris iyasura hu masih hutopo kol iye ara andre hu kasisingat ano. Yo ara ndramiro soyon pwi, pe kapa hu masih kaya wule pe hu kasa popahun kasa kili yo, andre hu katingundru yowu masih.”

31 Hapeko hilu pwai hilpa, “Tehen tapeh; hiyan para hu koro raminmini pisu yowu tehe hamou pihin para sai, ndre?”

Copyright information for `NSS