Genesis 39

Yosep iro seu ta Potipar

Pe yihu kowase Yismayel huwiri Yosep pe huyaiki yiy iya Yisip. Pwen Potipar isowani yiy iro kili hu para pwandrendres tan. Potipar ara makundrayen hamou ngara kiyamu tahu makundrayen masih mepo ngara hu koro nimnim kiya seu ta kenon.

Hapeko Yapan ara irosura Yosep, pe melit masih Yosep iro mbusiy iya suwe Potipar ara irayah hiyan o. Pe Potipar ara inimei tehe Yapan irosura Yosep, pe melit masih iro mbusiy ara ngara kisarayah hiyan o. Pwen pe Potipar ara, welen iso iyata Yosep. Pwen pe yiy iyki Yosep iro mu iya pohombulen, para maran kiro suwen pe kiro kili meltan masih. Iro tandrohonga Yosep irayah pohon para wum ta Potipar pe iro nimnim iya meltan masih, pwen Yapan itoholi Potipar, paratesah, Yosep irosura hu. Pe Yapan itoholi melit masih para seu, piyang, pe menmena Potipar masih. Pwen tehen tora ko Potipar iyki melit tan masikene iro pahandra pwokere ta Yosep para maran kiro aliy. Pe Potipar ara kinho lohongani melit masih iro nondriya seu pwi, paratesah, melit masih ita nima Yosep, pe Potipar ara ngara kilohongani anandrinan o.

Yosep ara solopwereyin iya pe mbulmaran ara lahayan iya.
Pe iyamulan hape nambuyu Potipar maran ilimiri Yosep pe inamili yiy, pwen ipwai iyatan ipa, “Asa matin kasura yo.”

Hapeko Yosep ipa pwi iya nongna nambuyu Potipar, pe ipa, “Animei; namandran ato ara iyki melit masih para seu iye, ara iripo pahandra pwokere to ko. Pe yiy ara ngara kinho lohongani meltan masih ara pwi. Yo ko ara mangolo tehe yiy o, urupo seu iye. Pe yiy ipa hiyan sato para moro kiro kene melit masih iripo seu, hapeko wou opu, kinpa hiyan sato para kumatin kisa suram pwi. Tehen tapeh ndrokonan pe andre kumbusi kultuw ara? Ara kinna mwonen kinna mbulmara Ngindrai pwi.” 10 Pe lang sih tehe sih pihin ara ngara kisike Yosep para kimatin kiyasura yiy. Pe ngara kipwahihiri yiy, hapeko Yosep ara kinho hilingi yiy pwi, pe kinmatin kinna sura yiy pwi. Pe kinohopo kinna pakeh kili yiy pwi masih.

11 Pwen lang sih Yosep iya nondriya seu para kiyapo mbulen, pe lang ara hamou ndramat para poya mbulen ara kinto seu pwi. 12 Pwen pe nambuyu Potipar isa pe imbultuwe koyau ta Yosep, pe ipwai ipa, “Asa matin kapolo yo.” Hapeko iwop iya ngawan, pe itali ndrohan ara iro ndron niman.

13 Nambuyu Potipar inimei tehe Yosep ara itali ndrohan pe iwop iya ngawan. 14 Pwen pe yiy iyoh iya kili hu ndramira mbulen para seu ipa, “Akanime iye na! Ndramira Hipuru mepo nambuyu iwiriy isa iripo seu ara imbusi mwomwan isa torou. Yiy isa kili yo nondriya seu pe ipa yo kumatin kiyasura yiy. Hapeko uwayeh pwokeyan iya. 15 Pwen ihilingi uwayeh pe iwop iya ngawan pe iyki ndrohan o ara iro ndron ndrahaso.”

16 Pwen nambuyu Potipar iwiri ndroha Yosep ara iro ndrahasan ipo namandran tan isarayah isa seu. 17 Pwen yiy itiyani titiye masih ipa, “Ndramira Hipuru para mbulyam mepo awiriy isa pe iropo po mbulen, ara isong isa seu pe isike yo. 18 Hapeko yo uwayeh pe yiy iwop iya ngawan, pe iyki ndrohan o ara iro ndron ndrahaso.”

19 Potipar ihilingi nongan masih mepo nambuyun itiyaniy iyatan, pwen pe ndrinan ara ilokuh. 20 Pwen namandran ta Yosep ara iwasi yiy, pe iwiri yiy iya kou ta kenon nepo hu ndramat para tandroindroi huro aliy. 21 Hapeko Yapan ara irosura Yosep i, pe itoholi yiy. Pwen pe namandran tahu makundrayen para nondriya kou ta kenon ara welen iso iyata Yosep. 22 Pwen pe iyki Yosep ara iromu iyatahu ndramat para tandroindroi mepo huro nondriya kou, pe iro nimnim iya melit masih mepo ngara kirayah kiro nondriya kou. 23  Yapan ara irosura Yosep pe isopwat yiy, pe melit masih Yosep iro mbusiy ara irayah hiyan opu. Pwen pe namandran tahu makundrayen mepo ngara kiro nimnim kiya nondriya kou, ara kinoho lolohonge kiya hapesah pwi, paratesah, Yosep ngara kiro mbusi melit masih ara irayah hiyan o.

Copyright information for `NSS