2 Thessalonians 2

E ma ise reoinon ijiga E Bomana fu una roko ijin

Regavo efnun igia faif. E Bomana Jesu Kurais fu una rokon ijiga no fu aferduome una besum afuikfuon ijefuon vuak iji bu eb kuaiga jakafu asi fain. Regavo bu kuaik E Bomana ijefuon tavan iji fun ruainmano kuaikva jab uri migegare nuanami vo oifian abek. Ijefuon maiji e roin bu kaven ise ijieb naka kuardiainva bu ijin ja kuardiak. Regavo e roin bu vuak buon ijia ja biesiak ga e roin bu fas kege biesiame kiak fas igi For nar isoinvano kiak. Regavo vuak iji bu ijeg kuaimoijo iji buka kufuimek. Ijefuon e ijieb vuak kufui kafokafo kuardiakva jab ma vierafek. Regavo ni vierafe tavan sumakin iji fuba migegare ruak revo fu samuake e uruvana bun God uzaga fuson ijia ruak. Regavo madu tavan sumakin iji fu samuake e ise iji fu iviakma Godk nigarain vo ke darotuakafamo iji fu koikfuon abe samafrek. Regavo e ise iji fu Godri rad abe ai vajai fian abejo ijia arafiriaga fu vajai fian abene barek. Regavo e iji ma ise reoinon iji fuka kaven kafokafo ga god kafokafo ema bu sirimamejo ijiebuon vuak ise kuaiknum bu kam buze ifdiak. Fu ijegrene fuka koikfuon dab e ma rene una ire uruvana samuagdiak. Fu ijegrejknum vo madu fuka va Godon ar* ijia aru fine e uruvana kuardiame kiak fuiji fuka Godno kiak.

Regavo na vierafega vuak igi na kuardiavo iji ja uria vierafen. Ijefuon maiji na uria ijia jana finva ijia vuak iji nan abe kuardiain. Regavo ire ise iji fu iviakma rekreno iji erar vo irerag ijar unam iji bijukurainma iji e besubesum jan koikjo game vierafen. Ijegvo tavan ma iji God fu abedenma ijia e iji ise reoinon iji fuson ijia keko samafrega e fok no gakfuon. Regavo e iji ma ise reoinon ijefuon ik izeg fu reoino iji fun iviakma moikigia reoin. Regavo uikinik fuon ijesugin fuba migegare abe samafrek. Regavo fu isuar samuaga fu Godri e iji fu unam fuon rarenma iji abe biom garef unakma ijiason e iji ma ise reoinon iji fuson uikinik fuon abe samafrega e fok bu uikinik fuon gakfuon. Regavo E Bomana nuvuon Jesu Kurais fu una fuon sanainma ijekma rokon ijia Jesu fu e iji ma ise reoinon iji dab arafirime i vuat fuon ijar kanaga fu guak. Regavo e iji ma ise iji fu Setanon* daro iji abe ruak. Ijefuon fu arime unam kufui sumakin kafokafo rega e fok bu unam iji giame nuanamikfuon. 10 Regavo fuka isema rene unam ise ijia e iji bu tavan rad barekfuon iji kam unam kafokafo ijia biesiak. Regavo e iji bu barekfuon iji bu vuak ma iji fu bu karauniakfuon iji buba mukorigia oijmia vo oimarknum vuak ma iji fain. 11 Regavo unam ise ga unam kufui ijia bu vierafeknum abe mimatame kegoijo iji fun Godri vierafe ijeg vajiam. Ijefuon buka unam ma ise iji abe darokma vierafeoij. 12 Ijefuon eraneb bu oimarknum ise rekuai vierafeknum vo vuak ma iji buba ma vierafenva iji rad God fu bu kege mukorigia arafiriakfuon.

Jaiji fun Godri ke uniainmado fu karauniakfuon

13 Regavo efnun e iji E Bomana fu ja oijmiamo iji no vierafe noka joifuon tavan bog Godon oimarek. Ijefuon maiji jaiji fun Godri vek ik anej ijia ja fun imut bijiaido fu ja karauniak. Regavo madu jaiji fun Godri ja karauniain ijefuon maiji ja vuak fuon ma iji jan ma vierafen. Regavo fun Kaven fuon ijefuon daro ijia ja kege una efuon akai ren. 14 God fu vuak ma iji no abe ja kuardiainva ijia fun ja kumene kara uniainmado ja e Bomana nuvuon Jesu Kuraison* sanainma ijia funa karivak. 15 Ijefuon efnun jab zazaik. Regavo ni uri giriesa ireme vuak ma iji no abe ir kuardiaknum vo fas ijia isoime kuardiainva iji kege mukorigia anu kuniaif. 16 Regavo E Bomana Jesu* Kurais ga God Asoinuvuon buka tavan bog no oijmuov. Regavo fuon izeg fu no ma reduomo ijia fuka tavan bog noka uri giriesame ire ma iji fu nuvuon rekreno iji samua kariok. 17 Ijefuon no sirimamega bu ja ejafiaknum daro miaga ja tavan bog vuak ma ijesugin kuaiknum vo unam ma ijesugin mimatame keok.

Copyright information for `NVM