Acts 2

Kaven Akai* fu ari ruainma ijin

Tavan iji bu kua Fentikosno* kuavo iji rokga e fok Jesu ma vierafejo bu una ar besum afuin. Bu besum karikoga migegare varur gafia gurovisiko ijia buibur bomana igeg ufime ar guf bu karinva ijia aruin. Areme bu gak ire be mian igeg vuije ikikene e besubesum ijiebuon vajat ijia kiren. Godon Kaven ijar e fok ijiebuon oij ijia arume nirokiamga bu uri isama kafo bu faivo bakin ijia nanuame kuain.

Bu ijeg kuaivga e Jius* God ma vierafejo bu ar iror ijia ruainva bu Jerusarem ijia karinva ijieb fain. Bu vuak nanuameja e fok bu faime una besum afuin. Regavo e kafokafo bu vuak buon bu kuaivo bu iji faiva buka oiserdiama bu kuai, E gafi ijeg kuaivo iji bu e Garerikor. Regavo noiji no isama kafokafo kuaiv revo e Gareriko gafi bu izeg vuak nuvuon kuaiv? Regavo no e roin no e Fatiako ga Meidko ga Eramko ga Mesafotamiako ga Judiako ga Kafadosiako. Regavo e roin no e Fontasko gavo ar be Eisia uf ijia revo roin Frigiako ga Femfiriako. Regavo roin e Ijiftko ga roin e Ribiako guf ar Sairini samaij ijia ruain. Regavo madu e kamono e Romko ga madu e roin no e Kritko ga Arabiako ijia ruain. 11 Regavo e roin no e Jius* ga roin no e Jius bakin* revo nom e Jiusbuon unam bu rejo no ijeg reoij. Noiji no ar iror ijia ruain revo e iji bu isama nuvuon ijia una karoim ire ma iji God fu renma iji kuarduoga no faivno kuain. E fok bu vuak iji faiva buka oiserdiama bu una bui kuai, Vuak igi bu kuaivo ijefuon maiji ireragno kuain? 13 Regavo e roin bu e Jesu* ma vierafejo ijin kam varaimene kuai, E iji bu do kugi ine nigen kam karoinvano kuain.

Fita fu uri vuak kuardiainma ijin

14 Areme Fita fu e ireven (11) Jesuon vuak abe oijo ijiena uri e fok aramajiame kia, E Jius guriga e Jerusarem karinva gurie janim isuar karine fadieke na irerag igi renma ijefuon gireg ma iji kuardiafno kiain. 15 Areme fu kia, Ja vierafero e igi bu do kugi invaro ja ijeg vierafen gavo iji bu bakin iviakma igi fu vek suok. 16 Regavo vuak igi e Joir e Godon vuak vierafene kuaimon* ijar ijeg kuai,

God fu kia, Na tavan radkma ijia na Kaven nun abe e fok unafdiak. Rega afjon bu Godon vuak iji faime una e roin kuardiak. Rega e nivek iji bu nimamaik rega eof iji bu naka naoik.
18 Regavo vuak igi naka ma kuardiav e nuibakin vuak nun faivo iji na Kaven Akai nun abe unafdiaga bu vuak nun faime una e roin kuardiak. 19 Na kaf gufia ire bomana sumakin jaba gainva iji rejknum kafo moikigia rega kavuan firake mian ijia naine uk ajiek. 20 Regavo tavan fu nakike asam fu kavuaime una ire kavuan igeg rek. Ire ijieb amur rega rad ijia E Bomana ijefuon tavan bomana fu ruakfuon iji fu ruak. 21 Regavo tavan ijia erar fu E Bomana ijefuon if ijia kura kumekma fu keunak.
22 Ijefuon e Isrerko* gurie vuak igi faif. God fu Jesu e Nasaretko kuamga fu ire sumakin ga anf kafokafo ja amur ba giainva iji samakaf rena jan giain. 23 God fu e iji bu Jesu abe ja miakfuon iji fun usuibe vierafen. Regavo fun usuibe oibuon ijia ijeg nirenma ijefuon ja arekoga bu Jesu abe e ani iji miava bu abe kuros* kanain. 24 Jesu fu vajai fian abega Godri fu keunama fu una urin. Ijefuon maiji Jesu fuka izeg una zuarunam ijia manikma bakin. 25 Regavo Devid fu Jesusina vuak ijeg kuai,

Fu kia, Tavan uruvana na ga E Bomana fu na uinak ijia maniunaim. Revo fuka mukoi samuagdiemo ijefuon fu erar ire ise be nun rekma bakin.
26 Ijefuon naka oimarme vuak iji e bu oimarkfuon iji kuaiv. Revo naka vek God a ma vierafen ijefuon maiji a kaven nun ab arega fu zuarunam vak. Regavo eon iji maturainma iji ab arega vajai fuon fu mako ijia muturek.
28 Regavo an ar unam iji ma karivako iji nijaidien. Regavo a nosik fino ijefuon naka oi madiem. Regavo vuak iji e Devidri ijeg kuain.
29 Ijefuon efnun vuak igi na sai nuvuon e Devidon vuak iji abe samakaf kuardiakrej. Fu guama bu abe mako ruin revo mako fuon iviakma no vek gav. 30 Fu vek fino ijia fu e be fu Godon vuak vierafene kuaimon. Revo Devid izeg fu rekfuon iji fun Godri Devid kuardama fun vierafen. Fu ijeg kua, Na saton ijia e be abega fur uri a Kin renma ijegrene e fok samuagdiakno kuain. 31 Fu vierafega Jesu fu una urik ijefuon fu vuak ijeg kuardiame kia,

God fuba e iji fu kuama fu ari ruainma iji arega fu zuarunam vak vo vajai fuon fuba mako ijia muturek.
32 Regavo God fu Jesu kuama fu una urina no e fok ni nuvuon ijia non gain. 33 Fu Godri kuamga fu uri ij maink fuon ijia fin. Fu ijia fikoga God fu Kaven Akai* iji fu mako kuainma iji abe unafdain. Ijefuon irerag ja iviakma giaknum faivo iji fun Godri Kaven fuon iji abe no unafduin. 34 Devid fun guain gavo fuba varur ijia vain. Regavo fu vuak iji kuai,

E Bomana fu e bomana nun kua, Ni nosik samai igia fike na e ani on moikigia karinva iji ke a uniafdaga bur moikigia karine oifuon ik rejno kuain.
36 Ijefuon e Isrerko e fok igie vuak igi fuka vuak mano jaka mukoi faif. Godri Jesu e iji ja abe kuros kanainva iji kuama fu E Bomana ren. Regavo e iji God kuama fu ari ruainma iji fun e Jesur ari ruain.

37 E bu vuak iji faiva vuak ijar oi kediama buka oi karoime uri Fita ga e afasor* roin iji kia, Efnun No izegrekno kiain? 38 Rega Fita fu uri kia, E besubesum jaka oi karoime ise jon iji nuigafiakfuon. Ja ijegrega e be fu ja ke Jesuon if ijia do* ruardiaga God fu ise jon giame arega ja Kaven Akai iji abejno kiain. 39 Regavo fun Godri kiainma ijefuon jaka afjon ijiga e aibe karinva ijiga e fok eraneb God fu if buon ijia kuria kumeno iji bu fuon vakfuon.

40 Fu ijeg kuriaikuriaikin vuak ju kuardiame kia, Jaka e iji ise rejo ijiebuon unam iji agordiaikin ja jon karaunianamifno kiain. 41 Regavo e fok bu Fitaon vuak iji faime ma vierafejga e be fu uri bu do ruardiain. Regavo tavan ijia e ka ma uruvana tiri taosen (3,000) bu uri e Jesu ma vierafejo ijiena mazin. 42 Regavo tavan uruvana bu besum e afasor ijiebuon vuak bu nijaidiavo iji faime buna gorveknum besum duok iknum Godon sirimameknum ijeg reoin.

43 God fu daro efuon miamga bu uri unam sumakin kafo rejga e fok bu giava buka oiserdiain. 44 E iji Jesu ma vierafejo iji buka besum afuim gorveknum sinuom vajuinamiknum ijeg reoin. 45 Regavo erar fu isema fioino bu gakva e roin buka uri sinuom buon ke kimene mon abe buon oifian ganamiknum atame vajuinamiv. 46 Tavan fok bu Godon ar ijia afuiknum ar buon ijia duok besum ine oimarev. 47 Bu ijegrejknum Godon oimarga e fok bu giaro e Jesu ma vierafejo buka e maro bu ijeg vierafej. Rega E Bomana fu tavan besubesum e roin karauniame aferdiaga bu una e ma vierafejo ijiena maziv.

Copyright information for `NVM