Acts 7

Stiven fu e mamkanuk iji vuak kuardiainma ijin

Areme e bomana Godon isuf baroino ijar uri Stiven kua, A vierafega vuak igi bu oisina kuaivo iji fube mano kuain? Fu ijeg kuamga Stiven fu uri kia, Uviaifnun ga asoifnun gurie igia faif. God e iji sanainma fuon fuka zin igeg iramo iji fun usuibe sainuvuon Eburam* fuba ar Mesofotamia arega Aran vainma ijia fun fu bien. Fu bieme kua, Ni ar on igeko e aganon igi arega uri ar be nar nijaidakrejo ijia vakne kuain. Ijefuon Eburam fu ar Kardia arega uri va ar Aran ijia figa asoifuon fu guama Godri fu kuamga fu uri una ro ar igi ja iviakma karinva igia fin. Moik iji God fu Eburam mainma iji fu ma fuon mainma bakin. Revo God fum kua, Moik iji a saifon ijiena abe fikno kuain. Regavo tavan iji God fu vuak iji kuainma iji Eburamon fu am kafo ba nafen.

Regavo God fu vuak ijeg Eburam kuardain. Fu kua, Saifon bu juaivasia fo adred (400) ijeg ebuon ar ijia karine e ijiebuon ikrek. Regavo e ijieb madu bu kam arafiriaga bu oifian abeknum ikrek. Regavo nar e ijekor iji kam arafiriaga bu vajai fian abega rad saifon bu moik iji areme usem moikigi na abe miavo ijia karine una nun sirimamekno kiain. Eburam fu Godon vuak iji igamga God fu kua, Na am farifon iji na kege vajai surif buon kania ufume anf naga* bu ijia vuak na kuardiainva iji vierafekno kuain. Ijefuon Eburam fu uri am farif Aisek nafene naki eit (8) barekoga fu abe ijeg ren. Revo rad Aisek fu uri Jekaf nafega fur uri am tuer (12) nafen. Revo am tuer (12) ijieb buka saifnuvuon ma anej ijin.

Regavo am ijieb Josofna nibijaikuai vierafejo ijefuon bu uri fu dab e Ijiftko ijiebuon kimeja fu buon ik ren. Josof fuka oifiain gavo God fu fusik ijefuon fur afikin fuon iji dasumdako fu fioin. Josof fu va ar Ijift e kin Fero fino ijia kekoin. Regavo Godri daro mamga Kin Fero fu Josofon unam iji ga fuka mukor ijefuon fu kuama Josof fu moik Ijift ijia e bomana rene Kin ijefuon ar iji samuagdiain. 11 Areme ar Ijift ga Keinan* ijia vasia kekome e fok kaniama e saifnuvuon bu duok bu ikfuon iji fun baren. 12 Regavo Jekaf fu faik ar Ijift ijia bu duok kafo ija fu faime uri saifnuvuon iji kiama bu ar ijia vain. Regavo ar iji bu vainva iji buon amur bu ijia vain.

13 Regavo rad bu una vaka Josof fu ijar vajai fuon abe nijaidiame kia, Naiji uviaijon ijino kiame aferdiame Kin Fero nijaima fu Josofon uviaifijaf iji giain. 14 Areme Josof fu ijia vuak buon abedeme kia, Ni vaga Jekaf asoinun iji kua fu aganuvuon iji aferdiame igia Ijift ruafno kiain. Regavo aganfuon fuka uruvana e seventi faiv (75) ijeg. 15 Fu ijeg kiainma ijefuon Jekaf fu va Ijift ijia saifnuvuon ijiena ijia karine aoin. 16 Bu aoivga surif buon bu ke va ar Sekem kuaivo ijia e Eimobuon munuag be Eburam fu kimenma ijia uniain.

17 Regavo tavan iji God fu Eburam efuon karauniakafa kuainma iji fun samairega enuvuon ar Ijift ijia karinva iji buka uruvana ren. 18 Regavo rad e Kin be fu Josof ba vierafenma ijar anerene ar Ijift samuain. 19 Kin ijar saifnuvuon iji biesiame kuriairema bu am buon iviamkor iji kam koreva bu aoin. 20 Tavan ijia bu e Mosis ka e mukor iji nafen. Bu nafene abe ar fuon ijia samuame kariko asam nokbek (3) baremga bu fu abe akozva Kin Feron kabaij ijar Mosis* abe fuirene farifuon igeg samuain. 22 Fu ijia figa e Ijiftko ijieb unam buon ma iji nijaiva fu e makin rene vuak mamkanuk iji kuai vo unam ma ijia reoin.

23 Mosis fu juaivasia fuon foti (40) ijeg baremga fu uri efuon e Isrerko iji giak vain. 24 Fu vaga efuon be e Ijiftko ijar dab arafirimga Mosis fu e iji abe uname e Ijiftko iji kanama fu guain. 25 Mosis fu vierafe fu ijegrega efuon bu game vierafero Mosis fu bu karauniakafa fu ijeg ren. Regavo efuon iji buba ijeg vierafen. 26 Rega afarma fu giak e Isrerko nokarok (2) bu bui bijaivga fu keko turamdiame kia, Jam igi faif jaiji nouviaikin revo ja iragrekuai joi bijaivno kiain. 27 Fu ijeg kiamga e iji kaifuon kanama ijar uri Mosis vaja dab gareg akozme kua, Erar a kua ani e makin rene no samuagduomne kuain. 28 A vierafe a niar e Ijiftko iji a kanainma ijeg a na kaniekreno kuain? 29 Fu ijeg kuamga Mosis fu vuak iji faime uri ko ar Midian ijia va fine am farif nokarok (2) nafen.

30 Mosis fu ijia fine juaivasia foti (40) ijeg barko ijia fu una uruor Sainai ai moikum namo ijia mian naiga fu game va ijia Godon anera* iji bien. 31 Mosis fu ire iji game fuka oiserma fu ura samaij ijia mian ifirik iji naino iji gakafak vain. Fu gak vako ijia fu Godon ir iji fain. Fu faik fu kua, Na saifon Eburam ga Aisek ga Jekaf ijiebuon God ijin. Fu ijeg kuama Mosis fuka turanamime simaimga fu uri ni dab sauin. 33 Areme God fu ijia Mosis kua, Ar iji a manino iji fu akaino diak surif on a sainma iji rume namne kuain. 34 Regavo God fu madu kua, Na giaga enun ar Ijift ijia karinva buka vajai fian abej. Bu vajai fian abene aduiva na iji faime bu ifejdiakafie na ari ruainvano kumen. Ijefuon iviakma roga na vuak kuardaga a ar Ijift ijia vakne kuain.

35 Areme Stiven fu madu uri saifijaf ijiebuon suar iji buin ifene kuardiame kia, Mosis e iji Isrerko bu uzame kua, A erar kua ani e makin rene no samuagduomno kuainva ijin. Rega Godri anera iji mian rene naino ijefuon azan ijia Mosis kuama fu efuon samuagdiame karauniakafa vain. 36 Fu efuon Ijift karinva iji aferdiame juaivasia foti (40) ijeg fu buna ar Ijift ga saof Kavuan irif ijia ga ar ijia ire sumakin fok reoin. 37 Rega Mosis besum ijar e Isrerko kia, Godri ejon igia e vuak fuon vierafene kuaimon be kuaga fu igi na fu kiema na ruainva ijeg ruakno kiain. 38 Mosis fu saifnuvuon e Isrerko ijiena ai moikum namo ijia besum buna oinma ijin. Regavo madu uruor Sainai ijia anera ijar Godon vuak ma iji abe fu mavga fu abe no karaunuokafa ruainma ijin.

39 Regavo e saifnuvuon bu Mosis buba igain. Rega buka Mosis uzame oibuon buka una ar Ijift ijia vakuai vierafen. 40 Ijefuon bu uri e Eron kua, No e Mosis fu no aferduo ar Ijift are ruainma unam fu reno iji noka bagainva ijefuon ni ar god kafo amarme uniafduo no una iji jajiavno kuain. 41 Bu ijeg kuaime uri ire be maf-kau igekin iji amarme uri fuifuon isuf baroknum iro ine ire iji bu imut buon ijia amarenva ijefuon oimaren. 42 Regavo God fuba bu igiamga bu una mujur varur gafia irenva ijiebuon sirimamen. Rega vuak e Godon vuak vierafene kuaivo bu isoime ijeg kuai,

E Isrerko iji ja ai moikum namo ijia juaivasia foti (40) ijeg ijia oin revo ja nuifuon fanuf kafo jaba kania isuf baroidien.
43 Ja mavua be amare god jon Morek abe ijia abesme god jon Refanon mujur ijefuon kaven abe ijekma oij. Ire iji jam jar amardiain gavo jaka iji ke amarigia sirimamejo ijefuon na ja aferdia ja ar Babiron asim gafaijia vakno kiain.
44 Regavo saifnuvuon ijieb Godon ar muvua iji abe ai moikum namo ijia karioin. Regavo bu ar muvua ijin game vierafega God fuka ma ga ar muvuaka* iji God fu Mosis kuardama fu gainma bu ijeg sain. 45 Regavo rad saifnuvuon bu ar muvuaka iji abe afijaf miava bu dab gieme e Josuana e ar kafoko ijiebuon ar abekuai vain. Regavo Godri ifejdiama bu e moik ijekor iji kuriaireva bu subinai vain. Bu subinai vakoga ar iji fum ijia na roke e Devidon tavan ijia ruain. 46 Devid fu unam amarigia kegoino ijefuon God fu Devid abe nidoin. Ijefuon Devid fu una God kua, Ar Jekafon God ijefuon ni kie na ar on be savno kuain. 47 Rega Devid fu bakigavo fu e Soromonri Godon ar* be sain.

48 Regavo God fu e bomanado fuba ar emab sainva ijia fik. Regavo e Godon vuak vierafene kuainma* iji fu ijeg kuai,

49 God fu kua, Varur gafi fu ar nun gavo moikigi na dia ijia korevo ijefuon ja ar izia nuifuon sak? Regavo ar na ijia fikfuon iji izer? Regavo ire fok igi nan nar imut nun igia amardiain.
51 Stiven fu suar iji kuardia barme uri kia, Ja sibe nui giren. Jaika e taraikor igeg Godon vuak iji jaba faiv. Ja e saifjon bu kenva jak ja ijeg Godon Kaven iji nuigafav. 52 Regavo saifjon ijieb e iji Godon vuak vierafene kuaivo iji kaniain. Regavo madu e ma iji bu kia fu ruakno kiainva iji ja iviakma koikjon kunaim kanain. 53 Godon vuak iji anera bu abe roka jan fain gavo irerafuon jaba vuak iji igain.

Bu mun tuame Stiven kanainva ijin

54 E iji karinva bu Stivenon vuak iji faiva buka ma deajidiamga bu uri kuriaikuriaikin igia kuriaireme fu ziegafain. 55 Regavo Stiven e ka Godon Kaven Akai ijar oifuon ijia raren ijefuon fu gafeg varur gufia ga God fino ijia fuka sanako Jesu fu una Godon imut maink ijia fin. 56 Fu ijia figa Stiven fu game kume, Varur fu daja ruvako naga Jesu fu una Godon imut maink ijia fina na gainvano kumen. 57 Fu ijeg kumega e fok bu imut ada bijume set iduadiaga bu savo buon iji ru moik ijia name vakga e nivek Sor kuavo ijar samuagdiako bu biom Stiven manino ijia vain. Bu ijia usem fu diakara dab ar iji bu karinva iji arega abe usem makaf ijia mun tuame kanain. 59 Buba aren gavo buka kanako fu uri kume, Jesu E Bomana ni kaven nun iji abene kumen. 60 Areme fu uri ato same biumame kume, E Bomana unam ise igi bu nun rejo iji ni giame aremne kumene ijia guain. Bu ijegreja e Sor fu giame oifuon ijia vierafene kuai magoino kuain.

Copyright information for `NVM