John 11

Rasaras fu guainma ijin

Regavo ai Beteni ijia e Rasaras kuavo ijar adam ka bomana aben. Regavo ai Beteni iji fu bara Mata ko Merik buon mai. Regavo Meri iji bara iji fu oir udi mukoi urino iji fu abe Jesuon diak ijia useme some nigen fuon jau ijia abe fidainma ijin. Bara ijefuon makin e Rasarasno kuavo ijar adam aben. Fu adam abene fuka guakvega makifijaf ijieb uri Jesu vuak nijame kume, E Bomana kaion a oijmamo iji fuka adam bomana abenmano kumen. Bu vuak ijeg Jesu nijavga fu faime uri e vuak fuon faivo iji kia, E Rasaras fu adam aben ga na vierafe fu guame una uriga e bu ijia izeg Godon daro fu ikreno iji game una fu abe aroivknum vo Farif fuon igi na arordiekno kiain.

Regavo Jesu fu Mata ga Meri ga makin fuon Rasaras iji fuka bomana oijmiamo. Ijefuon Rasaras fu adam abenma ijefuon vuak iji bara nokarok (2) bu nijainva iji fun fain gavo fuba ijia vain fu magaga una madu naki nokarok (2) ijia fin. Fu ijia fine rad fu una e vuak fuon faivo iji kia, Ruano una ai Judia vakno kiain. Fu ijeg kuardiamga bu una roin kua, E Nijaidiamo ai Judia a una vakveno iji e Jius iji bu nito igem bu mun tuame kanakveja a ijefuon uri igia ruain. Regavo iji aba vierafe gavo a una madu ijia vakafa vierafenmano kuain. Bu ijeg kuardavga fu kia, Tavan iji fuka jaoijmanak manine sanam. Ijefuon e iji fu tavan ijia oinon iji fuba arikanak ijefuon maiji fu moikigi fu sanainma ijia oin. 10 Regavo fu naki oinon iji fuka dia kam ire kafo nizukiak. Ijefuon maiji ire sanamo be fu bado fu izeg ai ni nisaime okma bakin. 11 Jesu vuak ijeg kuardiame uri e vuak fuon faivo iji kia, Kainuvuon Rasaras fu ninaido na vakva na saga fu una urikno kiain. 12 Fu ijeg kuardiamga e vuak fuon faivo iji bu una roin kua, E Bomana Rasaras fu ma ninaikma iji no vierafe fu una urikno kuain.

13 Regavo Jesu fu Rasaras fun ma guainma ijefuon fu iji vierafene kuain. Regavo e vuak fuon faivo iji bu vierafero fu ma ninainmaro bu ijeg vierafen. 14 Ijefuon Jesu fu uri ka visu kuardiame kia, E Rasaras fun ma guain. 15 Regavo magoi noba ijia kariko fu guainma ijefuon iji fun maren. Fu ijeg guaga na va gafia kua fu una uriga ja ijia game una na ma vierafekno uri no fu gak vakno kiain. 16 Ijegreare e Tomas e iji bu kua Fuatkaru nafenvano kuavo ijar uri kia, E fok roga no enuvuon E Nijaidiamo guriena vainkin no funa besum aoikno kiain.

Jesu fu ma karivako ijiga aoime una urijo ijin

17 Regavo Rasaras fun guamga bu abe mako ruinva iji naki nokarok ga nokarok (4) barko ijia Jesu fu Beteni ijia kekoma bu vuak iji kuardain. 18 Regavo ai Beteni fu Jerusarem samaij ijia ijefuon e Jius uruvana bu bara Mata ko Merik giakuai ijia ruain. Bara nokarok (2) iji bu makibuon guainma ijefuon buka oifian abenva ijefuon e iji bu bara iji ifejdiakuai ijia ruain.

20 Regavo Mata fu oifian abeknum fino ijia bu kua Jesu rokno kuava fu faime fu kekome unam gafia biekafa vain. Fu vako Meri fu vek ar gafia e ijiena fin. 21 Regavo Mata fun kekome va Jesu bieme kua, E Bomana a igia finobatie makin nun iji fuba ijeg guak. 22 Regavo ivia na vierafega a fuifuon irerag a God kuardakma fu rekno kuain. 23 Mata fu ijeg kuardamga Jesu fu kua, Makin on iji fun guain gavo na vierafe fu una uri okno kuain. 24 Fu ijeg Mata kuardamga fu kua, Na vierafe tavan radkma iji ruakma ijia makin nun iji fu una uri fivakno kuain.

25 Areme Jesu fu madu una Mata kua, Naiji na ma karivako ijiga aoime una urijo ijin. Regavo erar fu na ma vierafekma iji fu guak revo kaven ijia fu una ijia fivak. 26 Regavo erar fu nivek fine na ma vierafeno e iji fu ijia ma fivak. Ijegvo a vuak igi na kuardavo iji abe faime ma vierafen? 27 Jesu fu ijeg kuardamga Mata fu kua, E Bomana na vierafega aiji a Godon Farif. E iji bu kuai fu moikigia ruakno kuainva ijino kuain.

Jesu fu nirainma ijin

28 Mata fu Jesu ijeg kuardame fun va ar gafia kekome isuar Meri kuardame kua, E iji E Nijaidiamo iji fun ruainma gafaija oifuon kiemno kuain. 29 Fu ijeg kuardamga Meri fun migegare kekome Jesu biekafa vain. 30 Regavo Jesu fuba ar ijia kekoin revo fu vek unam gami Mata fu bienma ijia manin. 31 Ijefuon Meri fu migegare kekome fu biekafa vakgame e Jius iji bu fu samua karinva iji bu gak fu vakga bu uri dab arafirin. Bu vierafero kafu gami makifuon ijefuon mako vien ijia niraikafa vakoro bu usem jain.

32 Meri fu vake gami Jesu fu manino ijia kekome uri ato same kua, E Bomana a igia fibatie makin nun fuba ijeg guak. 33 Regavo Jesu fu uri Meri ga e Jius iji bu niraivo iji giama fuka bomana oifiain. 34 Ijefuon fu uri kia, Ja surif fuon iji ja abe izia mako ruinvano kiain. Fu ijeg kiamga bu kua, E Bomana no abe gafia mako ruinvano ni ro gamne kuain. 35 Areme Jesu fuka oifiaima fu ijia niraimga e Jius iji ruainva bu ijia gain. Bu game una bui kuai, Ni garia gaf fuka Rasaras oijmamo ijefuon fu iji niraimno kuain. 37 Bu ijeg game kuaiko e roin bu kuai, Fu ur e ni zuriaigin iji amarema fu una ninarain. Regavo igi fuka igia fikin fu Rasaras ifejdaga fu una urikdo fuba igia fimano kuain.

Rasaras fu una urinma ijin

38 Areme bu Jesu afeme vake mako iji Rasaras bu uname mun dab vien iji bijuinva ijin nijain. Bu nijaivga fu kekome mako iji gama fuka bomana oifiain. 39 Ijefuon fu kia, Mun guri ja dab mako vien guri bijuinva ijin biom gareg abedefno kiain. Jesu fu ijeg kuardiamga bara Mata e iji guainma ijefuon makin ijar una roin kua, E Bomana Rasaras no dab unainva iji fuka naki nokarok ga nokarok (4) baren. Ijefuon no mun guri biom abedekva fuka udi ise rikno kuain. 40 Mata fu ijeg una kuardamga Jesu fu kua, Nabe amur kua a ma vierafekma Godon sanainma iji a gakno kuain?

41 Areme e iji bun uri mun iji dab biom ken ijia abeden. Bu abedevga Jesu fun gafeg varur gufia nikajaknum sirimamene kua, Asoinun na on sirimamega a faimo ijefuon na bomana on oimarev. 42 Na tavan bog on sirimamene a irerag na kuardavo iji a faimon. Regavo igi na sirimamejo ijefuon maiji na e igi irenva ijiebuon na iji sirimamej. Na on sirimamega a faime irerag na kuardavo iji rega bu ijia game una ma vierafero naiji ar kiema na ruainvaro bu ijeg vierafek. 43 Jesu fu ijeg sirimamene barme uri e iji bu unainva iji uruvana igia nizume kuai, Rasaras una keko ro. 44 Jesu fu ijeg kuamga e iji bu dab ugon ijia anume unainva iji fu una ijekma kekoin. Fu anugma una keko rokga Jesu fu uri kia, Ugon gari ja dab anudainva iji iramdafno kiain.

E iji bu Jesu kanakuai vierafenva ijin

(Metiu 26:1-5; Mak 14:1-2; Ruk 22:1-2)

45 Areme e fok bu Mata ko Merik giakuai ruainva iji bu Jesu ire sumakin iji fu renma iji game buka una fu ma vierafen. 46 Regavo e roin bu Jesu ire iji fu rena bu gainva ijin una va e Ferisis iji kuardiain. 47 Ijefuon e Ferisis ijigam e mamkanuk Godon isuf baroijo iji bun e mamkanuk roin ijiena afuime vua kuain. Bu kuai, No e iji fu ire sumakin ka mamkanuk iji fu reoinon iji no fu abe izeg rek? 48 No ire iji fu reoinon iji no game areke fu vek ijegreokma e uruvana buka una fu ma vierafek. Regavo madu e Romko buon e mamkanuk bu iji giakva bu uri ar bomana nuvuon igi no sirimamejo iji keduokfuon. Regavo madu buka uri enuvuon fok kam arafiriakno kuain.

49 Bu ijeg kuain gavo e Kaiafasno kuavo iji fu ijia fin. Regavo madu fu juaivasia ijia fu e Godon isuf baroino ijiebuon e bomana ijefuon fu uri kia, E gurie jaka ire kafo ba mukoi vierafej. 50 Ijefuon na vierafe e besum fu e fok nuvuifuon guakma iji fu marek. Regavo no areke e Romko bu uri moik nuvuon fok keduokva fuka ba marek. 51 Regavo e Kaiafas vuak iji Jesu fu e Jius ijiebuon guakfuon iji fu kuainma iji fum fur vierafene kuainma bakin. Fuiji fu juaivasia ijia fu e Godon isuf baroino e bomana be ijefuon vuak iji fu ma ijefuon fu ijeg kuain. 52 Regavo fu madu e Jius ijesugin buifuon kuainma bakin. Regavo fuka Godon afijaf fok eraneb bu dab atase ar iror igia karioinva ijin aferdiame agan besum rekafa fu iji vierafene kuain.

53 Ijefuon e Jius ijiebuon e mamkanuk iji bu tavan ijia vuak iji faime bun anerene uri Jesu kanakuai vuak kuaime ujuinamin. 54 Ijefuon Jesu ai Judia fu oinma iji fuba una e ijiebuon nifak ijia oin. Regavo ar iji fu ijia areme una uri ai mai Ifrem ai moikum namo samaij ijia e vuak fuon faivo ijiena ijia fikafa vain.

55 Regavo tavan Fasova iji e Jius bu iro ijo iji fun samairega e fok bun ar buon iji areme una iro ijefuon kanafume samuakuai bu una Jerusarem ijia besum afuin. 56 Bu ijia afuiknum ijegrejo ijia bu Godon ar ijia arume besum afuim karine Jesu nisain. Bu fu nisaimoknum uri bui kuai, Ja vierafega Jesu fube iro igia ruak? 57 E Ferisis ijiga e Godon isuf baroijo iji bu ijegrejknum uri e iji kuardiame kia, Iviakma ar iji e Jesu fu fino iji erar game vierafekma ni migegare una kuarduoga no e iji kunaim abe tofno kiain.

Copyright information for `NVM