John 14

Jesu fu unam iji Godon vako ijin

Areme Jesu fu uri kia, Jab uruvana vierafeknum oifian abek ni God ma vierafeknum vo na ma vierafef. Regavo ar gufi asoinun fu fino iji fuka ar guf uruvana ijefuon na vakva na ar jon kafo amardiak. Regavo asoinun ijefuon ar guf iji fuba uruvanabatie na vuak igi naba biesiame kuardiak revo fuka ma uruvana ijefuon na ijin ja kuardiav. Na amur ajie va gufia kekome ar jon amarme na una ja aferdia ijia vaga ja nana karik. Ja va ar na fijo ijia jak ja ijia karik. Regavo ar iji na vako ijefuon unam iji jan vierafedo ja ijia jajieme vuak.

Jesu fu ijeg kuardiamga e Tomas fu uri kua, E Bomana no ar a vakreno iji noba gain ga no izeg unam iji vierafene ja vuakno kuain. Fu ijeg kuamga Jesu fu una kua, Naiji na unam ma iji ga vuak ma iji ga ma karivako ijin. Ijefuon unam ma iji Asoinun fu fino ijia vakfuon iji fu unam be a izeg vakma bakin gavo fun duadok nun ijia vak. Jesu fu ijeg kuardiame kia, Ivia jan na gieme mukoi vierafen revo rad ja madu ijeg Asoinun game fu mukoi vierafek. Regavo iviakmaigia jan fu mukoi vierafen ga madu jan fu gainvano kiain.

Jesu fu ijeg kuaimga e Firif fu uri Jesu kua, E Bomana no Asoion iji gakuai vierafenvano ni nijaiduoga no ga fu oimaduomno kuain. Fu ijeg kuamga Jesu fu una roin kua, Firif! Na tavan uruvana na jana oin gavo jaka vek naba gieme mukoi vierafen. Regavo erar fu na gienma iji fu Asoinun fun gain. Regavo ja irerafuon na kie, Ni Asoion nijaiduo no gavno kiev? 10 Regavo Firif a na giemo ijefuon ni ma vierafero naiji na Asoinun ijek fioijo ga Asoinun fu nosik tavan bog fioino kuain. Areme Jesu fu uri e vuak fuon faivo iji kia, Vuak fok na kuardiavo iji nam nar kuardiavo bakin revo vuak iji fu Asoinun ijefuon vuak. Ijefuon ik irerag na reoijo iji fu Asoinun fu nosik fioino ijar duadok nun ijia ik fuon iji ren.

11 Regavo ni vierafef. Naiji na Asoinun ijek fioijo ga Asoinun fu nosik fioin. Regavo naiji jaba ma vierafekva ni ik fuon na reoijo ijia giame una na ma vierafef. 12 Regavo vuak igi na ma kuardiavno ni amarigia faif. Erar fu na ma vierafekma fu ik iji na reoijo iji fuk ijeg reok. Regavo iji fuka ma rad na una Asoinun fu fino ijia vakva e iji bu iviakma nuifuon ik ukakna reoijo iji bu rad ik mamkanuk kafo nuifuon rek. 13 Regavo irerag kafo ja if nun ijia kiekva na migegare ifejdiak. Na ijegrekva e fok bu ire iji na reoijo ijia gieme bu una Asoinun iji oimardame dab aroik. 14 Regavo ja na ire kafo fuon ja if nun ijia kiekva na oi marknum ifejdiak.

Godon Kaven Akai fu abe unafduokafa kuinma ijin

15 Ja na mukoi oijmiekva nika vuak nun fok mukoi faime igiame reof. 16 Ja ijegrekva na Asoinun kuaga fu e iji ja ifejdiakfuon iji abe ja unafdiak. 17 Regavo e iji fu ja ifejdiakfuon iji Godon Kaven Akai ma iji fur ja ifejdiaga ja tavan bog Godon ma iji giaknum karivak. Regavo e moikigia ise reoijo iji buba oimarknum Kaven Akai iji abek. Ijefuon maiji bu fu buba gak ga madu buba mukoi vierafek. Regavo fuiji jan mukoi vierafen ijefuon maiji jan ni jon ijia fu gain ga fu jana tavan bog fiknum oin.

18 Regavo ja naba uniako vaga ja jonkua kariok ga na una ja karinva ijia ruak. 19 E moikigia ise reoijo iji bu tavan sibank ijesugin bu na buba giek revo jaiji ja una na giek. Ijefuon maiji na guame una uri ijia fivako ijefuon jak ja ijia karivak. 20 Ijefuon tavan iji abekma ja ijia gieme vierafero naiji na Asoinun ijek fioga ja nana karioij ijefuon maiji na oijon ijia fij. 21 Erar fu vuak nun fok na kuardiavo iji mukoi faime igiamo e iji fu tavan bog na oijmiem. Regavo e iji na mukoi oijmiemo iji Asoinun fu e iji mukoi oijmak ga nak na e iji mukoi oijmaknum na koiknu abe fu samafredaga fu na giek.

22 Jesu fu vuak iji kuaim barko vo e Judas e iji fu Jesu abe e Jius iji miainma iji bakigavo e Judas be ijar uri Jesu kua, E Bomana a izegredo a nuvuon ruaga e iji moikigia ise reoijo iji a arekno kuain? 23 Fu ijeg kuamga Jesu fu una roin kua, Erar fu na mukoi oijmiekma fu vuak nun iji mukoi faime igiak. Regavo erar fu ijegreno iji Asoinun fu e ijin game oijmak ga na Asoinun ijek tavan bog no e ijiena oifuon ijia kariok. 24 Regavo erar fuba na mukoi oijmiekma e iji fu vuak nun fuba mukoi faime igiak. Ijefuon vuak iji ja faiko na kuardiainva iji fu vuak nun bakin gavo vuak fok fu Asoinun gufi fu kiema na ruainva ijefuon vuak.

25 Na vuak fok nan vek moikigi na jana oijo ijia nan kuardiain. 26 Regavo e iji fu ja ifejdiakfuon iji Godon Kaven Akai ijar ga iji fu Asoinun ijar if nun ijia kuaga fu ari jon ruak. Regavo fur ire fok nijaidiaknum ifejdiaga ja vuak fok na kuardiainva iji jaba rumdiagavo ja mukoi vierafeknum ok.

27 Nan vakrej ijefuon na daro mia ja afurvene oimarknum kariok. Revo ijeg afurvene karijo ijekin be ja moikigia biekva bakin ijefuon jab uruvana oifian abeknum juk. 28 Nan kuardiava jan fain, Na kia na ja unia vainki na una ruakno kiain. Regavo ja na mukoi oijmiekva ja nun oimareke na Asoinun fu fino ijia vak ijefuon maiji Asoinun ijar fu na asidien. 29 Na vuak fok nan amur kuardiain gavo ire ma iji bu rad rega ja ijia giame una ma vierafek. 30 Naba jana uruvana fine vuak kuaik ijefuon maiji Setan e iji moikigi samuamo iji fun rok. Setan fu daro nun fu asikma bakin. Regavo e moikigia oinva ijieb ma vierafero naiji Asoinun iji oijmavo ijefuon na irerag fu kuardiemo na iji mukoi igiame reoij. Jesu fu vuak ijeg kuardiame kia, Ni uriga no ar igi no karinva iji areme vakno kiain.

Copyright information for `NVM