John 7

Jesu ga uviaifijaf ijin

Areme Jesu fun ai Gareri ijia oknum e iji vuak nijaidiaoin. Regavo fu una ai Judia ijia fuba oin ijefuon maiji Jius e mamkanuk iji bu fu kanakuai samuame karinva ijefuon fuba ijia vuak nijaidiain. Regavo ai Judia ijia bu tavan iji e Jius bu usuibe ai moikum namo ijia busame ijia karioinva iji vierafekuai iro ijo iji fun samairen. Ijefuon Jesuon uviaifijaf iji bun uri Jesu kua, Ar igi a oinon iji arega ni una uri gamia Judia vakne. A ijia va ire sumakin igi a reoinon iji roin ijia regakva e vuak on faivo iji bu ire sumakin a reno iji gak. A igia sauime fikma e ar iror fok bu izeg a ma vierafekva bakin. Ijefuon vierafe e fok bu a game ma vierafekva ni uri una gamia Judia e uruvana bu afuime iro ijo ijia va ire sumakin iji rega bu gavno kuain. Vuak iji e uviaifijaf ijieb ijeg Jesu kuardain gavo bu madu Jesu buka ba ma vierafen.

Ijefuon Jesu fu uri una kia, Tavan kafokafo e iji bu iro ikuai afuivo ijia ja tavan kafo vak ga tavan kafo ja arekva iji fun maren. Regavo iviakma naiji na tavan nun iji fuba abedo naba vak. E moikigia oinva iji ja bu ziegafiakva bakin revo bu na ziegafieknum dab arafiriek. Ijefuon maiji na unam ise bu kegoijo iji na samakaf visume kuardiavo ijefuon bu na ijeg rek. Ijefuon ni jar iro ijia vaf revo naiji naba vuak. Ijefuon maiji tavan nun iji fuba abenmano kiain. Fu ijeg kuardiame fun ijia areme Gareri ijia naki sibank fin.

Jesu fu iro ijia vainma ijin

10 Areme Jesuon uviaifijaf iji bun Judia ijia iro iji bu inva ijia vakga Jesu fu rad isuar sauime jajia vain. 11 Fu vakgame e Jius e mamkanuk iji bu iro ijia karinva iji bu uri Jesu nisaimoknum e iji afuinva iji kia e iji fu izerkiga nijaiduofno kiain. 12 Regavo e iji afuinva ijia e roin bu fuisina isuar karine bui kuai e iji fuka e mano kuaiv. Regavo e roin bu kuai e iji fuka e uruvana aferdiame una unam ise ijia nijaidiamno kuain. 13 Bu dab ijeg fuisina kuaimoin revo buba abe uruvana kuaime samafren ijefuon maiji bu e Jius e mamkanuk iji juin.

14 Rene iro iji bun ine rirkinenva ijia Jesu fun Godon ar ijia aru manine e iji vuak anerene nijaidiam. 15 Fu ijeg nijaidiamga Jius e mamkanuk iji bu gava buka oiserdiamga bu kuai, E iji fu Godon buk akaij ijia vuak akaij iji buba abe fu nijain revo fu izeg vuak ma iji mukoi vierafenmano kuain.

16 Bu ijeg kuaivga Jesu fu una kia, Vuak igi na kuardiavo iji fu nun bakin revo vuak iji fun God Asoij iji fu kiema na ari ruainva ijefuon vuak. 17 E be erar fu Godon vierafenma ijia kegoino e ijar vuak igi na abe kuardiavo iji fur giek. Fu giega na vuak nun nar vierafenva iji abe kuardia vo na Godon vuak abe kuardiavga iji fur gieme vierafek. 18 Regavo e be erar fum vuak fuon fur vierafeno iji abe kuardiaoino iji fu fuon aroinamikro fu iji vierafen. Regavo erar fu vierafe e iji fu kuamga fu ruainma iji abe aroikro fu ijeg vierafeno e iji vuak fuon fu kuaimon iji fuka ma ijesugin ga kufui kafo ijia fuka bakin. 19 Mosis fuka akai uruvana kege ja vajiain gavo e fok guri ja karinva ijia e besum fu erar akaij iji mukoi igiainma bakin. Regavo ja irerafuon ja na kaniekuai nisaidievno kiain. 20 Jesu fu ijeg kuardiamga e iji bun uri kume, E gafi ka kaven ise* ijar niroinma gafi a erar a kanakvega a iji kuaimno kumen.

21 Bu ijeg kuardavga fu una kia, Na ire sumakin besum tavan iji ja isuar karine Godon sirimamejo ijia reja ja gieva jaka oiserdiain. 22 Regavo iviakma ja Mosisri akaij iji surif kania ufu anf navo iji miainma ijefuon ja ijin ijeg keg. (Regavo unam iji bu saifjon ijieb ijeg kege ruain revo Mosis akai fu rad isoime ke vajiain). Ja am ukakna ijiebuon surif iji ja kania ufu anf navo iji fu tavan akaij iji guf ijekma ja iji jaika vierafekva bakin. Ijefuon vo ja irerafuon e adagin gafi na tavan iji ja isuar karine God sirimamejo ijia amarva fu mainma ijefuon una oij isema na vierafeknum jaka ziemoij. 24 Ebuo ise iji ja giame kuaikva iji isuar irerag bu rejo iji anej ma iji amarigia giame kuaikfuon. Regavo iji jam uri irerag bu rejo iji giame una ise buon ijefuon kuaivo iji fuba maren.

E iji God fu kuamga fu ari ruainma ijin

25 Fu ijeg kuardiamga e Jerusaremko iji bu uri bui kuai, E iji kafu e igi e mamkanuk bu kanakuai nisaimoijo ijin. 26 Bu fu kanakuai kuaimoij revo fuba jum fuka uri e fok ijiebuon nifak ijia manine vuak kuaim. Rega madu e mamkanuk iji buba una vuak fuon gari roib kuardav. Bu kafu vuak fuon iji faime vierafega e iji fun ma e iji God fu kuamga fu ruainma ijarga buba una vuak fuon gari roib kuardav. 27 No e gari fu e izekor iji non vierafen gavo tavan rad God e iji fu kuaga fu ruakno kuainma iji fu ruakma fu erar izia fu ruainma iji mukoi game vierafekma bano kuain.

28 Jesu fu vek Godon ar bomana bu sirimamejo ijia manine vuak kuardiamo ijia bu ijeg kuaivga fu kume, E fok guri karinva gurie ja na e izekin ga na izia ruainva iji jaka ba vierafen. Naiji nam nar igia ari nun na vierafenva ijia reokro ruainva bakin. Regavo God iji fu kiema na ruainva iji fuka God ma ga fu e kufuikin bakin. Regavo fuiji ja game vierafenva bakin gavo nar fu nan vierafen. Ijefuon maiji na fur kiema na fu fino ijia ari ruainvano kuain.

30 Fu ijeg kuardiainma ijefuon e roin bu fu kunaim dibur unakuai vierafen. Regavo bu imut buon ijia kafo buba vajai fuon niriain. Ijefuon maiji tavan fuon ma iji bu fu kanakfuon iji fuba ruain. 31 Bu ijeg ren gavo e iji afuinva ijia buka e uruvana una fu ma vierafene isuar bui kuai, E iji bu usuibe kuai fu ruakno kuainva iji fu ruakma fute ire sumakin ka uruvana kafo e gari fuba renma iji asime rekno kuain.

Bu e Godon ar bomana iji juo karijo iji kiavga bu Jesu tokuai ruainva ijin

32 Bu fuisina vuak ijeg kuaivga e Ferisis ijiga e mamkanuk Godon isuf baroijo iji bu e juo karijo roin kiavga bu Jesu tokuai vain. 33 Bun vake gafia usevga Jesu fu uri kia, Naiji nam asam sibank igia oine nan una God e iji fu kiema na ruainva ijefuon vak. 34 Na ijia vakva jaka uri na nisaidiek revo ja giekva bakin. Ijefuon maiji ja ar na vako ijia jaba vuakno kiain. 35 Fu iji kuardiamga e Jius bu vuak iji faime una bui kuai, E iji fu ar fu izia vakredo fu vaga noba gak? Fu kafu uri e Grikbuon mai ijia e Jius iji bu kari vainva ijia E Grik iji vuak nijaidia vak? 36 Fu kuai fu vakma no fu nisaik revo noba fu biek. Regavo madu no ar fu fino iji noba vakno kuainma ijefuon anej ma iji irerag?

Do iji bu ine ma karivako ijin

37 Tavan bomana be bu iro ine barekrejo ijia Jesu fu uri uruvana igia aramajiame kume, E be erar do kafakma ni nun roga na do jiamavno kumen. Ijefuon maiji usuibe Godon buk akaij ijia bu isoinva iji bu ijeg isoi, Eraneb bu na ma vierafekva do iji fu bu ifejdiaga bu ma karivako iji fu oibuon ijia abesek. 39 Regavo Jesu vuak iji fu do ijefuon kuainma iji fu Godon Kaven iji bu eraneb ma vierafene abekfuon fu ijefuon kuain. Regavo tavan ijia bu Godon Kaven buba aben. Ijefuon maiji Jesu fuba guame una uri sanainma fuon kaf gufia vain.

E iji bun dab atame roinroin renva ijin

40 Areme e fok afuinva ijia e uruvana roin bu Jesu vuak iji fu ijeg kuainma iji faime kuai, E iji no vierafe fu ma e iji Godon vuak faime una e roin kuardiamo ijarno kuain. 41 Regavo e roin bu kuai, E iji fu God e iji fu kua fu ruakno kuainma ijar. Regavo roin bu kuai, E iji God fu kua fu ruakfuon iji fu ai Gareri guf ijia fu ruakma bano kuain. 42 Regavo Godon buk akaij iji bu usuibe isoinva ijia fu ijeg nijaiduin. E iji God fu kuai fu ruakfuon iji fun e Devidon uifarif ijia ruak. Regavo e iji fu ai Betriem e Devid fu fino ijia nafekno kuain. 43 Ijefuon bu Jesuon vuak iji ijeg kuaime dab ata roinroin rene bui sigunamin. 44 E roin buka deajidiamga bu Jesu kunaim tokuai vierafen gavo vajai fuon iji buba kafo niriain.

45 Areme e Godon ar juo karijo iji bu Jesu tokuai ruainva iji bun ijia areme una va e mamkanuk Godon isuf baroijo ijiga e Ferisis gafi bu karinva ijia usen. Bu usevga bu uri kia, Ja irerafuon e iji no kiava ja vainva iji jaba tom afem ruainvano kiain? 46 Bu ijeg kuardiavga e Godon ar juo karijo iji bu una roin kia, E iji no afekuai vain gavo no usem vuak fuon iji fu kuaimon iji faiva fuka oiseraduin. Vuak fuon iji fuka vuak sumakin e bu igia kuai no faivo bakin fu ijin kuaimga no ijia are ruainvano kiain. 47 Bu ijeg kuardiavga e Ferisis iji abevo e mamkanuk iji bu una kia, Ja kafu e ijefuon vuak fuon ijar oijon iji fun kam karoidiain. 48 Ja vierafega e Ferisis ijiga e mamkanuk igi roin buba una fu ma vierafev? 49 E iji nigen ka ba mukoi vierafejo iji bu kafu e Mosison akaij iji buba jajiav ijefuon bu uri e ijin ma vierafej. Bu ijegredo rad God fu bu kam unam ise ijia arafiriakno kuain.

50 Bu ijeg kuaivga Nikodimas e iji fu tavan be naki ijia ro Jesuk fine vuak kuainma ijar uri kia, No akai nuvuon ijia kuainma iji noka amur e iji no kege vajai fian vajiakrejo ijiebuon vuak irerag bu isema rejo ijefuon anej ma iji faikfuon. Regavo rad ijar no bu kege vajai fian vajiakva iji fu markno kiain. Nikodimas fu ijeg kuardiamga e mamkanuk ijiga e Ferisis iji bu madu uri kua, A ijeg kuaimdo ak a kafu e Garerikor. Ni Godon buk akaij iji bu usuibe isoinva ijia dame ga. A ijia dame gabatie a ga e iji fu Godon vuak vierafene kuaimon iji fu ai Gareri ijia ruakma bano kuain.

Copyright information for `NVM