Luke 1

Eko Tiofiras e uruvana bun giriesame ire iji igia nuvuon renma iji bun isoin. Regavo vuak iji bu isoime no kuarduinva iji bu e gami bu ik amur ijia ire ma iji giame abe kuarduo ruainva ijieb isoin. Ijefuon e bomana Tiofiras na vek ik amur ijia unam iji nan amarigia gain. Ijefuon na vierafega naka izeg Jesu* fu reoknum nijaidiaoinma na iji abe amarigia isoime a nijav. Rega fas iji na ijeg isoinva iji na vierafero na ijeg isoikin a unam ma iji bu nijaidiainva iji a ma vierafekro na iji isoin.

Jon e do ruardiamon* bu nafekuai kuainva ijin

Ijegreare tavan iji Erod fu e Judiakobuon e bomana renma ijia Zekaraia fu e Godon isuf baroino iji rene e Abijan uifarif ijiena ik ren. Regavo bara fuon Erisabet fuk fu e Eronon uifarif be. Bu busik besum E Bomana God fu oimarkfuon ijia karioknum vo buka akai fuon iji ga vuak fuon fok mukor igame karioin. No barakin iji bu am bakin ijefuon maiji Erisabet fun abiten gavo madu bun eoradiain.

Regavo ve be Zekaraia fu tavan fuon fu ikrekfuon iji rokga fun Godon ar* ijia ik ren. Regavo izeg bu akai buon ijia bu e karevo ijeg bun fu aben. Ijefuon fuiji ik fuon iji fu ire udi mukor urino iji kege fata ijia baroinon. Ijefuon fu E Bomana Godon ar guf ijia arume vain. Fu arume ire udi mukor urino iji kege jako e uruvana bu makaf ijia karine sirimamen.

11 Fu ijegreno ijia fu E Bomana ijefuon anera* iji gain. Anera iji fu fata iji bu ire udi mukor urino iji javo imut maink ijia manin. 12 Fu ijia manina Zekaraia fu gama fuka oisereme ka bomana juin. 13 Fu jumga anera iji fu uri kua, Zekaraia jumo aremne kuain. Ijefuon maiji God fun on a sirimameno iji fain ijefuon barakon Erisabet fu oifuon am farif be nafega if fuon a Jon kuak. 14 Barak on iji fu am iji nafekma ja ga e uruvana jaka ma bomana oimarkfuon. 15 Regavo Godon nifak ijia fuiji fuka ma e bomana reken. Fu vuain ga do kugi kafo fuba ik. Regavo tavan iji bu fu nafekva ijia fuka Kaven Akai ijar oifuon ijia rareken. 16 Fur efuon Isrerko* uruvana aferdiame una E Bomana God buon ijefuon ruak. 17 Fu usuibe Eraija e Godon vuak vierafene kuaimon* fu e darokin renma ijeg fu daro abene amur E Bomana ijefuon unam iji amarme vak. Regavo fur am ijigam asoifijaf iji aferdiame una agan besum rek. Regavo madu fur e iji bu God ba igavo iji aferdiame una unam ma ijia uniak. Rega fur E Bomana ijefuon e uruvana aferdiame ke amardiaga bu una E Bomana iji samuakno kuain.

18 Anera ijar ijeg kuardamga Zekaraia fu una kua, Naiji nan eorega bara nun fuk fuka ma barasrenma kuain. Regavo ire iji a kuaimon iji fu izegrekno kuain? 19 Regavo anera iji fu urine kua, Naiji na Gebrior anera iji Godon nifak ijia manino iji nar. Godri na kiega na vuak ma iji abe igia a kuardakro ruain. 20 Regavo a vuak nun igi na kuardavo iji aba ma vierafeno ijefuon iviakma a vuak kafo aba kuaik. Regavo am isuar fivake bu am iji nafekva ijia ason una vuak kuaik.

21 Zekaraia fu ijegreko e iji bu samua karinva iji bu vierafero fute Godon ar guf ijia aru irerag abenoro bu ijeg vierafen. 22 Fu ijegreare fu kekome ba vuak kafo kuardiama bu vierafero kafu Godon ar guf ijia ire be nimamaime gainmaro bu ijeg vierafen. Regavo Zekaraia fu vuak kuardiakrena fuka iseremga fum imut ijia kuardiain.

23 Ijegreare fu Godon ar ijia ik fuon fu reno iji fun baremga fun una ar fuon ijia vain. 24 Ijegrene naki sibank barko ijia bara fuon Erisabet fu e fudiene ar fuon ijia fikok vake asam imut roin (5) baren. 25 Ijefuon fu uri kuai, Iviakma E Bomana ijar na ifejdieme unam ijin ren. God fun na mardienma ijefuon na e uruvana ijiebuon nifak ijia na e fudienva iji na jukfuon iji fun fur abe vainmano kuain.

Jesu bu nafekfuon kuainva ijin

26 Erisabet fu e fudiene fivake asam imut roin ga nikit (6) ijeg barko ijia God fu anera Gebrior kuamga fu ar Nasaret vain. Rega ar iji fu moik Gareri guf ijia. 27 Regavo iji fu vainma fu bara be fuba baruna naino iji bu e Josof kuainva ijefuon vuak abe vain. Rega e Josof iji fu Devidon uifarif revo bara ijefuon if iji Meri. 28 Ijefuon anera iji fun va kekome Meri kua, Makarijo iji fu osik. E bomana iji fu osik fino ijefuon fur daro mame unam ma ijin on renmano kuain.

29 Regavo Meri fu vuak iji anera ijar kuardainma iji faime uri bomana vierafero anera fu irerafuon izeg anadiamro fu iji vierafen. 30 Ijefuon anera iji fun uri Meri kua, Ab juk aiji fun Godri oi fuon ijekma a mainma ijefuon fur a oijmame mardain. 31 Aiji ason rad e fudiene am farif be nafek ga if fuon a Jesu kuak. 32 Regavo fuiji fuka E Bomana rene vo bu fu kua E Bomana God kaf gufia fino ijefuon Farifno kuak. Rega E Bomana God fu izeg saifuon Devid fu e bomana renma ijeg fu kuaga fur E Bomana rek. 33 Regavo fur ka ma E Bomana rene e Jekafon uifarif iji samuagdiaknuvo fur ire fok samuagdiame ijia fivak.

34 Anera ijar ijeg kuardamga Meri fu una kua, Naiji naba baruna naijo gavo vuak iji a kuardiemon iji fu izeg nun rekno kuain? 35 Meri fu ijeg kuamga anera iji fu una roin kua, Godon Kaven iji fu a nirokame daro maga a daro abek. Ijefuon am akaij iji a nafekma fu Godon Farif rek. 36 Regavo igia fai. Aganon be bara Erisabet fuiji e bu kua fu e uibitenmano kuain. Fuiji fuka ma barasren gavo iviakma fun asam imut roin ga nikit (6) ijeg e fudien. 37 Regavo God fu ire besum revo ire kafo fu aremo bakin revo fuka e ire uruvana reno kuain. 38 Anera fu ijeg kuardamga Meri fu una kua, Na tavan uruvana God vuak irerag fu kuardiemon iji na rejo ijefuon vuak irerag a kuardiemon iji na vierafega fuka nun rekno kuain. Fu ijeg kuardamga anera iji fu ijia areme vain.

Meri fu Erisabet gakafa vainma ijin

39 Ijegreare tavan ijia Meri fun migegare sinuom fuon kanafume fun mai be bu uruo kaf ijia karinva ijia vain. Regavo mai iji fu ai Judia guf ijia. 40 Fu va ijia kekome Zekaraian ar ijia ajie Erisabet anain. 41 Meri fu Erisabet anaiko am ijar Erisebeton defok ijia katin. Regavo Erisabet fuka Kaven Akai ijar oifuon iji samuamo ijefuon fun uri uruvana igia kume, Aiji aka bara uruvana ijiebuon araf ijia if on fuka ma bomana rekfuon. Regavo amon iji fuk if fuon fuka ma bomana reken. 43 A E Bomana ijefuon asie iji ar na giekafa ruain. Regavo irerafuon ire ka ma sumakin igi fu nun ren? 44 A na giekafa ruainma ijia na faik am igi fu ijia katin. 45 Rega iviakma aiji anka oimarek ijefuon maiji a irerag God fu rekno kuainma iji aka ma vierafenma ijefuon ire iji fuka on rekno kumen.

Merin dua fu roene oimarenma ijin

46 Areme Meri fu uri kuai, Naiji na oinun ijekma E Bomana God nuvuon fu no karaunuinma ijefuon oimardaknum fuon oimaren. 48 Regavo madu if nun fu ma ukakbe gavo fun Godri na imut bijienma ijefuon ire ka bomana iji fu nun ren. Ijefuon rad e uruvana bu ire ma iji God e darokin iji fu nun renma ijefuon bu na kiek bara oimarmo ijino kieken. Ijefuon vo tavan uruvana Godon if akaij iji dab aroik.
50 E uij kafokafo ijia Godon ma rediamon iji fu e iji bu fu juvknum igavo ijin nijaidiamon. 51 Regavo fur daro fuon ijia ire mamkanuk ijin re vo madu fur e aroikaraoijo ijiebuon vierafe iji kam karoimon. 52 Fu ijegrene uri e iji bu e mamkanuk moik samuagdiavo iji ke arigavo e oi naiki ga e ma iji kege ajie uniain. 53 Fu ijegrene uri e iji bu vasia oriainva iji duok ma iji vajiaga e iji ire uruvana zarainva iji fum kiamga bu imut kiriasame vain. 54 Fu usuibe Eburam* ga uifarif fuon vuak ma iji fu ifejdiakro kiainma iji fun ijekma aresredo fu bu ifejdiak. Regavo fum efuon Isrerko ijiebuon oifian abene mardiain. Ijefuon maiji fu Eburam ga uifarif fuon iji fu ifejdiakafa kiainma ijefuon fu buon oifian abene tavan uruvana bu mardiaknum ifejdiak.

56 Meri fu asam nokbek (3) Erisabetk fine fun una ai fuon ijia vain.

E Jon e do ruardiamon bu nafenva ijin

57 Ijegreare Erisabet fun tavan iji fu amfuon nafekfuon iji rokga fun am farif nafen. 58 Fu am iji nafega e ai samaij ijia karinva iji abevo kaifijaf uruvana bu ire mukor iji E Bomana fu bara Erisabeton renma iji faime buka fuon bomana oimaren. 59 Ijegreare fun naki eit (8) barekoga bun am iji abe vajai fuon ijia anf abedeme abe asoifuon Zekaraia nabui kuai vierafen. 60 Bu ijeg vierafen gavo asiefuon ijar uzame kia, Na if fuon iji na Jon kuakro vierafenvano kiain.

61 Fu ijeg kuardiamga bu una kua, E uifarifon ijia if iji fu bano kuain. 62 Ijegreare bu uri asoifuon imut ijia nijaime kua, A vierafega no am igi no era kuakno kuain.

63 Bu ijeg kuardavga Zekaraia fu uri imut ijia nijaidiame fefafuo kiamga bu abe mavga fu ijia isoime kia, If fuon Jon no kiama e uruvana buka oiserdiain. 64 Areme tavan ijia Zekaraia fu una vuak kuaime uri Godon if abe ajieme fu oimardain. 65 Ijegrekoga e ar samaij ijia karioinva iji buka oiserdiamga bu uri vuak iji abe Judia guf ijia kuardiame vain. 66 Rega e uruvana bu vuak iji faime dab karine vierafeknum kuai, Am iji kafu rad irerag abek? Ijefuon maiji no samakaf gaga Godon daro iji fun fusikno kuain.

Zekaraia fu ire uruvana rad rekfuon iji kuainma ijin

67 Jonon asoi Zekaraia fu Godon Kaven ijar oifuon ijia arimga fu uri Godon vuak ma igi kuai.

68 No E Bomana ga e Isrerkobuon God ijefuon oimare vo ifuon abe ajiek! Fur efuon bu ise ijar kuniaim girenma ijia ifejdiaknum karauniakafa ruain. 69 Godri nuvuifuon e darokin iji fur no karaunuokfuon iji kuamga fu ruain gavo fuiji fu e Devid e Godon ikreno ijefuon uifarif. 70 Regavo usuibe e akai Godon vuak vierafene kuaivo iji bu ijeg kuain. 71 Fur e ani iji bu nuvuon isemareknum ziegafuovo iji fur karaunuokno kuain. 72 Regavo Godri sai nuvuon Eburam ujuime kua, Nar unam akai iviamkor ja nana besum rekfuon iji vierafene kuainvado na uifarif on iji oijmiame ifejdiakno kuain. 74 Regavo madu fu una ujurduome kuo, Na e ani iji bu ja isemareknum ziegafiavo ijia karauniakno kuain ijefuon noba juvknum ik fuon rek. Regavo madu noka e akai rene una unam fuon ma ijia tavan bog ijia karivak. 76 Aiji a farinun ga aiji bu kua E Bomana God kaf gufia fino ijefuon vuak vierafene kuaimon ijino kuak. Regavo ar amur vaknum E Bomana ijefuon unam iji amarme vaken. Regavo ar efuon iji kuardiame kia, Ja ise jon iji areme una oi karoigakva fu giame ja karauniak. 78 Ijefuon God nuvuon fu e ifejdiamo ga oijmiamon. Ve nakinman ijia tavan fu kekome ijia sanaga nakinman iji fu iraseme vakon ijeg e no karaunuokfuon iji fu ijeg ruak. Regavo noiji no ise nuvuon ijefuon nakinman ijia karin. Regavo non aoikuai juvo ijia E Bomana nuvuon ijar nakinman no karijo ijia unam iviamkor no afurvene ma karivakfuon iji amarme no karaunuin.
80 Jon fun ofrene e darokin renma ijia unam fuon fu God ma vierafeno iji fuk bomana rene darokin ren. Ijegreare fu ai moikum namo ijia fine una e Isrerko ijia anerene Godon vuak ma iji kuardiame oin.

Copyright information for `NVM