Luke 14

Jesu e adagin iji keunainma ijin

Areme tavan Sabat (Satade) iji e Jius bu isuar karijo ijia e Feresibuon e bomana fu Jesu kuama fu ar fuon ijia fusik duok ikafa vain. Fu vakga e uruvana ijia ruainva iji buka amarigia nikaja arega fu irerag rega bu gakuai. Regavo e be diak ga faraf foinma ijar Jesuon ruain. Fu rokga Jesu fu uri e vuak akai nijaidiavo iji abevo e Ferisis iji kuardiame kia, No tavan Sabat (Satade) akaij ijia e karauniakva fube markno kiain? Jesu fu vuak ijeg kuardiamga buba uri vef roin kuardavga fu uri e iji keuname kuama fu vain. Ijegreare fu madu una kia, E be igia erar amfuon be ga maf-kau fuon be fu tavan Sabat (Satade) igi ja isuar karijo ijia mako iji bu do jiavo ijia urakva jabe arega bu ijia karik ki ja va bu ifejdiame karauniaga bu ajie vakno kiain? Jesu fu vuak ijeg kuardiamga buba una vuak ijefuon una roin kuardain.

Kabuaikabuaikin okfuon ijin

Jesu fu izeg e kafo bu ar ma iji rarevo iji fun giain ijefuon fu vuak be igeg bijame e uruvana kuardiain. Fu kia, E be fu iro ine a kua a vakma ab migegare va ar ma ijia ari fik. Ijefuon maiji a va ari fike e ikin be fu rad roga aba gak. Fu rad ruakma e iji fu ja e nokarok (2) kiama ja vainva iji fu ro a kua, Ani uri moik ijia fike fu e igar ar ma ijia fine kuakma aka juvknum urik. 10 Ijefuon a vakma ni moik ijia figa e iji fu kuama a vainma iji fu roga a e ikin bega fur kuaga a uri fata ma ijia fik. E iji fu a ijegrekma e uruvana ruainva iji bu ijia izeg e iji fu a oimardame renma iji gakfuon. 11 Ijefuon maiji e besubesum erar fu koikfuon abe e bomana rekma fu una e ukakbe reken. Rega erar fu koikfuon abe e ukakbe rekma fu una e bomana rekno kiain.

E kavekin ifejdiakfuon ijin

12 Areme rad Jesu fu uri e iji fu kuama fu fusik duok ikafa vainma ijin kua, A tavan kafo e kiaga bu ana duok ikva ab kaion ga uviaion ga e ar ana karijo ga e ire uruvana zarainva iji kiaga bu ro ana duok ik. Ijefuon maiji bu rad duok on a vajiainma ijefuon kume a vakma bu una vef izeg a buon renma ijeg on rek. 13 Ijefuon a iro vajiakma ni e iji ire bakin ijigam e ai kirariainva ijigam e diak ga imut foinva ijigam e ni zuriaigin ijia kiaga bu ro iro on sare. 14 Regavo a ijegreno iji anka oimarek. Ijefuon maiji buba una ire on vef roin vajakfuon. Rega aiji fu Godri tavan iji e maturainva iji aoinva bu una urijo ijia fur unam ma kafo on rekno kiain.

E iji kiaga bu Godon ar ijia vakfuon ijin

(Metiu 22:1-10)

15 Regavo e be ijia buna fine duok ino iji fu vuak iji faime uri Jesu kua, E iji eraneb bu Godon ar sanainma ijia fata ma ijia karine duok ikfuon iji buka oimarkno kuain. 16 Fu ijeg kuardamga Jesu fu una vuak be ijeg bijame kuardain. Fu kua, E be fu iro ikafa ire uruvana kanafume e uruvana kiaga bu sarekfuon. 17 Areme tavan iji iro ikfuon iji roga fun efuon ikrejo iji kia, Ni va e na kiainva iji kia ire uruvana nan kanafu samuainvano nin kia bu rokno kiain. 18 Fu ijeg kuardiamga efuon ikrejo iji bun va e iji e bomana buon fu kiainma iji kiain. Rega e uruvana bu iro iji buba vakuai vierafen ijefuon bu uri vuak kafokafo bu vierafenva ijia kuardiain. E be fu uri kia, Na moik be kimedo na iji gak vak. Ijefuon ni va vuak nun ejon bomana iji ijeg kuardafno kiain. 19 Regavo e be fu uri kia, Naiji na maf-kau nun ten (10) kimedo na iji kege ar nun ijia mimatame giak vakno ni va e iji vuak ijeg kuafno kiain. 20 Rega e be fu madu uri kia, Naiji na iviakma bara aben ijefuon naba vuakno ni va e iji ijeg kuardafno kiain.

21 Bu ijeg kuardavga e iji e bomana ijefuon ikreno iji fun una va gafia kekome vuak ijin efuon bomana iji kuardain. Regavo e bomana ar iji samuamo iji fuka deajin. Ijefuon fun uri efuon ikreno iji kua, Migegareigia una kekome va mai unam ijia oknum e duok bakin ijigam e ai kirariainva ijigam e ni zuriaigin ga imut ga diak foinva iji aferdiame rokne kuain. 22 Areme rad efuon ikreno fun una kekome kua, E bomana vuak on nan abe kekome kuardiame vain revo ar kafar fu vekno kuain. 23 Fu ijeg kuardamga e bomana iji fu uri kua, Ni va ar kafokafo samaij ga unam ijia oknum e uruvana kiaga bu ruainki ar nun fu e uruvana zaraik. 24 Rega igia faif. E iji na kiava buba iro nun igi sarenva e iji bu duok nun igi buba ikno kiain.

E Jesuon vuak faimo* rekfuon fuka ma gigikin

(Metiu 10:37-38)

25 Areme tavan be e uruvana bu Jesuna vako ijia fu dakaroime kia, E be erar fu asoifuon ga asiefuon ga barafuon ga afijaf ijin uruvana oijmiagavo na fum sibank oijmiemo e iji fuba aresredo fu izeg kua na Jesuon agano kuaik. Regavo madu e be erar fu uviaifijaf ga makifijaf uruvana oijmiame una fui uruvana oijmana migavo na fun sibank oijmiemo e iji fuba aresredo fu e vuak nun faimon rekfuon. 27 Regavo madu erar fuba nuifuon vajai fian abe guame rad jajimo e iji fuba e vuak nun faimo reken. 28 Ijegvo igia faif. A e be ar sakafa vierafekma e iji amur fuka va fine mon iji fu ar sakfuon iji vierafeknum kanafu vake fun aresrekma fu vierafero ar iji fu same barekro fun ijeg vierafek. Regavo fuba ar ijefuon ire uruvana kanafukma iji fuba same barek. Ijefuon e bu usem gakva buka dab varaimene kijdakfuon. 30 Bu dab varaimene kuaik, E iji ar iji fu anerene sain gavo fuba same barenmano kuaik.

31 Unam besum ijeg ga e bomana be fu e sibank ten taosen (10,000) ijeg aferdiame una e bomana be fu efuon ka uruvana tuenti taosen (20,000) ijeg aferdiainma ijek bijaikafa rokon iji fu isuar fine vierafekfuon. Fu fine vierafega fun aresredo fu e fuon ijiena va e bomana be ijek bijaikafa fu ijin vierafekfuon. 32 Fu fine vierafega fuba aresrekma fu e vuak abe oijo iji kiaga bur va e bomana be ijin vek gafi fu aibe ijia rokon ijia bieme una vuak oimarme kafaikfuon iji kuardakno kiain. 33 Jesu fu ijeg kuardiame kia, Unam besum ijeg ga e be fu erar e vuak nun faimo rekafa vierafekma ni amarigia fine vierafekfuon. Fu vierafega fun aresrekma fu ire uruvana ga unam ise kafokafo iji nuigafiame una e vuak nun faimon rekfuon.

Jesu kujan ise ijia bijame kuainma ijin

(Metiu 5:13; Mak 9:50)

34 Regavo madu igia faif. Kujan iji fu ma gavo fu ve da arume safikirakma marien fuon fuba una kujan igeg rek. Ijefuon kujan ijekin iji fu ma bado bu kege korekfuon. Unam besum ijegvo ja na jajivo ijia ja isediaga ja ijia arekva iji ikjon iji ja nuifuon rejo iji fu barek. Ijefuon ja adakiga ni vuak igi amarigia faifno kiain.

Copyright information for `NVM