Luke 2

Jesu nafenva ijin

(Metiu 1:18-25)

Areme tavan iji e Ogastas fu e bomana renma ijia fu kiamga bu moik kafokafo iji e Romko bu samuagdiavo ijia e dame vain. Regavo tavan iji bu e damoinva ijia e Kuirinias fu e Siriakobuon e bomana ren. Ijefuon e uruvana bu mai buon bu nafediainva ijia va ifbuon vajiaga bu isoikuai vain. Ijefuon e mamkanuk e daoijo iji bu usem Josof kua, Aiji a e Devidon uifarif be ijefuon ni una va Betriem ar bu sat on Devid nafenva ijia if on isoimne kuain. Ijefuon Josof fun bara Meri kaifuon iji afeme Nasaret Gareri guf iji areme una Betriem Judia guf ijia vain. Regavo bara Meri e Josof fu abekno kuainva iji fun fudien.

Regavo bu vek Betriem karinva ijia am fu nafekfuon tavan iji fun ruain. Bu ijia vain gavo ar bu naoikfuon iji fuka ba aresren ijefuon bu kiavga bu una mabuon ar ijia vain. Ijegreare rad bara Meri fun am farifuon amur iji nafene abe ugon ijia anume abe mavua guf iji bu maf-kau duok vajiavo ijia unain.

E maf-sif* samuagdiavo ijiga anera* ijiebuon vuak ijin

Rega tavan ijia e maf-sif samuagdiavo iji buk bu ar ijia naki maf-sif iji bu kege fak kirakuriainva iji samuagdiaoij. Bu ijegreoijo ijia E Bomana ijefuon anera be fu bu oijo ijia ruakoga E Bomana ijefuon sanainma iji fu ijia sanama buka bomana juin. 10 Bu ijeg juvga anera iji fu uri kia, Jab juk igi na ruainva iji na joifuon vuak ma iji abe ruain. Regavo e uruvana bu vuak maigi faikva buka oimarek. 11 Ijefuon ivia e Devidon mai ijia e iji e karauniakfuon iji bun nafen revo e iji fu E Bomana Kurais*. 12 Regavo ja izeg fu game ma vierafekfuon iji ijeg am iji bu abe ugon ijia anume abe mavua bu maf-kau duok vajiavo ijia unainva iji ja gakno kiain.

13 Anera iji fu vuak ijeg kuardiame barekoga migegare bu gak anera ma uruvana bu Godon dua oimarvo iji uruknum varur ijia ari roka bu giain. 14 Regavo anera iji bu dua be ijeg roin,

No God e iji kaf gufia fino iji abe aroiv gavo God fu efuon iji fu oimardiamo iji ifejdiame samuagdiaga bu afuim kariok.
15 Ijegreare Godon anera iji bun areme una varur gufia ajie vakoga e iji maf-sif samuagdiavo iji bu una bui kuai, Ruano va Betriem usem ire iji renma E Bomana fu kuarduinma iji gavno kuain. 16 Bu ijeg kuaime bun migegare vake Meri ko Josof biediame gak am iji fu mavua bu maf-kau duok vajiavo ijia nam. Fu ijia namga bu game urine am ijefuon vuak iji Godon anera fu kuardiainma iji Meri ko Josof kuardiame uri e uruvana Betriem karinva iji kuardiain. 18 Ijegreare e uruvana bu vuak iji faiva buka oiserdiain revo Meri fuk uri ire uruvana iji renma iji fum oifuon ijia vierafen. 20 Rega e iji maf-sif samuagdiavo iji bun vuak irerag Godon anera bu kuardiako bu faivknum giainva ijefuon dua oimarvo iji uruknum God aroime if fuon abe ajieknum bun una vain. Ire fok bu faiknum giainva iji anera ijieb kuardiainva ijin.

Bu Jesu* abe inva ijin

21 Ijegreare vuik besum barekoga bu am iji abe vajai surif fuon iji kana ufume anf abeden. Bun ijegrene uri if fuon iji fuba nafeko ijia Godon anera iji bu ime kua Jesuno kuainva ijin in.

Bu Jesu afem sos ijia God makuai vainma ijin

22 Areme Josof ko Meri bun tavan buon rokga bun e Mosison* akaij iji fu kuainma ijeg bun ire fok reoine baren. Ijegreare bun uri am iji afeme abe E Bomana God makuai Jerusarem vain. 23 Regavo iji fun buk akaij ijia kuai, Am farif amur ja nafekva iji kege E Bomana God vajafno kuainma ijefuon bun ijeg ren. 24 Regavo madu bu vainva iji bu E Bomana ijefuon akai fu kuainma ijeg bu um nokarok (2) kege isuf barokuai vain.

25 Regavo ar Jerusarem ijia eof be if fuon Simion fu ijia fin. Fu e mukor ga fu Godon vuak mukor vierafeknum Godon unam ma ijia jamon. Regavo madu fuka e iji God fu kua fu e Isrerko* karaunia ruakno kuainma iji samuame fino ijin. Regavo Godon Kaven Akai iji fu fusik oinon. 26 Ijefuon Godon Kaven fu kua, Aiji a e iji God fu kuaga fu e Isrerko iji karauniak ruakno kuainma a iji game son guakno kuain. 27 Godon Kaven ijar Simion afeme sos ijia arume vakoga Jesuon eofijaf iji bun Jesu afeme izeg Godon Akai iji fu kuainma ijegrekuai ijia aru vain. 28 Simion fu uri imut fuon ijia am iji dabeme abe God oimardame ijeg kuardai,

E Bomana na guakva iji na oimarknum guaken. Ijefuon maiji nan e iji a kie fu e moikazan igia oinva iji karauniakfuon iji a kie na gakno kienma iji nan gain. Regavo fur e Jius bakin* ijiebuon sanainma ijin ga fu ruainma iji fur e Isrerkobuon if iji dab bomana rekno kuain.
33 Jesuon asoij ijiga asiefuon bu vuak irerag fok Simion fu am ijefuon kuaimon bu iji faiva buka oiserdiain. 34 E Simion fu daro miame uri asiefuon Meri kua, Am igi God fu kuamga fu ruainma ijin revo fur e Isrerko iji kege atasek. Ijefuon maiji fun oibuon bu vierafejo ijin kam atasega e roin bu fu abega fu bu karauniakfuon. Regavo roin bu fu uzavo iji bu koikbuon kege vajai fian manamik. Regavo fur Godon anf igeg rega e uruvana bu fuisina kuaikfuon. 35 Rega fur ise irerag buon bu isuar sauime vierafeoijo iji kege e uruvana ijiebuon nifak ijia samafrekfuon. Regavo rad oion bu kunaime jafega a oifian abekno kuain.

36 Regavo barak Godon vuak vierafene kuaimon* be bara Ana fu e Fanveron kabaij ga fu e Asan agan be. Fu baru fuon ijek juaivasia imut roin ga nikit nokarok (7) ijeg fine roke baru fuon fu guain. Bara iji fu baru fuon guakoga rad fu fi ruainma iji fu juaivasia uruvana eiti fo (84) barko fu barasren. Fu Godon ar* bu ijia arume sirimamejo iji fuba aren. Regavo fu nakik mazak fu duok karoknum Godon sirimamenon. 38 Areme Simion fu Meri ko Josof vuak kuardiamo ijia bara Ana fuk tavan besum ijia kekome Godon oimaren. Rega fu uri e uruvana Jerusarem ijia karine e iji God fu kuaga fu bu karauniakafa kuainma iji samuavo iji kuardiame kia, E iji no karaunuokfuon iji fun ruainmano kiain.

Josof ko Meri bun una Nasaret ruainva ijin

39 Areme Josof ko Meri bun E Bomana Godon akai fu kuainma ijeg bu ire fok reoine barme bun una ai Nasaret ar Gareri guf ijia vain. 40 Ijegrene am iji fun Godon daro ijekma bomanare revo fuon vierafenma iji fuka ma bomana rekoga Godon ma rediamon iji fun abe fu main.

Jesu fu Godon ar ijia aru vainma ijin

41 Juaivasia besubesum guf ijia Jesuon eofijaf bu Jerusarem ijia iro Fasova* iji ijo. Regavo iro iji bu ijo ijefuon maiji bu saifarif iji bu ar Ijift ijia vajai fian abeknum e ijiebuon ikreoijo ijia God fu karauniainma iji vierafejo. Ijefuon Jesu fu juaivasia tuer (12) ijeg barekoga eofijaf bu una iro iji ikuai vain. 43 Bu va iro iji ine barme e fok bun una ar buon ijia vako Jesu fu Jerusarem ijia fin. Regavo eofijaf bu Jesu fu vek Jerusarem ijia fiko bu ruainva iji buba vierafen. Bu vierafero kafu fu e uruvana ijiebuon kafar ijia oinoro naki besum barekoga bu uri ebuon ga kaifijaf bu oijo ijia fu nisain. 45 Bu nisaimoga fu bakiga bu nisaime una Jerusarem vain. Ijegreare tavan nokbek (3) barko ijia bu vaga fu Godon ar ijia arume Jius* e mamkanuk ijiena ijia fine vuak bu kuaivo iji faiknum duna kafokafo kuardiam. 47 Rega e uruvana ijia karinva bu vuak fuon ma iji fu vierafeknum kuaimon iji faiva buka oiseradiain. Rega eofijaf buk fu gavga buka oiserdiain. Ijefuon asiefuon fu uri kua, Farinu a irerafuon ijegreko no a nisaime oko noka oifiaduinmano kuain. 49 Bu ijeg kuardavga Jesu fu uri kia, Ja irerafuon na nisaidieoij? Naiji na asoinun ijefuon ar ijia ik fuon rekno kuainva iji jabe vierafenvano kiain? Jesu fu vuak ijeg eofijaf kuardiagavo eofijaf bu vuak fuon iji buba mukoi faime vierafen. 51 Rega Jesu fun uri una eofijaf ijiena Nasaret ijia kekome ire uruvana bu fu kuardavo iji igiain. Regavo Meri fu irerag uruvana Jerusarem ijia renma iji tavan uruvana fum oifuon ijia vierafen. 52 Regavo Jesu fu ofrenma iji fu fuon mukoi vierafeno ijekma ofren revo ire uruvana fu reoinma iji fu God abevo ema iji bu oimardiakfuon ijia reoin.

Copyright information for `NVM