Luke 3

Jon e do ruardiamo fu vuak abe kuardiaoinma ijin

(Metiu 3:1-12; Mak 1:1-8; Jon 1:19-28)

Juaivasia fiftin (15) abenma ijia e Taibirias fu Gaman bomana ren. Regavo tavan besum ijia e Fontias Fairet ijar e Judiabuon Gaman rekoga Erod fu e Gareriko samuagdiakoga uviaifuon Firif fu ar Ituria ko Trakonaitis iji samuagdiain. Regavo Risanias fu e Abirinko samuagdiain. Regavo Anas ko Kaiafas bu e Godon isuf baroijo ijiebuon e mamkanuk renva ijia e Zekaraian farif Jon fuk fu tavan besum ijia ai moikum namo ijia figa God fu Jon vuak kuardain. Ijefuon Jon fu kekome do Jodan ruvainma ijia oknum e iji vuak kuardiame kia, Ise jon arega una do ruaiga God fu ise jon giame arekno kiain. Regavo vuak iji Jon fu ijeg kuainma iji fun e Asaia* Godon vuak vierafene kuaimon ijar buk akaij ijia isoin. Fu isoime kuai,

Ebe fu ai moikum namo ijia fine kume, E Bomana ijefuon unam iji amardake fu ijia rokno kumen. Regavo ar amaramar iji nika amarega bu una ajie ruaf revo madu uruor ga nafar iji nika amarega bu una besum arir ref. Regavo unam giekin iji nika kara asume arir amarega unam ise iji amarigia amaref. Ijegrekin e iji bu God e iji fu kuaga fu e fok karauniakafa roko iji bu mukoi game vierafefno kumen.
Ijefuon e uruvana bu Jonon roga are fur do ruardiakafa bu iji ruain. Bu rokga Jon fu uri kia, E ise guri ka tabar igegreoijo gurie ja ise jon jaka ba aren. Ja vierafero na ja do ruardiaga* God fu e ise rejo iji fu kege arafiriakfuon iji jan amasuainvaro ja ijeg vierafek. Amur nika va unam ma ijesugin reoga e fok bu giame vierafero jan ise jon ja kegoijo iji jan arenvaro. Regavo jab kuaik noiji sainuvuon Eburamon* uifarifdo God fuba nuigafuokro ijeg jab kuaik. Regavo igia faif. Jaba ise jon arekva God fu e darokido fu mun guri kege una e Eburamon afijaf amardiaga bur ar jon abekno kiain. Jon fu ijeg kuardiame fun uri vuak be ijeg bijame kuardiain. Fu kia, E be fu mua uikin be abe in anej ijia samuain. Fun samuaido in iji bu sunin ba mukoi kirakma fu gireg gamia um mian jaken.

10 Jon fu vuak ijeg kuardiamga e uruvana bu uri kua, Ijefuon a vierafega no irerag abekno kuain? 11 Bu ijeg kuavga Jon fu una kia, E iji erar set nokarok (2) naoigakma ni be abe e be erar set bakin iji ma. Regavo erar fu duok ijo iji uruvanakma fuk nin duok fuon e roin ikvajiamne kiain. 12 Regavo e takes abeoijo roin bu do ruaikuai ruainvado bu uri Jon kua, E nijaidiamon revo noiji no irerag rekno kuain? 13 Bu ijeg kuavga Jon fu una kia, Ja takes abeokva jab mon kafo miji kareme roin joi karekno kiain. 14 Regavo madu e bijaivo roin bu uri Jon kua, Regavo noiji no izegrekno kuain? Bu ijeg kuavga fu una roin kia, Ja e kiaga bu mon vajiavo iji jab biesiaga bu mon uruvana vajiaga ja kafo joi kareknum vo jab una e roin vajiak. Regavo madu jab ik jon ja rene mon abejo ijefuon kuaime ziekno kiain.

15 Jon fu e uruvana ijeg kuardiamga bu vierafero Jon kafu e iji God fu imut bijame kuamga fu ruakro kuainma ijinro bu ijeg vierafen. 16 Regavo Jon fu kia, Naiji naim e ukakbe ijefuon na do ijia ja ruardiakfuon. Regavo e iji ka ma e darokin iji fu rad rok. Revo naiji na ik fuon fu rekreno iji rekva naka ba aresren. Ijefuon e ijar Godon Kaven iji mian igeg naino iji kege oijon ijia uniafdiak. 17 Regavo madu igia faif. Kof iji bu dis ijia useme do jia abesga sunuat iji fu una azan ijia ajiega bu kege usiakorevo. Rega ma iji bu dis dibuor ijia ariga bu karev. Unam besum ijeg e iji rad rokon iji fu ruakma fur e uruvana ijiebuon ise bu reoijo ijia giaknum ke atasek. Fu ijegrene e ma reoijo iji fu kege ar fuon ma ijia uniaga ise iji fu kege ar mian iji ijia naine vako ijia jaga buka vajai fian abekno kiain.

18 Jon fu ijeg kuardiame uri vuak ma iji kafokafo ijia e uruvana soisoigin kuardiain. Fu ijegrenki bu unam isema bu karioijo iji buka arega una oi karoikafa fu ijeg ren. 19 Ijegreare fu uri e Erodon izeg ise iji fu renma ijefuon vuak fuisina kuain. Ijefuon maiji Erod fu uviaifuon ijefuon bara Erodias aben revo madu fuka unam ise uruvana kafo ren. 20 Erod fu amur ijegren ga rad fu madu una kiamga bu Jon dab dibur unainva ijar fuka ma iseren.

Jon fu Jesu* abe do ruardainma ijin

(Metiu 3:13-17; Mak 1:9-11)

21 Ijegrene e uruvana bun do ruaime barekoga Jesu fuk do ruain. Regavo fu vek sirimameno ijia varur gufia vana fu irame vakoga Godon Kaven ijar um guaf igeg arime Jesuon ruain. Areme God fun varur gufia kume, Aiji a Farinun na oijmavo na a gavo naka bomana oimadienmano kumen.

Jesuon uifarif ijin

(Metiu 1:1-17)

23 Areme Jesu fu ofrene vake juaivasia teti (30) ijeg abega fu ijia anerene ik fuon iji ren. Regavo igi Jesuon saifarif iji bu Adamon* uifarif ijia anere ruainva ijin. Regavo e uruvana bu vierafe Jesu fu Josofon farif ga Josof fu e Erin farif ga Eri fu e Mataton farif ga Matat fu e Rivaion farif. Regavo Rivai fu e Merkin farif ga e Merki fu Janain farif ga Janai fu e Josofon farif ga Josof fu e Mataiason farif ga e Mataias fu e Emoson farif ga e Emos fu e Neamon farif ga Neam fu e Esrin farif ga e Esri fu e Nagain farif. Rega e Nagai fu e Maton farif ga e Mat fu e Mataiason farif ga e Mataias fu e Semeinon farif ga e Semein fu e Josekon farif ga e Josek fu e Jodan farif ga e Joda fu e Joananon farif ga e Joanan fu e Resan farif. Rega Resa fu e Zerubaberon farif ga e Zerubaber fu e Seatieron farif ga e Seatier fu e Nerin farif ga e Neri fu e Merkin farif ga e Merki fu e Adin farif ga e Adi fu e Kosamon farif ga e Kosam fu e Ermadamon farif ga e Ermadam fu e Eron farif. Regavo Er fu e Josuan farif ga e Josua fu e Eriesan farif ga e Eriesa fu e Jorimon farif ga e Jorim fu e Mataton farif ga e Matat fu e Rivain farif ga e Rivai fu e Simionon farif ga e Simion fu e Judan farif ga e Juda fu e Josofon farif ga e Josof fu e Jonamon farif. Regavo e Jonam fu e Eriakimon farif ga e Eriakim fu e Merian farif ga e Meria fu e Menan farif ga e Mena fu e Matatan farif ga e Matata fu e Netanon farif ga e Netan fu e Devidon farif. Regavo e Devid fu e Jesin farif ga e Jesi fu e Obedon farif ga e Obed fu e Boazon farif ga e Boaz fu e Sarmonon farif ga e Sarmon fu e Nasonon farif ga e Nason fu e Aminadabon farif ga e Aminadab fu e Adminon farif ga fu e Anin farif ga e Ani fu e Esronon farif. Rega e Esron fu e Ferezon farif ga e Ferez fu e Judan farif ga e Juda fu e Jekafon farif ga e Jekaf fu e Aisekon farif ga e Aisek fu e Eburamon farif ga e Eburam fu e Teran farif ga e Tera fu e Neoron farif ga e Neor fu e Serugon farif ga e Serug fu e Reun farif ga e Reu fu e Feregon farif ga e Fereg fu e Eban farif. Regavo e Eba fu e Seran farif ga e Sera fu e Keinanon farif ga e Keinan fu e Afaksadon farif ga Afaksad fu e Semon farif ga e Sem fu e Noan farif ga e Noa fu e Remekon farif ga e Remek fu e Metusaran farif. Rega e Metusara fu e Enokon farif ga e Enok fu e Jaredon farif ga e Jared fu e Marareron farif ga e Mararer fu e Keinanon farif ga e Keinan fu e Inoson farif. Regavo e Inos fu e Seton farif ga e Set fu e Adamon farif ga e Adam* fu Godon farif ijin. Ijefuon e agan bu ijeg uinvene ruain.

Copyright information for `NVM