Luke 7

Jesu e Romkobuon E Bomana ijefuon e ik fuon reno iji keunainma ijin

(Metiu 8:5-13)

Areme Jesu fun ire uruvana e iji kuardiame barme fun una uri ar Kafoniam ijia vain. Rega e Romkobuon e bomana ijefuon efuon ikreno be fu oijmamo iji fuka adam bomana abene fuka guakafa ijia fin. Ijefuon e Romkobuon e bomana iji fu faik Jesu fu Kafoniam ruainma faime fu uri e Jius e mamkanuk roin ijin kia, Va Jesu kuaga fu ro enun ikreno igi amarega fu una maimno kiama bu vain. E Jius ijiebuon e mamkanuk iji bun vake Jesu fino ijia usen. Bu useme soisoigin igia kua, E Romkobuon e bomana iji fuka e nuvuon iji oijmamo ga fuka fuonkua nuvuifuon ar iji e bu ijia afuime vuak kuaivo iji samduin. Ijefuon no vierafega a va fu ifejdakno kuain.

Ijefuon Jesu fun buna vake e bomana ijefuon ar iji samairenma ijia e bomana iji fun kaifijaf kiama bu Jesu kuakuai ruain. Bu ro useme Jesu kuai, No E bomana nuvuon iji fu kume naba aresredo ab ar nun igia ruak. Regavo madu na koiknun vuakva na maturainva bakin ijefuon nin vuak nijiega enun ikreno igi fu maimno kumen. Regavo madu fu kume, Nak na enun mamkanuk ijiebuon rotit ijia ikrej. Rega madu na enun bijaivo iji roin kareva bu rotit nun ijia ikrej. Ijefuon na e be kua ro kuavo iji fu rok. Regavo na una madu be kua vakne kuavo iji fu vak. Regavo na madu enun ba mon fuon ikreno iji be kua ire igi rene kuavo iji fu reno kumen.

E iji vuak abe ruainva iji bu vuak ijeg Jesu kuardavga fu vuak iji faima fuka oiseren. Fu oiseremga fu una dakaroim e uruvana fu ja vako iji kia, Na ar Isrer guf igia e kafo bu e igi fu ma vierafenma ijekin naka ba giainvano kiain. 10 Fu ijeg kuardiako e iji vuak abe ruainva iji bun una va e Romkobuon e bomana ijefuon ar ijia useme gak e iji adam abenma iji fun una main.

Jesu bara amun ijefuon farif iji guainma iji kuama fu una urinma ijin

11 Areme tavan ukakbe barko rad Jesu fun e vuak fuon faivo ijigam e uruvana roin ijiena uri mai Nein kuavo ijia vain. 12 Fu vake mai bomana iji bu karinva vien ijia kekoin. Fu ik ijia kekme ga bu e guainma iji abe useme mako rukuai rok. Rega e iji guainma iji fu bara amun be ijia fino ijefuon farifuon besum ijar. Ijefuon e uruvana mai bomana guf ijia karinva iji bu funa ijia usem rok. 13 Bu usem rokga Jesu fu bara amun iji gama fuka bomana oifiaimga fu uri kua, A niraimo iji aremne kuain. 14 Fu ijeg kuame fun va mavua iji bu e guainma iji abe ijia abesme roko iji kunaime e iji mavua iji abe roko iji bu arega ijia iren. Bu ijia irekoga Jesu fu uri kua, E nivek ige nar kuavno urine kuain. 15 Fu ijeg kuamga e iji guainma iji fu una uri fine vua kuaimga Jesu fu abe una asiefuon unafdain.

16 Areme e uruvana bu unam sumakin iji Jesu fu renma iji gava buka bomana oiserdiame ka dejufdiain. Ijefuon bu uri Godon bomana oimarme kuai. E Bomana iji Godon vuak vierafene kuaimon iji fun iga ruainmano kuain. Rega madu e roin bu uri kua, God fun e fuon igi karauniakafa ruainmano kuain. 17 Jesu fu unam sumakin iji rega e bu vuak iji dab e ar iror ijia karioinva ijia kuaime bomana re vain.

E Jon e do ruardiafo ijefuon vuak abe ruainva ijin

(Metiu 11:2-19)

18 Areme e Jonon vuak faivo iji bun uri ire uruvana Jesu fu renma ijin Jon kuardain. Bu kuardavga fu uri e nokarok (2) kiama bu roga fu kia, Ni va e gafi kuaga fun ma e iji fu ruakno kuainva ijar vo fu bano kiaga no una e be samuavno kiain. Jon fu ijeg kuardiamga bun vake Jesu fino ijia useme kua, Jon e bomana nuvuon e do ruardiafo iji fu kuo, Va a kuaga aiji a e iji God fu kua fu ruakno kuainma iji vo a bakma noba una e be samuakno kuain?

21 Regavo tavan ijia Jesu fu e adam abenva iji karauniaknum e iji kaven ise* ninarukiainva iji kiaga bu useme vaknum ga e ni zuriaigin iji kiaga bu una ni narav. 22 Fu ijegreoinon ijia fu uri e Jonon vuak abe vainva iji kia, Ni una va Jon irerag ja ni jon ijia giaknum fainva ijin kuardaf. Va kuardame kua, E ni zuriaigin iji bun una ni narako e aikirariainva iji buk bun una uri oijno kuaf. Regavo madu e iji bu adam refrosi abenva iji bun una madiav revo e ada bijukuriainma iji bun una faiv ga e aoinva iji bun una urij. Rega vuak ma iji bun abe e isema karioijo iji kuardiavno kuaf. 23 Regavo erar fu ire igi na reoijo iji fu faime ba oi kafokafo vierafega fum na ma vierafeno e iji fuka oimarmne kiain.

24 Fu ijeg kuardiamga e Jonon vuak abe ruainva iji bun una vakoga rad Jesu fu uri Jonon vuak iji dab e uruvana ruainva iji kuardiain. Fu kuardiame kia, Tavan iji Jon fu ai moikum namo ijia fikoga ja useme fuon vainva iji ja irerag iji ijia gakuai vierafene usem vain? Jakafu e zazaikin be fu buibur asif abeno igekin ja iji gakuai vain. Ki ja irerag iji gakuai vainva ni kuardie na faiv. Regavo baga na vierafe jakafu ja e iji bu sinuom zarainva ugon ka mukor same ijia oijo ja iji giakuai vierafene vain. Iji fuka bakin gavo e ijeg ugon mukor savo iji bu e mamkanuk moik samuavo ijiebuon ar ma ijia karij. 26 Regavo ja vainva iji ja irerag iji ijia gakuai vain? Ja e Godon vuak vierafene kuaimon ja iji gakuai ki ja era gakuai usem vain? Ni kuardie na fai. Naka ma kuardiav, E iji ja gakuai vainva iji fu ma e Godon vuak vierafene kuaimon be. E iji fuka ma e aduigin fur e Godon vuak vierafene kuaivo iji fur asidiain. Regavo Godon buk akaij iji bu usuibe isoime kuainva iji bu fuifuon kuain. Regavo vuak bu isoinva ijia God fu ijeg kuai,

Na e vuak nun abe oinon be kuaga fu amur vak. Fur amur unam jon iji amarme vakno kuain.
28 Regavo vuak igi naka ma kuardiav. E mamkanuk iji roin bu ur kari ruainva iji bu e Jon e do ruardiamo ijekin bakin. Regavo e Jon fur fuka ma e ikin ga fur bu asidiain. Regavo Godon e iji fu oijbuon iji samuagdiafo ijiebuon uf ijia e be erar una e ukakbe reno e ijar fu Jon asime ka e ikin rekno kiain. 29 Fu ijeg kuardiamga e uruvana abevo e takes abeoijo iji bu vuak iji fain. Bu faime vierafega Godon unam ma iji ijia kekfuon iji fuka maga bu ijeg vierafen. Ijefuon bu Jonon vuak iji igame fuon rokga fur aferdiame do ruardiain. 30 Regavo e Ferisis* iji ga e roin vuak akai nijaidiavo iji bu Godon ma iji fu buifuon vierafenma iji buka uzame ba Jonon rokga fu do ruardiain.

31 Jesu fu ijeg kuardiame kia, Na e igi bu unam ma iji uzamoknum vo madu unam buon bu kegoijo ijiebuon nar bijame kuaikno ni faif. 32 E iji bu God uzavo iji bu am ukaknak iji bu va ar iji bu ire kimejo ijia useme ata roinroin rene karijo ijekin. Am roin bu uri una roin kume, No joifuon zaij vajaga jaba dua uruv. Regavo roin bu uri kume, No joifuon sise bijadiaga jaba niraivno kumejo bu ijekin. 33 Ijegvo Jon e do ruardiamo fu ruainma iji fu tavan kafo duok karoknum ga do kugin iji fuba ioin. Fu ijegreoga ja kuai fu kaven ise ijar fusik oinon kuain. 34 Ijegvo Ema ijiebuon Farif igi na ruainva iji na unam besum ijeg duok iknum do vuain ioijga ja kuai, E iji gaf. Fu duok uruvana iknum do vuain uruvana ioinon kuain. Regavo ja madu kuai fuka e takes abeoijo ijiga e ise ijiena kaireoino kuain. 35 Regavo igia fai. E ma vierafejo iji bu Jon ik irerag fu renma ga na reoinva iji bun giame vierafen. Bu vierafero God irerag fu vierafene reno iji fun mukorigia renoro bu ijeg vierafejno kiain.

Jesu fu bara iji ise uruvana reoinon ijefuon ise iji game arenma ijin

36 Jesu fu ijeg kuardiame barekoga e Ferisi be fu uri Jesu kuama fu fusik ar fuon ijia duok ikafa vain. Jesu fun va ar fuon ijia kekome duok ikafa ari fin. 37 Rega bara mai ijekor be ijia fino iji fuka ise uruvana reoinon. Ijefuon fu faik Jesu fu e Ferisi ijefuon ar ijia duok ikafa ruainma faime fun uri saror bu do jiavo iji abe ire udi mukor urino iji abe ijia useme abe ijia ruain. 38 Fu abe keko Jesuon nuon iji diak fu korenma ijia manine niraiko nido fuon ijar Jesuon diak azan ijia arin. Fu ijegrene uri nigen jau fuon ijia fidame fun uri diak iji kam irkuardiame uri do iji udi mukor urino iji abe ijia usemdain. 39 Rega e Ferisi iji Jesu kuama fu fusik duok ikafa vainma iji fu bara iji irerag fu reno iji gain. Fu game uri fui kuai, E igi fu ma e Godon vuak vierafene kuaimon ijarkma fu bara iji fu izekin ijar fu niriamo iji fu vierafekno kuain. Regavo madu bara iji fu unam ise izekin kegoino iji fu vierafekno kuain.

40 Ijegreare Jesu fun uri kua, Saimon na vuak be kuardakno ni faimne kuain. Fu ijeg kuardamga Saimon fu uri kua, E nijaidiamon nin kuardiemne kuain. 41 Fu ijeg kuardamga Jesu fu uri vuak be ijeg bijame Saimon kuardain. Fu kua, E nokarok (2) bu e sinuom uruvana renma iji monfuon kuavga fu e be mon ukakbe maga be fuka mon bomana main. Rega bu mon fuon iji una vajakuai vierafe gavo buba aresrenva ijefuon fu kiama bu ijia aren. Bu ijegrenva ijia a vierafega e nokarok (2) iji e izar fu e sinuom uruvana renma iji fuon ma bomana oimaremno kuain?

43 Jesu fu ijeg kuardamga Saimon fu uri kua, Na vierafega e iji fu mon bomana abenma ijarno kuain. Fu ijeg kuardamga Jesu fu una kua, Iji a ma kuainmano kuain. 44 Areme fu dakaroim una bara iji gavknum Saimon kua, A bara igi abe gain? Na ar on igia ajie rokga aba diak tat nun iji do somdien. Regavo fu bara igar nido fuon ijia diak tat nun somdieme nigen jau fuon ijia fidien. 45 Regavo madu aba na oimardieme na irkuardien. Regavo fu bara igar na rokga fur ba arega fuka uri dia tat nun iji kam irkuardiain. Regavo madu aba nigen jau nun ijefuon ire udi mukor urino iji abe azirdien. Regavo fur ire iji ka udi mukor urino iji abe diak tat nun igi somdien. Ijefuon na gaga fuon oijmiemo iji fuka ma bomana ijefuon maiji ise fuon uruvana fu keoinma iji nan game aren. Regavo e be erar ise fuon fu reoinon iji na sibank giame arenva iji fuon oijmiemo iji fuim ma ukakbeno kuain.

48 Jesu fu ijeg kuardiame uri bara iji kua, Ise on iji nan giame arenvano kuain. 49 Regavo e kafo fata irif ijia karioinva ijieb uri kua, E iji fu God aikido fu e kafobuon ise giame aremno kuain. 50 Regavo Jesu fu uri bara iji kua, On a ma vierafeno ijar a keunainma ijefuon aib una ijin bomana vierafegavo ni dazme vakne kuain.

Copyright information for `NVM