Mark 15

Bu Jesu afeme Faireton vainva ijin

(Metiu 27:1-2,11-14; Ruk 23:1-5; Jon 18:28-38)

Areme tavan ik abaisamo ijia e isuf baroijo ijiebuon e mamkanuk ijigam e Jiusbuon e mamkanuk ijigam e vuak akai nijaidiavo ijigam e mamkanuk kot faivo iji bun vuak izeg bu Jesu kana fu guakfuon iji kuaime abe maren. Bu Jesu kunaime dab tome afem una usem Faireton vain. Areme Fairet fu uri Jesu kua, A vierafega aiji an ma e Jiusbuon Kin ijino kuain. Rega Jesu fu uri una roin kua, Ke vuak iji a kuaimon iji an ma kuaim. Fu ijeg kuardiamga e isuf baroijo ijiebuon e mamkanuk iji bu uri vuak ise fuisina uruvana kuain. Ijefuon Fairet fu madu uri Jesu kua, Buka vuak ise uruvana oisina kuaiv gavo abe una roin kuardiak? Rega Jesu fuba una vuak ijefuon roib kuardakafa vierafega Fairet fu iji gama fuka oiseren.

Regavo juaivasia besubesum ijia iro Fasova iji bu ijo ijia e Romkobuon e bomana iji fu e aiko bu dibur ijia era bu vierafene kuavo fu ijin kiaga bu usem vako. Regavo e roin bu e Romko ijiena bijaime e roin kaniainva iji bu dibur ijia karij. Regavo e iji dibur karijo ijia e be if fuon iji Barabas. Ijefuon e uruvana ijia afuinva iji bun uri va Fairet fu juaivasia besubesum ijia izegreno ijin kuardain. Bu ijeg kuardavga Fairet fun uri kume, Ja vierafega na Jesu e Isrerkobuon Kin iji keunaga fu vakno kumen? Regavo Fairet fun vierafega bu Jesu oisema vierafene funa nigaraioijo ijefuon bu fu afeme fuon ruain.

11 Regavo e isuf baroijo ijiebuon e mamkanuk iji bu uri e uruvana soisoi kuardiame kia, Jaka e Romkobuon e bomana iji kua no vierafe a e Barabas keunaga fu vakno kuaf. 12 Bu ijeg kuavga Fairet fu una madu uri kia, Regavo ja e guri ja kume fu e Jiusbuon Kin no kumenva iji fuiji na abe izeg rek? 13 Fu ijeg kiamga bu kume, Abe kuros kanafno kumen. Rega Fairet fu una kia, E igi fu ise irerag iji renma ijefuon ja abe kuros kanakrejno kiain. Rega buka uri uruvana igia biumame kume, Abe kuros kanafno kumen. 15 Rega Fairet fu vierafe fu irerag e uruvana oimardiakfuon ijia rek. Ijefuon fu Barabas buifuon kuama fu vakoga fu uri e azikeoijo iji kiamga bu Jesu dab fijame afem usem abe kuros kanakuai vain.

E azikeoijo bu Jesu dab varaimenva ijin

(Metiu 27:27-31; Jon 19:2-3)

16 Areme e azikeoijo iji bun uri Jesu afeme dab usem una Faireton ar mai makaf bu kua Faitoriamno kuavo ijia ruain. Areme bu uri e azikeoijo uruvana kumejga bu besum afuin. 17 Bu besum afuime uri ugon jaraikin kavuan iji dab abesdame uri kiej ufu abe atevene dab Jesuon nigen ijia abesdain. Areme bu uri kua, Aiji a e Jiusbuon Kin bomana ijefuon no if on abe ajiev! 19 Bu ijegrene uri guduar dab nigen ijia kukma kanaknum juvit foimadime ato same kurituamajain. 20 Bun dab varaimene barme uri ugon kavuan bu abe abesdainva iji kunaim darumdame una ugon ma fuon iji kege samdain. Areme bun afeme usem kuros kanakuai vain.

Bu Jesu abe kuros kanainva ijin

(Metiu 27:32-44; Ruk 23:26-43; Jon 19:17-27)

21 Bu Jesu afeme unam ijia vako ijia bu Saimon e Sairinko iji fu ar fuon areme una Jerusarem roko iji bieme kuriairevga fu Jesuon kuros iji abe dabe vain. (Regavo e Saimon fu Areksedako Rufasbuon asoij). 22 Fun kuros iji abe dabemga bun afeme roke ar Gorgota kuaivo ijia usen. (Rega if Gorgota ijefuon maiji uruor iji fu e nigen an igekin.) 23 Bu ar ijia useme uri do vuain iji abe inak kugi kafo amarme abe maga fu inkin fuba vajai fian abekro bu ijeg ren gavo fuba in.

24 Areme e azikeoijo bun uri Jesu dab kuros kaname uri Jesuon ugon iji kam name kas dab akozga are erar kega bu gakuai ijefuon bu ijeg ren. 25 Regavo veni iji fun ajie kaf garia ruainma ijia bu Jesu abe kuros kanain. 26 Regavo vuak iji bu fuisina kuaime isoinva iji bu ijeg isoi, E igi fu e Jiusbuon Kin ijino kuain. 27 Regavo madu bu e niekin nokarok (2) kege Jesuna kuros kaniain. Be bu abe ij maink ijia kanaga be bu abe ij azinak ijia kanain. 28 Bu ijegrejga vuak iji bu usuibe buk akaij ijia isoime kuai, Fuiji bu abe e ise reoijo ijiena kamainvano kuainva iji fuka ijekma aresren.

29 Regavo e roin bu unam iji bu Jesu abe kuros kanainva samaij ijefuon roko. Ijefuon bu usem game nigen kativknum dab varaimene kuain. E gare ar kuaim a Godon ar bu sirimamejo iji bujame vo naki nokbek (3) una same barekno kuain. Ijefuon ni koikon keunanami kuros iji areme una ari roga no gavno kuain. 31 Unam besum ijeg e iji isuf baroijo ijiebuon e mamkanuk ijigam e vuak akai nijaidiavo ijieb buon afuime Jesu dab ijeg varaimene kuai, Fu e roin karauniain gavo fu koikfuon keunanamikfuon iji fuka ba aresrenmano kuain. 32 Regavo bu madu kuai, Ni arekega e gari God kuamga fu ari ruainma iji ga E Isrerkobuon Kin iji fu kuros ijia ari roga no game ma vierafejno kuain. Regavo e niekin nokarok (2) iji bu ke funa kuros kaniainva iji buk bu unam besum ijeg una Jesusina vuak ise kuain.

Jesu fu guainma ijin

(Metiu 27:45-56; Ruk 23:44-49; Jon 19:28-30)

33 Bu ijegrene roke tavan uk maniko ijia vana utime okoga ar fok fuka ve naki vake tavan ura gura manin. Fu gura manino ijia Jesu fuka uruvana igia biumame kume, Irai Irai rama sabatanino kumen. (Regavo vuak ijefuon maiji God nun God nun a irerafuon na unieko vain). 35 Fu ijeg kumega e kafo ijia irenva iji bu iji faime kuai, Iji fu e Eraija kumeno kuain. 36 Regavo e be fu una kukum keko atebu abe in buin ijia bijame abe do vuain ijia abesme abe Jesuon ir ijia aziga are fu iga fu gakafa. Areme fu uri kua, Ni arekega Eraija fu ro fu keunaga no gavno kuain.

37 Fu ijeg kuaikoga Jesu fu una uruvana igia biumame arekoga kaven fuon fu ijia uname vakoga fu guain.

38 Fu guako ijia ugon iji bu abe ar bu sirimamejo guf ijia arume kirainva iji fu dab uf ijia bujame ari roke buin gumia kekoin. 39 Rega e azikeoijo ijiebuon e bomana iji fu ijia manine Jesu nikajamo iji fu Jesu fu kumeno iji faimevo izeg fu guainma iji game kuai, E guri fuka ma Godon Farifno kuain. 40 Regavo bara uruvana bu aibe gafia ireme giav. Regavo bara iji ruainva iji bara Meri Megdarinko ga bara Sarom ga bara Meri e Jeims e ukak ijiga Josof buon asie ijieb ijia ruain. 41 Regavo bara ijieb amur gamia Gareri Jesu jame oijknum samuaoin. Regavo madu buka bara uruvana gamia Jerusarem jame ruainva iji bu ijia buna iren.

Jesu bu abe mako ruinva ijin

(Metiu 27:57-61; Ruk 23:50-56; Jon 19:38-42)

42 Areme fun tavan nakikreno ijia e Josof e Arimatiako iji fu ruain. E iji fu e ikin be ga fu e Jiusbuon e mamkanuk ijiena fino. Regavo madu fuka tavan iji God fu una efuon ijiebuon oij iji samuagdiakfuon iji samuaoino ijin. Regavo nakifuon iji bu tavan Sabat (Satade) iji bu isuar karine God sirimamejo ijefuon duok kanaufuvo. Ijefuon Josof fu Jesuon vajat surif jafe arikafa fun zinunba Fairet kuakafa vain. 44 Regavo Fairet fu Jesu fu guainma iji faime fuka ba ma vierafen ijefuon fu e azikeoijo ijiebuon e bomana iji kumena fu rokga fu kua Jesu fube ma guainmano kuain? 45 Fu ijeg kuamga e iji fu kua, Ke Jesu fun ma guainmano kuain. Ijefuon Fairet fu Josof kua, Ni va Jesuon surif jafe arimne kuain. 46 Fu ijeg kuardamga Josof fu va Jesuon surif kunaim jafene ugon iviamkor ijia abe utin. Areme fu abe va munuag be bu kajuame amarenva ijia unain. Fu abe ijia uname uri mun bomana be mako vien ijia namo iji vaja dab vien iji bijukurain. 47 Regavo bara Meri ar Megdarinko ijiga Meri e Josofon asie ijieb Jesu bu abe unainva iji gain.

Copyright information for `NVM