Mark 7

Jesu fu ema ijiebuon akaij ijefuon fu ju kuardiainma ijin

(Metiu 15:1-9)

Tavan be e Ferisis* iji ga e iji vuak akai nijaidiavo* roin bu Jerusarem ijia ruainva iji bu va Jesu fino ijia kari ameoine aren. Bu ijia kariknum giak e Jesuon vuak faivo* roin buba imut do soin revo bum duok ij. Bu unam e Ferisis bu imut do some duok ijo ijeg buba rej. Usuibe saifijaf bu duok ikrejo bu imut do sovo ijefuon e Ferisis ijigam e Jius* iji bu madu buka ijeg rejo. Regavo ire be bu rejo iji bu va duok kimene una roko iji buka imut do so vo ire iji karme do some ijiason duok ijo. Regavo madu bu unam besum ijeg kafus ga firet ga saror iji do sovo. Regavo unam iji bu rejo iji bu saifijaf ijieb ijegrenva ijefuon bu madu bu ijeg rej.

Ijefuon e Ferisis ijigam e vuak akai nijaidiavo iji bu uri Jesu kua, E vuak on faivo iji bu irerafuon ba saifnuvuon ijiebuon akaij ijia jajiame revo bum imut muigma duok ijno kuain. Bu ijeg kuavga Jesu fu una roin kia, E guri ka i kufuikin gurie amur e Asaia buk kafarbe ijia vuak be fu joifuon kuainma iji fuka ma kuain. Regavo vuak iji bu ijeg isoin,

E iji bum ir ijia kuai no God aroivo kuaigavo bu oibuon ijekma aroivo bakin. Regavo madu bu sirimamene na vierafeoijo iji maiji fuka bakin. Ijefuon maiji bu Godon akaij iji e nijaidiavo bakigavo bum ema ijiebuon akaij iji kege e nijaidiavno kuain.
Jesu fu ijeg kuardiame uri kia, Ja God akaij iji fu nainma iji jan areme uri ema ijiebuon akaij iji kege e nijaidiavno kiain. Areme fu kia, Ja ijegreoknum ja Godon akaij iji ja izeg jakva iji jaka amarigia vierafen. Regavo jaka vuak iji bu ema ijieb vierafene amarenva iji ke nijainamime ijesugin vierafeoij. 10 Ijefuon maiji e Mosis* fu akai fuon fu isoinma ijia fu kuai, Asoion ijiga asieon iji mukor igiaf. Regavo madu erar fu asiefuon ga asoifuon iji vuak ise kafo buisina kuardiakma e iji nika kana fu guamne kuain. 11 Regavo jar nijaidiavo iji ja kuai, E be fu mon fuon fu ire kime eofijaf vajiakafa nainma iji fuka aremne kuain. Ijefuon maiji mon iji fun amur kuai fu kege God vajakno kuain. Ja ijeg kuaimoijo ijia jaka izeg fu asie vo asoifuon iji ifejdakma ijia jaka kuriairev. 13 Regavo madu saifjon ijiebuon unam iji ja kege ijeg e nijaidiaoijo ijar fu Godon vuak ijek nibijaim. Regavo madu jaka ire kafo ijekin uruvana rejno kiain.

Irerag ijar e ijiebuon oij iji kam muimiamo ijin

(Metiu 15:10-20)

14 Fu ijeg kuardiame fun uri e fok kumega bu samaij ijia rokga fu kia, E fok ni na fadieke na vuak igi kuardiaga amarigia faif. E iji fu oine duok ino iji fu duok ijar fu abe Godon nifak ijia e ise reno bakin. Regavo fun vuak irerag ise fu oifuon ijia vierafene kuaimoino ijar e iji fuka Godon nifak ijia fuba mukoi reoin. 16 Ijefuon ja adakiga ni vuak igi na kuardiavo iji amarigia faifno kiain.

17 Areme Jesu fun e iji afuim karinva iji areme ar guf ijia aru vakga e vuak fuon faivo iji bu uri kua, Ni vuak iji a bijame kuarduinma ijefuon ma iji kuarduomne kuain. 18 Bu ijeg kuavga fu kia, E fok buka non giaga ja e vuak nun faivo iji jak jaka non giain. E be fu ire be abe ikma fu ire ijar fu dab ise rekma bakin. Regavo ire iji fu ino iji fu oifuon guf ijia arivakma bakin. Regavo fum defok ijia arime una vajai fuon ijia keko vak. (Regavo Jesu vuak ijeg fu kuainma iji duok fok no ijo iji fu iseno kuainma bakin revo buka ma ijesugin).

20 Jesu fu ijeg kuardiame una madu kia, E iji vuak irerag fu oifuon ijia vierafeno iji fu ir ijia kuaimon. Ijefuon ijar e iji fu Godon nifak ijia fuka ba mukoi kegoin. 21 Ijefuon maiji e iji fu ire ise kafokafo fu oifuon ijia vierafenon. Ijefuon fun ise iji fu oifuon guf ijia vierafeno ijar urino ijefuon fun va ire ise kafokafo ren. Regavo ire ise iji barubara oijo ijigam e kaniavo ijigam ebuon bara turavo ijin. Regavo madu sinuom uruvana kekafa vierafeno ijigam kai roin oij isema vierafejo ijigam vuak kufuimejo ijigam ise reoknum ba juf abejo ijin. Regavo madu e kafobuon sinuom karekuai vierafejo ijigam e kafobuon vuak ise kuaivo ijigam aroikaravo ijigam unam ise e ba juf abejo ijia kegoijo ijin. Ire ise ijekin ijieb e ijefuon oij ijia useko fu va ise reoino kiain.

Bara ijin ma vierafenma ijin

(Metiu 15:21-28)

24 Jesu fu ijeg kuardiame fun uri vake ai Taia samaij ijia kekoin. Fu ijia kekome gire be ijia ajie sauikafa vierafen gavo e roin bu fu izia fino iji bun vierafen. 25 Rega bara be fu kabaifuon kaven ise ijar niroinma ijefuon fu Jesu ruainma iji fain. Ijefuon fun vake fu fino ijia keko nifak fuon ijia ato sain. 26 Regavo bara iji fu bara Grik rega bu fu ar Siriafonisia ijia nafen. Bara iji fu keko ato same Jesu soisoime kua, Ni kaven ise igi kuaga fu kabainun igi areme keko vakne kuain. 27 Regavo e Jius iji bu vierafero bu buonkua Godon e revo e kafo bum siroij igekinro bu ijeg vierafen. Ijefuon Jesu fu uri kuai, No amur am ijiebuon duok iji vajiame rad noson siroij iji vajiak. Regavo am ijiebuon duok iji no amur ke siroij iji vajiakva fuba marek. 28 Regavo bara iji fu magaga kua, Vuak iji aka ma kuaim. Regavo siroij iji bu vek am ijiebuon duok ukur iji buka ikno kuain. 29 Fu ijeg kuamga Jesu fu kua, Iji a ma kuardiem ijefuon ni vakgavo kaven ise iji fu kabaion iji fun areme vainmano kuain. 30 Jesu fu ijeg kuamga bara iji fu una va ai fuon gafia kekome gak am iji fun ninain. Ijefuon maiji kaven ise iji fun am iji areme keko vain.

Jesu e ada bijuinma iji keunainma ijin

31 Areme Jesu fu ar Taia samaij ijia fioine areme fun vake ar Saidon asime vake do Gareri Dekaforisi guf ijia kekoin. 32 Fu ijia kekomga e roin bu uri e ada bijukurainma vuak ba kuaimo iji afeme ro Jesu fino ijia usem soisoime kuaga fu e iji imut nigen abedekuai ruain. 33 Ijefuon Jesu fun fuonkua e iji afeme va e iji ni sauikuriame imut fuon ijia e ijefuon ada ijia uniame juvit foine imut fuon ijia azime e ijefuon miane ijia kunain. 34 Areme fun gafeg varur ijia nisaiknum oij foine kua, Efafatano kuain. (Regavo vuak ijefuon maiji nin ada ira vo ir ako).

35 Jesu fu ijeg kuamga fun ada fuon ijia faime fun uri anere vuak kuain. 36 Areme Jesu fu uri e fok uruvana igia kuriaireme kia, Ire igi na renva iji jab e kafo kuardiakno kiain. Regavo e iji buka magaga uri e roin kuardiain. 37 Bu kuardiavga e fok bu vuak iji faiva buka oiserdiamga bu kuai, E iji ire uruvana fuka amarigia reoin. Regavo madu fuka e ada bijukuriainma iji kiaga bu una vuak faiknum vo e vua ba kuaivo iji kiaga bu una vuak kuaivno kuain.

Copyright information for `NVM