Philippians 4

For fu e Firifaiko bu izeg besum afuim karikfuon kuardiainma ijin

Ijefuon efnun na tavan bog ja oijmiavo ijefuon naka una ja giakro vierafen. Regavo naka unam jon izeg ja mukoi kegoijo ijefuon ka aroikaraknum jon oimarev. Ijefuon nika oi besum rene jon izeg ja God ma vierafejo ijia giriesame karif.

Regavo bara Euodia ko Sintiki e-e iji ja jon nigaraivo iji nika aref. Ja josik ja God besum iji ma vierafejo ijefuon ni una besum oimarknum afuime karif. Regavo madu e kainun be fu nuibakin nosik besum ikreno iji na vierafe fu va bara iji nigaraivo iji ifejdiak. Ijefuon maiji bara iji bu darokma ifejdieme nana Godon vuak ma iji abe e roin kuardiain. Regavo madu e Kiremet ga e roin nana darokma ikreoinva iji buk Godon vuak ma iji abe e roin kuardiaoin. Ijefuon if buon iji bun Godon buk bu e if iji bu rad una ijia karivakfuon isoinva ijia isoin.

Regavo tavan bog nika E Bomana jon ja ma vierafejo ijefuon oimaref. Regavo na madu una kia nika E Bomana ijefuon oimaref! Regavo madu unam izeg mukoi oi mafaime kegoijo ijin ijegreoga e bu giaf. Ijefuon maiji E Bomana fun una ruakreno ijefuon iji vierafef. Regavo jab uri afikin kafo bu jon roko iji uruvana vierafekgavo nin jon ja sirimamejo ijia God irerag ja vierafenva iji kuardaf. Regavo ja sirimamejo ijia jaka tavan bog ire ma iji fu rediamo ijefuon oimardaf. Ja ijegrekva Godon afuimo ka ma mukor ema bu vierafejo iji ma asidiainma ijar oijon ja vierafejo iji samuagdiak. Regavo ja oifian abekva fuon afuimo ijar ifejdiaga ja dasu karik. Ijefuon maiji ja Jesu Kurais ma darokma vierafej.

Vuak radkma iji kaifnun ja God ma vierafejo iji na ja kuardiakfuon iji nika unam ma ijesugin vierafe ga unam iji God oimaikfuon ijesugin ref. Regavo ire iji ja vierafejo iji vuak ma ijesugin vierafe ga ire iji ja nidosiavo ijiga ire maturainva ijesugin vierafef. Regavo barubara iserejo iji jab vierafejo vo ni unam e bu oimardiakfuon ga oimarkfuon ijesugin vierafef. Ire iji na ir nun ijia nijaidiava ja fainva ijiga ire iji na reja ja gienva iji kege mimataf. Ja ire iji kege mimatakva God fu tavan bog ja ifejdiame samuagdiaga ja afuime karik.

For fu e Firifaikobuon oimarenma ijin

10 Na E Bomana ijefuon bomana oimarev ijefuon maiji iviakma ja mimatame mon nijienva ijar nijaidiemon ja vek na vierafej. Regavo ja na vierafejo iji jaba rubdiav revo ja nijaidiekrega fu unam baga ja ijia aren. 11 Regavo vuak igi na kuardiavo iji ja na ifejdiekfuon na ijefuon kuardiavo bakin. Regavo na vierafega irerag na rejo iji fun aresren. 12 Na unam vasiakma oijo ga duok iknum oijo iji nan vierafen. Ijefuon ar kafokafo ijia vo tavan ise duok bakin ga tavan ma duok zaraimo iji na vek oimarknum oij. 13 Ijefuon na Jesu Kuraison daro ijia ire ma ga ire ise iji nun roko iji na oimarknum biediame vak.

14 Regavo ja afin nun iji ifejdienva iji fuka bomana maren. 15 Ja e mai Firifai ijia karinva iji jan vierafen. Na amur ijia Godon vuak ma iji abe nijaidiame ai Mesedonia areme vakga e sos roin buba ifejdien revo jar jonkua ja nana ikrene mon kafo jam roigin na vajien. 16 Regavo na vek ai Mesedonia guf mai Tesaronaika ijia finva ijia ja mon kafo kukma efkin nijieme ifejdien. 17 Iji ja ifejdienva na kuaivo iji jar ire kafo madu roigin nijiekafa na kuaivo bakin. Regavo na vierafe ja ire kafo roigin vajievo ijia ja Godon daro iji abekfuon.

18 Ire fok ja nijienva iji nan kein ijefuon ja iji vierafekfuon. Iviakma ire fok na vierafenva iji nan uruvana ken ijefuon maiji e Ifafrodaitas fu ire fok ja nijienva iji fur kege rokga nan kein. Revo ire iji ja renva iji fuka isuf ma iji fu udi uriga God fu oimaikfuon ja ijin ren. 19 Regavo God nun ijar Jesu Kuraison duadok ijia ire fuon ma iji varur gufia naoivo ijia ire izieb bu ja ifejdiakfuon fu ijin kege vajiaga ja ire kafo jaba vierafekfuon. 20 Regavo na vierafe e fok bu tavan bog God Asoinuvuon iji aroikfuon. Mare.

Foron vuak radkma iji fu anadiainma ijin

21 Regavo na God ko Jesu Kuraisbuon e fok iji bu anadiav. Regavo madu e uviaifnun God ma vierafejo igia karinva iji buk bu ja anadiav. 22 E fok God ma vierafejo igia mai Rom karinva iji ga e iji Sisaon* ar bomana ijia ikrejo iji ja anadiav.

23 Na sirimamega E Bomana Jesu Kurais nuvuon iji fu e fok jana fiknum tavan bog ma rediame samuagdiakfuon.

Copyright information for `NVM