Revelation of John 8

Maf-Sif Uka iji fun ire anum seven (7) iji abe irainma ijin

Maf-Sif Uka iji fun anum seven iji abe irakoga ire fok varur ijia karinva iji buka tavan ivuankbe ba irovajain Regavo buka katitaren. Regavo na giako anera seven (7) iji Godon nifak ijia irevo iji bu veg seven (7) kege vajiain.

Regavo anera be fu ire udi mukoi urino bu javo ijefuon dis gord ijia amarenva iji kunaime roke fata* iji bu God isuf baroijo irif ijia manin. Regavo buka ire udi mukor urino uruvana kege anera iji vajava fu kege e Godon ikrejo ijiebuon sirim ijekma God isuf baroidain. Ire iji udi mukor urino ijiga Godon e ijiebuon sirim iji bu anera iji Godon nifak ijia manino ijefuon imut ijia udi urine ajie Godon vak. Fu ijegrene anera iji fun ire iji udi mukor urino ijefuon dis an iji aben. Fu iji abe mian fata iji bu God isuf baroijo iji karame ijia same abe moikigia uduimkoren. Fu ijia uduimkoremga varur iji fu karame uruvana tavuakoga moik iji fu dab ukin.

Anera bu veg buon iji foinva ijin

Areme anera seven (7) iji bun veg buon seven (7) iji foikuai kanafume samuain. Bu samuame ireko anera amur iji fu veg fuon dab foin. Fu foiga ire ais ijiga mian ijar kavuan ijekma afurvene moikigia usen. Fu usem moikigia arime moik ivuankbe in bu ijia irenva iji roin naine ire garas fok fuka naine baren.

Fu ijegrekoga anera tu (2) iji fu uri veg fuon dab foin. Fu foiga ire be nafar bomana mian naino igekin iji buda saof ijia akozen. Bu dab ijia akozekoga saof iji fu dab atame nokbek (3) ren. Areme saof iji ivuankbe fuka kavuan ijar okurakoga kijum guf ijia oijo fok buka aoim baren. Regavo madu sisim iji bu ijia oijo fok buka ma iseren.

10 Regavo madu anera tiri (3) iji fu veg fuon dab foikoga varur ijia mujur bomana ijar ikuosai igeg naine ari dijen. Fu ari moik ivuankbe do iji vako ijiga do iji e bu ijo ijia arin. 11 Fu ijia arimga do iji roin bun una imag aruin. Ijefuon maiji mujur ijefuon if iji bu kua Imagno kuavo. Do iji bu imag aruinva ijefuon e uruvana bu do iji ine buka aoim baren.

12 Regavo anera fo (4) iji fun uri veg fuon dab foin. Fu foiga veni fateroin dab iseren revo asam ijiga mujur ijiebuon sanavo iji fateroin bun iseren. Bu iserenva ijefuon veni iji fu sanamo iji fu suok ijesugin sanam revo nakifuon fu nakim. Regavo asam fu sanamo iji fu sana vake ve ufrenma ijia fu sanamo bakin revo fu migegare una ve nakim.

13 Na iji giame na mani faikoga um buruof kaf ijia oino ijar uruvana igia kumen. O ja esenia o ja esenia e moikigia oijo esenia. E anera nokbek (3) vek irenva ijieb veg buon foikva ire ka ma ise ijieb rene e fok kam ma arafiriakno kumen.

Copyright information for `NVM