Titus 3

Unam e God ma vierafejo bu kegokfuon ijin

Regavo Taitas eon una madu kuardiaga bu e mamkanuk buon bu samuagdiavo ijiebuon rotit ijia oimarknum kariokfuon. Regavo madu kuardiaga bu vuak irerag bu kuardiavo iji igiame tavan bog unam ma ijesugin kegokuai samuakfuon. Regavo kuardiaga buba e kafobuon vuak ise kuaik revo buka afuime e fok vierafeknum kariok. Regavo tavan bog bu e kafobuon nifak ijia okva buka e adumaduigin reok. Ijefuon maiji ur noba oinuvuon karoinva ijia Godon vuak ma iji noka ba mukorigia vierafen revo noka ise reoin. Regavo madu noka ba God igain revo noka irerag vajai nuvuon fu vierafeno no ijesugin reoin. Ijefuon vajai nuvuon buka ise ijar anu kunuin. Revo madu noka vuak ise kafo e kafobuon kuaiknum e kafobuon ire kafo karekuai vierafen. Regavo e kafo bu no guovo buka deajidiam ga no madu bu giavo noka deajiduom. Regavo God e iji fu e karauniamo* ijar no guome oijmuoknum ma reduome karaunuin. Regavo fu no karaunuinma iji no ire kafo ma renva ijefuon fu karaunuinma bakin. Regavo fum nuvuon oifian abene ma reduome efkin karaunuin. Fur ise nuvuon iji somduo korega Kaven Akai* ijar oinuvuon kege una iviamkor amarduin. Regavo tavan iji oinuvuon bu maturaivo ijia God fu Kaven Akai fuon darokin iji kege oinuvuon ijia samduin. Regavo fu ijegrenma ijefuon maiji Jesu Kurais* kuros ijia fu guame kavuan fuon fu usenma ijar ise nuvuon somduin. Regavo God fu ijegrenma ijia fu ma reduome no karaunuome unam arir ijia unuin. Regavo Kaven Akai fuon muido no unam ma karivako iji no ma vierafene samua roko iji abek. Regavo vuak iji na kufui kuardiavo bakin revo naka ma kuardiav.

Ijefuon Taitas nika vuak irerag na kuardavo iji eon kuardiaikin e iji God ma vierafejo iji bu mukorigia vierafene tavan bog bu unam ma ijesugin keok. Regavo e iji bu nakikmazak ijeg kegokva iji fuka mardo unam buon bu kegoijo ijar e uruvana ifejdiak. Regavo e iji vuak ise ma bakin iji kuaime buon musikuaiknum vo saifijafbuon suar faivo iji agordiamne. Regavo nika e iji bu bui bijaivo ijigam e iji bu Mosison* akaij ijefuon musikuaivo iji agordiamne. Ire iji na kuardavo iji buka ire ise ga bu ire ma kafo ijia rejo bakin. 10 Regavo erar fu e ma vierafejo iji kege atakrega ni tavan nokarok (2) igeg vuak nijaime kuarda. Regavo fu vek ijegrene vaga ab una ire kafo fuon reno ni ijia aremne. 11 Regavo an vierafe e ijekin iji unam ma iji areme ise reoinon iji fuka e ise. Ijefuon maiji unam fuon fu reno ijar nijaiduomon fuka ma e isereoino.

Foron vuak radkma ijin

12 Na vierafe na Atemas kua fu on vuak vo baga na Taisikas kuaga fu on vuak. Regavo fu ijia kekokma aiji ni unam on nisaime una ai Nikoforis ijia nun ro. Ijefuon maiji na vierafe tavan iji fu ve damo iji na Nikoforis ijia fik. 13 Regavo ni giriesame e Zinas e akai samuamo ijiga e Aforas iji ifejdiaga bu anerene mukorigia ar bu vakrejo ijia vak. Regavo madu mukorigia ifejdiame ire kafokafo bu vierafenva iji vajiaga bu kege vak. 14 Regavo enuvuon kuardiaga bu nakikmazak buon bu karioijo ijia buka tavan buon abe e roin ifejdiaknum vo buon ifenamiknum kariok. Regavo madu irerag ma iji kaifijaf bu vierafejo iji kege samakaf ifejdiak. Regavo buba tavan buon niseknum kariok.

15 Regavo no madu no e fok igia nana karijo iji bu ja anadiav. Revo kaifnuvuon God ma vierafejo ijia karinva iji no bu anadiav. Revo no God sirimamene kuaga fu tavan bog ma rediame ifejdiaga ja mukorigia kariokfuon.

Copyright information for `NVM