1 Thessalonians 5

Bada ta tombu kesi nununga ue irivujo.

Eto nangota namei kamei ari erevi iji deina puvurou kesora amita ke amo ungota degi ahari ta mane kajasora. Ungo matu kiova amo Bada ta puvurari iji kombu te amo pegene embo mume jo ta puvuja ainge nombo puvuresuja. Eto embomeni na “Eha amo iji javotoho peka ta mitera,” ainge ijiroro ari sasapura ta isoro peni sau be puvuresuja amo pamone na meni umbasi ue hamo memenga titimbeuja ainge nombo puvurou kogue oju tiumbeto pambuto ondikari degi avo irae be ra. Rate nau namei kamei, ungo mume ta irari embomeni mane rate iji ta eto usasa ta meniundi avoeto iji kombu na ungota degi pegene embo na puvuja ainge nombo mane puvuresuja. Ungotena mume ta toho mane avoeto embo nei na evuora ainge avojo, rate ereto titi kundeto kogue irivujo. Eto embomeni evuora amo mumete evuora, eto umo indiore titivi euja amo mumete euja te ungotena iji embopo avoeto siro jigama ue hotembari javotoho ue isoro embo na beha ingeni na peiketo jigiuja ainge nombo tumota ari osa ari avo be jigesora, eto God na ungotenau ari sasapura oreketo umbasuja amo ungotenau siro orekari kope mitia avo hotembeto tunga javotoho aisora. Eto God na ungotena orekasuja ke amita be amo ungotena avo God na ungotenau ari sasapura avoeto amita tumo kiora ijie umbae rate Bada Iesu Keriso na ungotenau ari sasapura oreketo umbau amita toho ara umbuna 10 avo eto ungotena teho irorote mo ambuto iroro Iesu puvurou amiga vahaita daroho iresora avoeto ambuna. 11 Avoeto ungo ere ova ainge pere ue ke javotoho mine ara ijie osa kageni ue sovera ari umbuvujo.

Onde katari te pekari te ta ke.

12 Eto dagota namei kamei ungota degi ke erevi erera amo Bada ta javo ta pure ere ora embo ungote mitie onde ere katitera embo avo pepeni ke ijie osa evujo enana ta pure avoeto. Eto tini kambari avo, teho peka ta irivujo.

14 Eto dagota namei kamei, ke erevi ava erera amo kupi pegogo embomeni avo onde katevujo, eto sovera ae ere ora avo hondate evujo, eto jopapa ere ora avo ke avo ando ngahia ururou embomeni amita degi tumo sausau mane aisova. 15 Eto embo na ari sapura ungota degi au kito mine ungo na amita degi ari sapura mine avojo, eto iji tapa ari javotoho embo tapa ta degi mine ara evujo. 16 Eto iji tapa tunga javotoho ue iji tapa pari evujo. 18 Eto iji nei javotoho puvurou amo osa evujo eto iji nei sapura puvurou kito amo God osa evujo amo ungo Iesu Keriso ta toho na ainge ava God na uje ere ua.

19 Eto God ta ahihi otohu na ungota jo ta i evekarako ere ua avo seikavojo. 20 Eto embo na ke emo God ta ke ra ainge ijie au ingito sokova ke mane asova 21 te ke tapa avo eto kito ke be davore sokova davore avo kito ke be avo jigama ue 22 ke sokova nei te nei te tapa tovujo.

23 Eto pari ta erera amo God, peka ikari embo amina au ungota jo tongopa irae au ungo otohu aisova. Eto God na au ungota ahihi te hamo te hotembari jo te tapa javotoho au pehumba ari inono ae ururovo Bada Iesu Keriso puvuresuja. 24 Eto ungo siriketo amita toho ava umbuna embo amo tumota ari haite avoeto erena amo aisuja. 25 Eto dagota namei kamei, dago avoembo pari evujo. 26 Eto namei kamei tapa avo mune tavo ue pekevujo. 27 Eto Bada ta javo ta erena, ekalesia namei kamei tapa ta degi ahari erevi etekevu ingore. 28 Aravora, ungotenau Bada Iesu keriso ta hondate ari avo ungota degi iresuja.

Copyright information for `OKV