2 Corinthians 9

Namei kamei hondate ari ta ke

Eto ungo God ta embomeni hondate asi tunga ikitie miteva amo na matu kogona te teho ere kaitena. Eto ungota hande asi tunga ikava amita ke amo da Achaia embomeni ta degi nanena ke einge eo ingia, “Da Corinth ekalesia na jua matu amina donda ambu embopo ta hande ikasi sirikea,” ke ainge amo nanena ungo jakeka ue ijio da Achaia embomeni na ingito hondate asi uje ea. Avoeto ungota namei kamei ikaro ungota degi pambasora amo dagona ungota ari avo jakeka eora avo dagota ke avo huti mane aisuja avoeto ikaro pambasora be ikevujo kiore. Avoeto nanena ungo tumota ue ke eona avo enda Macedonia embomeni na namote pambuto ungona hande ikasova avo nununga ae amo koguroro ungote namote tapa me kesora. Avoeto ungona hande ikasi onde ueva avo dago pambae mitiroro ungota namei kamei na pambuto ungo hondate ururoro nununga avote avo hotembitie erena. Eto hande javotoho aisova amo engekari ta hande mane rate ungota ujeta hande avoeto nununga aisova.

Eto ke erevi ungo jeneambu avojo, eto embona ve heriso urasuja amo be isapa umbasuja eto embona ve isapamane urasuja amo be isapamane umbasuja. Eto embo vahai vahai amita jota ngahia mitirou penunu au jo te tapa ikae aisuja amo sapura ra te embota jo ta doinge ikasuja avo siriketo osa osa te tapa ikasuja amo God na kito osa aisuja. Eto God na ungota degi javotoho ari iketo kakane ari avo iraera te God na ungota degi donda rete ari tapa deire avo inono iroja simba ururou ungona pure jajavotoho nei do aisi uje aisova amo God na umbuto nei amita hamota ikasuja. Eto God ta ke ta amo einge kajari mitia, “Eto donda ambu embopo ta degi hande embo ena avoeto amita ari javotoho avo daroho iresuja,” eto ke ainge mitia.

10 Eto God na ve urari embo ta degi ve ikeoi umbuto ve ureuja eto pure ta be amite tapa ikeoi umbuto indiora avoeto ungona ari jajavotoho tapa do do aisi uje aisova amo God na hondate ari ikau umbuto ururovo peni be aisuja. 11 Avoeto ari javotoho do kito asi uje aisova amo God na ikau umbuto hande embomeni be ari haite aisova, amo ungona hande ikavo nangona umbuto embo nei ta ikitiroro embo isapamane na God osa ue jakeka aisora. 12 Eto ungota hande ikasova amo God ta embomeni ta ujeje avo pere mane rate God ta degi osa kageni ari pambuja avoeto ikasova. 13 Eto ungota hande ikasova aita amo ungota hande ta tunga enana ta degi eto embo tapa ta degi ere ikitova amite eto ungo Keriso ta duru javotoho avo hamo na pere mane rate jo te tapa ambo ambo ereova amite tapa avo embona kito God jakeka aisora 14 Eto God ta hondate ari isapamane ungota degi iketei umbeva avo God ta embomeni na kito ungo jo tapana osa ue ungoembo pari aisora. 15 Eto God ta hande pajire be avo kogue kore ue God osa ere ora.

Copyright information for `OKV