Colossians 1

Paul na da Colossae embomeni ta ahari kajena

Na Paul God ta uje avoeto Iesu Keriso ta apostero namote eto ungotenau namei Timothy te na Ungo God ta embomeni da Colossae ta mitie Keriso tumota ereova amita degi ahari erevi ere kaitena. Eto ungotenau Mama God na hondate ari te peka te ungota degi ikasuja.

Paul na osa ue pari ena

Eto nangona ungo embo iji tapa pari ue ungotenau Bada Iesu Keriso ta Mamo God avo osa eora Amo ungona Bada Iesu Keriso avo tumota ue God ta embomeni tapa avo osa eova amita ke avo ijiore ingiora. Eto God ta duru javotoho ai ta amo ungota degi do puvuresuja amita ke amo ungona kiti ingito donda javotoho avo hotembitie God osa eto tumota ueva donda amo utu ita ungota javota nununga ari mitia. Eto duru javotoho sigeto eneteto enda tapa ta pahua ai ta amo embomeni na javotoho ari neite kainte uhovora. Eto God ta hondate ari amita ke be avo kiti ke ingari iji ta eto puvuto eha oroho amo ungota eto enda tapa ta be eketo beto ereto peni vahai ere ua. Eto ungotenau namei eto pure vahai embo Epaphras amo nango hondate eto ungota degi Keriso ta pure ena amina God ta hondate ari avo ungota degi ari ingari. Eto amina ungota osa ari Ahihi Otohu na hande ikenu umbava amita ke avo etei ingito iji tapa ungo avoembo pari eora amo God na ungo ari tapa do ava uje ere ua avo Ahihi Otohu na amita kiari peni be ungo ta degi ikau uhue be kiova pari ere ora. 10 Eto ungona ari tapa deirami umbuto irova Bada na uje ere ua avo umbuto God ta kiari na pajito ari jajavotoho neite kainte ururovo God na kito osa aisuja. 11 Eto God na amita sovera usasa te avo ikau ungona sovera ue osaga kiari iji te amo mane beasova te ngahia eto iresova. Eto God ta embomeni na hoteto umbasora donda avo amina amita titi jigari degi aite simba ue mitia eto God na ungo donda avo umbari haite aisova jo ungota ta pure javotoho ena avoeto God osa ue tunga javotoho aisova pari erera. 13 Eto ungotenau jota pure javotoho ena amo God na ungotena mume ta sovera amina tipura embo na irarako ue mitiaetera avo oreketo umbuto amita osa ari meni ta titi jigari degi ta ikenu torea. 14 Eto God ta Meni na ungotenamo avoembo pure ena amo ungotenau ari sasapura na andirari avo bujekenu tambu ta pahuo ari sasapura avo hotembeto tona.

Keriso ta pure ta ke

15 Eto God amo embo ta titi na mane kiorate Keriso amo God ta tombu hajire vahai avo kiora. Eto God na amita Meni avo vahai kiti iketo donda tapa amo ambota ikena amo Keriso ta tu ta ikena. 16 Eto donda tapa utu ita eto enda ta, eto donda kiari haite eto kiari haite mane amo ahihi neite neite sovera te eto embo pepeni te titi jigirikari embopote ahihi pepeni tapa amo God na Keriso na hondate unu amiga ena amo Keriso avoembo ena. 17 Eto donda tapa irae pekota amo Keriso na mitiaetija eto donda tapa amo Keriso ta jota mitia amo amita irari degi be avoeto. 18 Eto God ta ekalesia ta sirota amo Keriso mitia avoeto ekalesia ta vasiri amo Keriso ta degi umbuora. Eto God ta Meni bugo Keriso amo donda tapa amita titi jigoja amburari ta jiginu vasiri te erena. 19 Eto God na umo eonga siriketo amita Meni ta degi amita tombu eto hajire eto ari vahai avo ikena. 20 Eto God na donda tapa iketo tona avo amita Meni na Mamo ta toho aja ue amita Meni ikenu i atahu ta ambuto peka umbunu donda tapa ututa eto enda ta amo God ta degi egerembea. 21 Eto ainge nombo iji matu amo ungona ari sasapura te hotembari sasapura te amo God ta kitoho avoeto auvari inono aera. 22 Te God na amita Meni ta amburari amina ungote namei eto God ta eto embota titi ta pehumba ambu ungota ari sasapura irae eto tongopa ambu otohu embopo ainge irova umbuto amita jota ere ikitia. 23 Eto ungote tapa aita torari haite asova te ungo Keriso ta duru matu ingito ke be ijieva avo be na jigito turi eto heteto tumota ue mane ejekasova te aita heteto irivujo. Eto na Paul duru javotoho hande ari embora eto duru amina sigeto eneteto enda tapa ta pahoi embomeni tapa na ere ingihera.

Paul amo ekalesia ta pure ari embora

24 Eto na ungo embo osaga memenga hamo nau ta kogue mitena avoeto na tunga javotoho ereona. Eto ekalesia amo Keriso ta hamora avoembo osaga memenga kina aita osaga memenga nau amo kaju ano inono aisuja. 25 Eto God na ungota degi ari javotoho puvuroja amita ke sinderi te avo na ungo ekalesia ta degi hande ana God na umbuna. 26 Eto embo matu mitiaetera amita degi God ta ke ondikari mitouva avo nanena harikano ungotena amita embomeni ototohu na ingora na umbija. 27 Eto God na ke matu asi sirikena amo God na ke javotoho matu asi sirikena amo embo ta degi ondikari iriuja avo ungo enda nei embomeni ta degi ere harikitia ke amo Keriso na ungota jota iriuja avoeto ungo tapa God ta usasa ta torasova. 28 Avoembo embo tapa ta degi Keriso ta ke hande ere ora. Avoeto kiari neite neite ondekatari neite neite na embo ate poekitiroro Keriso ga kajueto kiari na pajito embo ainge eto God ta degi torasora avo ate ere poekitera. 29 Eto pure erevi asi ue amo kupi ambu ue Keriso na vasiri te sinderi na pure ana nau jota sovera ere ikitia amina pure erevi sove sove eto ere ona.

Copyright information for `OKV