Galatians 3

Ke pepeni simba arotemo God tumota aro?

O ve, ungo da Galatia ingito ingarako embopo. Ungota titi mo amuna saruka etei kiae ere ove? Iesu Keriso i atahu ta ambuna amo ke araha ta etene ingihava te ungo na kiae kiae ereova, avoeto na ke vahai erevi ungota degi eto ingesi uje ere ona amo God ta ke pepeni simba eteva amina God ta Ahihi Otohu ungota jo ta umbevetemo Keriso ta duru javotoho tumota ueva amina uhave? Ungo ke kiae embopo. Eto ungo na God ta Ahihi ta sovera na itiketo ue mitena te aita amo hotembari ungota na kajueto iresi uje ere ove te? Eto ungona God tumota ue amita hajire neite neite kogava amo teho kogavete? Eto God na amita Ahihi Otohu ikeoi ari sovera neite neite eoi kiova amo ungona ke pepeni neite neite simba eova Keriso ta duru javotoho ingihe ke be eova avoembo ikeoi?

Eto Abraham ta ari erevi be hotembevujo, amina “God tumota unu kito embo javotoho ke ena” ke ainge kajari mitia avoeto ungo kogova amo ari javotoho neite neite amina ae rate God tumota eora embomeni amo Abraham ta hajire vahai avoeto amita meniundi bera. Eto enda nei embomeni tapa amuna God tumota ururoro God na kogue embomeni jajavotohora ke euja amita duru javotoho amo Abraham ta degi einge enu kajena amo “javotoho ari no degi ta eto enda embo tapa ta degi puvuresuja,” ainge kajena avoeto Abraham na God tumota unu God ta javotoho ari ikenu kina ainge nombo embo amuna tumota eto kesuja 10 Rate God ta ke pepeni agi eto embo jajavotoho asi mitera embomeni amo God na au sapura ta beasi mitera amita ke amo einge kajari mitia “Eto embo amuna God ta ke pepeni kajari avo tapa inono ta jigama ae euja amo God na au sapura ta beto hajire kesuja” eto 11 ke nei einge mitia “Embo amuna God tumota aisuja embo amina God ta titi ta embo javotoho eto vasiri umbuto iresuja,” ainge mitia avoeto ungotena kesora amo embo na God ta ke pepeni agi eto God ta titi ta embo javotoho ari inono ae ra 12 te God na amita ke ta einge kajena amo, “Embo amuna nau ke peni te isapa te inono ta agi asuja amina vasiri tambasuja” ainge mitia avoeto ungotena kesora amo God tumota ari amo eonga eto God ta ke pepeni agi ari amo eonga 13 rate embo na agi ari inono ae avoeto ungotena sapura ta beto hajire kiaetera te Keriso na ungotena hondate eto ari sasapura ungotenau aravo hamo amita ta umbunu bitinu God na kito hajire ikenu ambuna avoeto Keriso ta ari avo kogue einge kajarira “Eto embo i atahu ta taro amburesuja amo God ta titi ta embo sapura be” ainge kajari ra. 14 Eto God na Iesu Keriso ikenu ungotena sapura oreketo umbuna amo God ta titi ta ari javotoho ari Abraham ta degi ikasi onde ue nomai kajena avo enda nei embomeni na umbara Iesu Keriso ikena avoeto God ta Ahihi Otohu umbara onde ena amo Iesu Keriso tumota ururoro ikau umbasora.

God na Abraham ta degi ikau umbaja onde ena.

15 Nau namei kamei ungo be kiova enda embomeni ta ari avo umbuto ate kitira aisona. Eto embo tapa na ke vahai amo jo vahai eto aravora asora amo ke peni avoeto ke embo vahai amina mane taekasuja eto ke nei amita hamota ikau mane hetasuja te ke vahai aravo aravora etera amina hetasuja. 16 Eto God na Abraham ga nomai kajena amo Abraham eto Abraham ta ahihije amita degi ari javotoho asi onde ue nomai kajena te kivujo, God ta ke ta kajari mitia amo “Umo te no ahihije te ta eto puvuroja” ke ae rate “umo te no ahije vahai amita degi eto puvuroja” ke enu kajena avo mitia. Eto Abraham ta Ahije amo embo nei mane rate Keriso ra. 17 Avoeto ke erena amita be amo God na embomeni ta degi ari jajavotoho ikasi onde ue nomai kajena amo toae rate jua tapa 430 amita ambota God na amita ke pepeni Moses ta degi ikenu kajena amina nomai Abraham ta iji te kajena avo mane au irae aisuja avoeto God na onde ena amo irae ae rate mitia. 18 Eto embomeni na God ta ke pepeni agi ue God ta tombu ta embo jajavotoho ari inono ae rate inono aetera amo God na javotoho ari ikau hande eto mane umbaetera. Rate God na umo eonga embo ta degi javotoho ari ikasi onde ena avoeto Abraham te tapa umbuto God ta tombuta embo javotoho ena. 19 Eto ungotena ere kogora amo embo na God ta ke pepeni avo agi eto embo jajavotoho ari haite mane rate do eto God na amita ke pepeni embo ta degi hande enu? amo Abraham irari iji te eto puvuto Iesu Keriso puvuna iji te amita ugorota embomeni na ari sasapura ta hajire do aingere avo kiora ikena. Eto ke pepeni amo God ta anera na Moses ta degi ikenu umbuto embomeni ta degi hande ena 20 te God na ari javotoho ikasi onde ena amo embo nei na Abraham ta ikaja ikae rate ikasi onde ena embo Abraham amita degi orereto ikena.

God ta ke pepeni amita pure.

21 Eto hondate ari, God na Abraham ta degi ikasi onde ena amita degi God ta ke pepeni amina tumo ue mine tara ere orete? Ainge mane ra te ke pepeni God na ikena aita amo ungotena vasiri umbari haite aetera amo embo tapa na ke pepeni avo agi eto God ta tombu ta embo jajavotoho aetera, 22 te God ta ke kajari ta mitia amo enda tapa eto embo tapa amo ari sasapura ta sovera na jigei mitera avoeto vasiri javotoho ari avo God na embo ta degi hande ikasi onde ena amo Iesu Keriso tumota uore vasiri javotoho ari hande eoi umbuora. 23 Rate embo na Keriso tumota asora iji puvurae pekota God ta ke pepeni na ganoka uore tipura ta irarako uo Keriso tumota asora iji puvuna. 24 Amo embo na Keriso tumota ore God na au embo jajavotoho ara Keriso puvurae kiti ta God ta ke pepeni amina embo simba ere uaetija 25 te Keriso tumota asora amita iji matu puvuna avoeto God ta ke pepeni na ungotena mane simba aisuja. 26 Eto ungo amo Iesu Keriso tumota ue amiga kajueto miteva avoeto ungo God ta meniundi ra. 27 Ungona Keriso ga kajuasi bapataito ueva avoeto Keriso ta vasiri avo asuketo miteva. 28 Eto Judea embomeni te enda nei embomeni te pure ari embo te pure ta titi jigari embo te embo te pamone te tapa ke ainge eora amo ke peni mane Iesu Keriso ga kajueto vahai etera avo peni be ra. 29 Eto Abraham na God tumota ena ainge nombo ungona Iesu Keriso avo tumota ue amita toho ue iriova avoeto Abraham ta meniundi be amo ungona ere ova avoeto God na Abraham ta ikasi onde ena amo ungo na hoteto umbasova.

Copyright information for `OKV