Revelation of John 15

Anera tapa 7 amina aro osaga memenga kesora

Eto na hajire nei pajire be avo Utu i ta kena amo anera tapa 7 amina osaga memenga hajire neite neite tapa 7 ainge avo embota degi aro koguroro God ta tumo irae asuja avo jigito mitere kena. Eto eva visi visi javotoho i peri na ombuto ombuto ari kena amita hora ta o sapura te amita aririvo ove ari te amita javo ta number hajire te umbae sovera eto nembari embopo amina gita javo ‘harp’ God ta degi umbera ai ta torue Moses, God ta pure ari embo te eto God ta O Lamb te amita haveni avo einge ijie etera, “Bada God sovera isapamane te no ari tapa avo pajire be eto javotohora. Eto vasiri no tapa amo ke be ke be umo iji daroho ta king. Oarie Bada embo tapa na umo oju ururoro usasa javo no ta puvuroi no ari jajavotoho eoe kiora avoeto enda embo tapa na no degi ta puvuto tumote pain ue jakeka asora”. haveni ainge etere irae etei Utu i ta God ta irari degi Otohu be Otohu avo hirikitoi anera tapa 7 amina osaga memenga tapa 7 ainge avo jigiriketo tambuta puvutuhore kena amo enana bo parara be asari eto jenge ta amo pupuri gold na ari avo kajari ainge avo puvutohore o vasiri tapa 4 rate vahai amina atungu gold na ari tapa 7 ainge avo ikereketija amita jo ai ta amo God ta tumo pevitari avo mitia. Eto temple jo ai ta amo God ta sovera te eto God ta usasa te amina i iposi ainge eto kumbo kumbo bitito temple jo enetetei embo torari haite mane kiti anera 7 amina osaga memenga tapa 7 avo aro embomeni na kioro irae au ambota torasora.

Copyright information for `OKV