Romans 6

Bapataito ari ta ke.

Avoeto ungote God ta hondate ari mo naingeto simba aro? Eto ungotena God ta hondate ari peni vahai be aja ari sasapura kaikari arote? Ainge mane aisora te ungotena Iesu Keriso ga kajueto ari sasapura avoembo ambuvujekea avoeto ereto ari sasapura mane ue iresora. Amita ke be amo erevira, ungotena Iesu Keriso ga amburari avoeto ungotena bapataito eora amita ate kitira avo eora. Amo God Mamo na amita usasa sovera te na Iesu Keriso ambuna avo jiginu vasiri te erena avoeto amiga vasiri eha umbuto irora ambunu kovea aita bapataito eora. Amo Iesu ambuna amiga kaju eora avoeto Iesu na vasiri te erena ainge nombo ungotenanena vasiri te erasora. Eto ungotena ere kogora amo ari sapura embo amburesuja amo ari sapura ehako mane aisuja te irae aisuja avoeto ungotenau hamo ta ari sapura amita sovera avo irae aja Iesu ga cross ta teo ambua amo ari sapura ta ke agi mane aisi ue ambua. Eto ungotena Keriso ga ambua avoeto Keriso ga iresora avo ke be hotembeora. Eto ke nei be hotembeora amo Keriso ambuto vasiri te erena amo ehako mane amburesuja te amburari amo Iesu na nembarira. 10 Eto Iesu na iji vahai enda ta ari sapura avoembo ambuto vasiri te erena amo God ga iriuja 11 ainge nombo ungo Iesu Keriso avoembo ambuto vasiri te ereto God te Iesu Keriso te ga kajueto vahaita miteva. 12 Eto ungo hamo te bisi te miteva amikote amo ari sasapura na titi jigihirou ungo amita ke agi avojo. 13 Eto umo ambuto vasiri te erari avoeto no utu rate ingeni rete titi rete hamo rete amo ari sapura ara mane ikasoa te ari jajavotoho ara pe te God ta degi hande ikejo. 14 Eto umo God ta ke pepeni na andirari embo mane rate God ta hande umbari embo avoeto ari sasapura na umo mane titi jigesuja.

Ungotena ari sasapura ta embo manera.

15 Eto ungotena God ta ke pepeni na andirae rate God ta degi vasiri hande etei umbera amo ari sasapura aisora amo tehorete? Ainge manera te 16 umo embo amita pure tunga ikasoa amo embo amita ke avo pere agi asoa amo ari sasapura agi ue ere uma amburote God ta ke agi ue ere uma amita titi ta embo javotoho ao? 17 Eto ungo matu amo ari sasapura ta ke agi ari embora te God ta ke hande ore ingihava avo be jigito miteva avoeto God osa ere ora. 18 Avoeto ungo ari sasapura na andirari avo bujeketo araha ta puvuto ke jajavotoho ta agi ari embopo ere ova. 19 Eto ke erena avo ungo be ingova timu hatirari ke na umbuto ere hona amo ari jajavotoho na titi jigoute mo ari sasapura na titi jigou? Eto iji matu amo ungota hamo na ari sasapura isapamane be ere uaeteva avoeto jandireketo ari jajavotoho avo otohu ue amita ke agi ari embopo evujo. 20 Eto iji matu amo ungo ari jajavotoho na titi jigae rate ari sasapura na ungo titi ere jigihaetija, iji amikote amo ungota degi ari javotoho puvunute? 21 Na ere kogona amo ungota degi me kiari te amburari te avo puvuna. 22 Rate ungo ari sapura na andirari avo God na bujeketei amita pure embopo ere ova, amo amita pure ere uma Otohu ue vasiri te daroho iresova. 23 Eto ari sasapura ta mine amo amburesora te God ta hande amo Bada Iesu Keriso ta degi vasiri daroho umbuto iresora.

Copyright information for `OKV