1 Corinthians 6

Mete piti pulpowo Ma Ili kolo pepe, ise ma ye yulwepe piti pe ma kapi il paptei pire moingi peise kolo olo

Wuso line winke noute teise te rounge tura noute, piti men ma nele lelnge le falepe mete wuso wala pretawo Ma Ili kolo olo pepe, piti pe ma kapi il paptei pire moingi lelnge, le ise wuso retawo Ma Ili fei pepe, polomen so metine lepe ma lusaise kapi il yaptei yire moingi fei lepe kolo, olo lepe? Mete piti Ma Ili pele pe miso kapi il paptei pire mete yeflipi piti tef le ise retai lo olo? Le wuso ise miso kapi il yaptei yire mete yeflipi piti tef, moingi kumpu polomen re ise wala yire moingi piti kapi il yaptei yiripe lom? Ku miso kapi il maptei mire ririm piti yuwei le ise retai lo olo? Le wuso ku miso molpepe, so moingi men kumpu piti wem ku wala nampir mratei, ku ma kapi il maptei miripe. Le wuso moingi men kumpu polpepe faleise, ise ma ye falepe mete wuso pretawo Ma Ili wolo nange pelpe lipi kolo, lo mete piti pinuwepe pepe, wolo ise ma ye fale moli lipi piti puntoluwepe mete piti tef pepe kolo olo. Ise topungou olpe kolo lom? Ise nele leise wuso ratei leingaloise lepe le onom nire wuru piti le miso kapi il lire yaruwenge line winke teise wuso tura noute tepe ko, olo lom? Wolo olo, line winke nele le ma le lirpepe moli lipi lire moingi lele lire line winke lele lepe le le ma lusape moli lipi pepe, pe olo pretawo Ma Ili kolo olo, wolo line winke lepe le ma lusape kapi il paptei pire moingi lelnge.

Ise yura nemple pepe, pepe kosaise punkomtei ise wala ratei watafei mete wuso wala pretawo Ma Ili kolo olo pepe. Ise ma yusape pe waise moingi lo pe kapise men nange peise le fei pepe ma teingipe. Wolo ise isotei wai isotei moingi le ise kapi oweli men nange piti isotei wane le ilim winkem nange peise re wolo ise ma yolpepe yiripe, olo olpe wanketei. Ise retai ko, mete piti pire il olpe pepe pe ma Ma Ili luntoluwepe pratei uf teingi lele kolo olo. Ise ma fupeteise kolo olo, Ma Ili onom teingine lire wai peise kolo olo. Mete wuso puntoluwepe nimoure ausi lo pe rautuwepe weni ririm olpe lo pe paulelipe nimoure piti mete nemple lo mete yairongou potei pe pauleli nemple, 10 lo pe mete piti kapi oweli men nange piti mete nemple pelpe, lo pe mete piti pire filai lo pe paplei tipeluwi le pe pini purungo lo pe kesipe il pe pemtetei pirpepe mete nemple lo pe pire ausi, mete fei polpepei pepe pe ma Ma Ili luntoluwepe pratei uf teingi lele kolo olotei. 11 Ise ilepe yinu watafei pe. Wolo Ma Ili weiteise enke piti ise yungungu kaptetei il olpe peise, le ise wai isotei ye le lotei. Apa Ili Jisas Krais lire Riri liti Ma Ili, te teiteise fale teingipe tuwopou yire Ma Ili.

Ise yiripe topungou talu peise piti rautuwo Ma Ili

12 Metine nele ma lirpei lolo, “Ki miso kingiepe il menemple eryai.” Iyo, wolo pe yeflipiye miso kaneiye kolo olo. Ki ma kirpei kolpepei, “Ki miso kingiepe il menemple eryai.” Wolo ki ma kusape il menemple re ma weiteiki kualo tisi oli kolo olo. 13 Metine nele ma lirpei lolo, “Ma Ili wauku oweli menemple piti maplei le ku ma maplei mire enke teingipe.” Iyo, wolo ku ma mintatape oweli lipi piti mapli maplei kolo olo wusoli oweli ma kanise ratei yingi wem wem kolo. Ma Ili olo ma liripe nemple. Min watafei pepe ise onposi yolpepe “Metine ma lire topo tale lele piti ma luntoluwepe nimoure ausi lom?” Ma olotei. Le ma liri piti lesio towa liti Ma Ili le Ma Ili, le luntoluwo topo tale liti metine. 14 Apa Ili la, wolo Ma Ili nou leila le ku re Ma Ili miso lire singe pele leilauku ma nou nampir mratei.

15 Ise retai ise topungou tale peise pe ilepe piti topo tale liti Krais le ise kani onom pite Krais le ise re Krais onom nenpeiye. Le ki miso kani onom piti Krais kenetene moto piti tisi lo ma olo? Miso olotei. 16 Metine wuso lauleline moto piti tisi, le kani onom lantene fei. Il piti paitei yousi pe pirpei nomnaipe polpepei, “Me roum fale nemiyeye watafei roum maiteneme.” 17 Wolo minele piti lompotowo Krais, te rounge ma onom nenpeiye.

18 Tounga pesi tisi liti yuntoluwepe nimoure ausi. Il olpe wuru pepe, mete pingiepe pe olpe, wolo mete wuso puntoluwepe nimoure ausi pepe pe piripe leinginim pelpe olpetei. 19 Ise topungou talu peise pe winem liti Riri Teingi, le Ma Ili waise le le rateise ise leinginim le ise retai lo olo? Ise piti isotei kolo olo, wolo ise piti Ma Ili pele. 20 Le lire teluwi piti ninge lele lire laiteise. So ise ma yire topo tale peise piti ma rautuwo Ma Ili.

Copyright information for `ONG