Acts 1

Ma Ili lila Jisas le yuwei

Ise mete peiki piti yingowo Ma Ili, yousi peiki fei ki kinu kaptei kirpeise kire il piti wem Jisas leilo lesio towa lele, re leptalo il, le le fale wem piti Ma Ili nou kali lila le yuwei. Wem le wala le yuwei kolo le lire singe piti Riri Teingi il poluwepe mete pele wuso linu kesipe laptei lotei pingowo tisi lele. Wem le la, le nou leilo ratei tef fei lepei wem wuru (40). Wem wuru le falepe mete piti pingowo. Le falepe kosa le lotei piti pe ma puluwo retawo le metine wape, le le liripe pirpe il piti Ma Ili lotei ma lontoluwepe mete fei pe kani onom pantowo lepe.

Le wem pe pau peifo nemple pire Jisas paplei oweli wo, le lirpepe il fei pepei, “Ise ma yusa Jerusalem kolo. Yiratei ma Riri Teingi lau lunkise wo, wusoli il fei kinu ki kirpeise pepe, Eiya leiki le lirpei punkom ma waise. Wuso Jon kaptetei lire tipe nimou le ise, fei ma, wem ulel kolo, ise ma yungungu yire Riri Teingi.”

Wem mete pele piti pingowo pau panfi Jisas, pe peletei “Ye, Ma Ili, ye wem piti men soma ye watowo metine liti Israel nange liti le lontoluku re tef pouku, le ma watafei mani louku Devit lom? Fei lo olo wem nele?”

Leye lo Jisas namti lirpepe “Olo, ise miso retai wem il fei pepe ma fale punkom kolo, ma olo. Wusoli Eiya lotei laltei lalingi lire singe pele. Wolo ise ma wem piti Riri Teingi lau lunkise, le ise ma kapi singe pele soma ise kaneiki yeptalo il yilele ye yinge Jerusalem le Judia, ye ratei tef liti Samaria le uf walem piti pratei tef ili eryai lepe.”

Wem le lirpei il pele lapulu pe pile puluwo, Ma Ili kali lila le yuwei, pile puluwo le, le lire kumputei, nopom fale lau keraisi le pe puluwo koloye. 10 Fei, le le kotire, pe wala pile pontoli tisi fei le lunwei le lepe, leye lo mete winges tafo olongou fiyu fale frouye tau tiripe pile le te tirpepe, “Ise mete piti Galili piti polomen so ise yile yontoli yunwei ye teplai lepe? Metine fei lepe nange lele Jisas, wuso Yaitei kali lila le yuwei tanise lepe ma nou lau watafei yuluwo lunwei le yuwei lepe. Fei ise ma yile kolo, olo ye uf leise.”

Matias luwalo lile tulum liti Judas

12 Leye lo mete pingowo Jisas pusa tumun liti nimpe oliv pile le pe nou pe uf ili Jerusalem, wusoli fien kolo. 13 Wem pe pe fale Jerusalem pe punwei pe winem yuwei lelpe wuso pratei lepe. Mete nange pelpe men so pepei Pita lire Jon, Jems re Andru, Filip lire Tomas, Bartolomyu re Matyu, Jems ninge liti Alfius re Saimon (metine liti linaulipe mete piti pau uf nemple pontoluwepe mete pele pire uf lele) lire Judas ninge liti James. 14 Pe pire nimoure wuso kani Jisas pepe pire Maria nimou piti Jisas nire winkem pele, pe panfi nemple wem wem piti pire Ma Ili pirpei.

15 Wem nele mete piti pulpope il piti Jisas wurutei (120) pau panfi nemple. Pita leilo lile lirpepe lolpepei. 16 “Wingem peiki il pinu wuso Riri Teingi lirpei fale nemi liti Devit lirpei le Judas, le linuwepe mete olpe piti penglei Jisas ma fale punkom. 17 Metine fei lepei nange lele Judas le metine alpe louku wusoli le metine liti lesio towa ile louku. 18 Le mangou wuso Judas kapi piti lesio towa oli lepe, le liripe laise tef fei lepe wuso le luwalo la, fango lele lawo le nilim pele naro wem le lankei. 19 Leye lo mete wuru pratei Jerusalem pingitei il fei pepei, le pe pinawo tulum fei lepe pire il pelpe ‘Akeldama.’ Il pal piti nange fei lepei ‘Tulum liti Teluwi.’ 20 Wusoli Devit laptei paitei yousi piti Sam lirpei lolpepei

‘Metine fei lepe winem lele ma yawi. Nele ma ratei kolo.’
Le le nou laptei lirpei lolpepei
‘Metine nele miso luwalo lile tulum lele lesio towa lele.’
21 Liso metine nele ma fale watafei ku, lau lirouku mirpepe mete il piti Jisas nou leilo lepe. Le le ma metine liti lirouku wem oli wem Jisas le mepi me, mau wem fei Jon kaltetei lau fale wem Ma Ili kali le yuwei.”

23 Leye lo pe pautetei mete winges nange pelnge Josep pinawo pirpolo Barsabas (nange nele pinawo Jastus) lire Matais. 24 Fei le pe peletei “Ili louku, ye Apa. Ye retape enke piti mete, le fei ye ma kosauku metine minele piti mete fei tepei wuso ye yotei altei ma luwalo lile tulum liti Judas watafei metine liti lingeiye lesio towa wuso Judas lusa le le tulum wuso Ma Ili lirpei lepe.” 26 Leye lo pe paptei nange pelnge paitei era fila kumpu le pe pirime muwalo tef, le nange liti Matias weitei luwo yuwei. Fei metine liti pe paltei lepe, le Matais, le leingalipe mete piti pingowo Jisas (12 Aposel).

Copyright information for `ONG