Galatians 5

Ku ma musape menmen nou pesouku peirouku pato

Krais kanouku me yaupe, so ise ma yile singe le ise yusape menmen nou pesise peireise pato.

Ise yingitei, ki Pol, ki kirpeise kire il pepei. Wuso ise wai isotei ye piti yaploupe topungou peise, fei pepe ma pato olpepei, Krais ma kaneise kolo oloye. Ki ma nou il polise kolpepei, metine minele wuso lulpo piti ma lalowi topo lele lepe, le ma lingiepe il yeflipiye piti paitei Il Lipi pite Moses pepe. Ise minemple wuso onposi yirpolo ise miso fale teingipe tuwopou yire Ma Ili wem ise yingiepe Il Lipi pepe, ise pepe olo kare yeite isotei tanio Krais ye. Le Ma Ili re miso onom maneise kolo oloye. Wolo ku piti onposio Ma Ili piti ma leitouku fale teingipe tuwopou miri le lotei lepe, ku mratei mungario wem fei lepe wusoli Riri lite Ma Ili kanouku lire singe pele le ku mirkilau mulpowo Krais. Wusoli wem ku mulsi Krais Jisas, ku maploupe topungou pouku, lo ku maploupe kolo olo, fei pepei olo nemtei kolo olo, wusoli ku mingowo tisi niliye piti mulpowo Krais Jisas le ku mingiepe mapwonou piti kani onom mantepe mete nemple.

Ise yingiepe yoporotei. Minemple so il kareise piti yulpope il punkom kolo pepe? Minemple so weiteise enke fei polpepei? Ma Ili piti linaise pepe, Le miso lolpepei lireise kolo olotei. Il nemple wuso mete pelpe pirim pirpepei pepe, pe pirpei polpepei, “Yis kumputei wolo luom miso linpei le ili.” 10 Wolo ki kretaise koporotei. Ku mepi mulsi Apa Ili le ki kretai punkom kolpepei, ise miso onposiepe il nemple kolo olo. Le metine minele wuso liripe enke peise olpe pepe, metine minele lepe, Ma Ili miso watowo moingi.

11 Ilim winkem peiki, wuso ki wala keptalo il piti mete ma paploupe topungou pelpe, piti men mete waiki moingi? Wuso punkom ki wala keptalo il piti mete ma paploupe topungou pelpe, is il piti ki keptalo kiri Krais wuso la laitei nimpe lepe, pe ma pinaulipe kolo olo. Wolo olo pe wala pinaulipe il piti Krais la laitei nimpe lepe. 12 Ki onposi kirpolo mete wuso piripe enke peise olpe pepe, pe ma pirkilau paploupe topungou pelpe le yilfi pelpe re.

13 Le ise ilim winkem peiki, Ma Ili linaise piti ise ma ye yaupe, menmen re ma pesise peireise kolo olo. Wolo wem ise ye yaupe fei yolpepei, ise ma nou onposiepe menmen olpe piti ma nou yingiepe kolo olo. Wolo ise ma onposi piti kani onom yantei nemple le ise kane nemple. 14 Wusoli Il Lipi yeflipiye pe pirpei il nempleiye lipi polpepei, “Ye ma kani onom antowo metine nele watafei ye kani onom antei yotei lepe.” 15 Le wuso ise kapi wai pite siye, pelem re songou pepe, le ise yosi nemple re yeiwe nemple fei yolpepe, is ise ma kotopa isotei, waipiti ise ma yiri nemple olpe le ise ya yelengi.

Ku ma mingiepe wai liti Riri Teingi

16 Ki kirpei kolpepei, ise yusa Riri Teingi linuse le ise yingiepe wai pele, le ise miso onposiepe il olpe pite pultei enke peise kolo olo. 17 Wusoli il olpe wuso pultei enke peise le il pite Riri Teingi, pe miso pulpo nemple kolo olo, pe olo nemtei. Pe ma pura nemple le fei pepei ma pato polpepei, il wuso ise onposi piti ma yingiepe pepe, ise miso yingiepe kolo olo. 18 Le wuso Riri Teingi linuse piti waise enke, is ise yingiepe Il Lipi pite Moses pepe kolo olo.

19 Il olpe piti tef lepei lepe, pe olo pile alepe nimin. Ku mulwepe retape wem mete pingiepe piti paulelipe nimoure ausi, le pe pire nemple olpe watafei pelem. 20 Pe rautuwepe nimpe wuso papopo masi pite weni ririm olpe pepe, le pe meili nemple. Pe pura nemple le pe posinemple. Pe kelelai nemple, pirpelai nemple le pe onposi potei pirpolo pe lipi le mete nemple olo. Pe kare peite nemple le pe pire il pura nemple, 21 pe enke olpe piri nemple, pe paplei tipeluwi singe pepe le pe pini purungo, pe puro weni olpe le pe pingiepe menmen olpe fei polpepei. Ki il polise watafei nempis kinu lepe, mete piti pingiepe menmen olpe fei pepei pepe, Ma Ili ma luntoluwepe kolo olotei.

22 Wolo metine piti lingiepe wai pite Riri Teingi, le ma lingiepe piti kani onom lantepe mete nemple, le onom teingine, le onom malye, le lanri onom pele wem moingi falowo, le lailelepe mete re liripe teingipe, le le metine piti nel loli ilo ilo kolo olo. 23 Le metine piti lire yape, le le metine piti kotopa lotei lire il olpe. Le il lipi pepe, pe pirpei karipe il fei pepei re kolo olo. 24 Mete pite Krais Jisas pele pepe, il men nange olpe wuso enke pelpe ma onposiepe piti ma pingiepe pepe, pe olo paptei pa watafei Krais la laitei nimpe lepe. 25 Wusoli Riri Teingi wauku nempi liti mratei mingi wem wem, ku ma musa linunuku piti kosauku il teingipe piti mirpei re mingiepe. 26 Ku ma rautu kutou yaupe kolo olo, lo ku ma miripe enke pite ilim winkem nemple pouku olpe kolo olo, le ku ma enke falepe menmen pite nemple pelpe re kolo olo.

Copyright information for `ONG