Revelation of John 15

Ririm pire eti plen poungo te twinges, pe popori potei piti ma watepe mete piti tef moingi

Leye lo ki kulwepe menmen olo nempletei, pe fale paitei teplai yuwei. Ki kulwepe ririm pire eti plen poungo te twinges, pe kapi singe piti watepe mete piti tef moingi pire eti plen poungo te twinges. Le wem moingi fei pepei kere, fei oloye, Ma Ili ma nou onom kotu kolo oloye.

Le ki kuluwo menmen wata pirpolo peryai tipe lirkir luwo le le olo felkeletei, menmen re olo pile yaupe le weli loli lingio leinginim. Le mete wuso pirkilau plolpo pire morou wasene le nimpe lo menmen wuso palpowo mati pinio morou wasene lotei lepe, mete pepe pirkilau plolpo piringe le pe rautuwo kolo olo le nange lele wuso koponape le pe paptei pirpolo 666, nange fei pepei re pe paptei paitei topo lelpe kolo olo, mete fei pepe ki kulwepe. Pe pile mingo lite menmen wata pirpolo peryai tipe lirkir luwo lepe, le pe pesiepe hap watafei kita wuso Ma Ili watepe. Mete pepe, puro weni pite Moses, le metine piti lesio towa lite Ma Ili, le pe puro weni pite sipsip ninge, pe puro polpepei,

“Ili, ye Ma Ili singetei, towa leiye piti esio olo ilitei le le olo teingitei. Ye metine ili piti untoluwepe uf tef yeflipiye, le il peiye piti irpei re ingiepe olo tuwopou le pe punkom.
Ili, mete yeflipiye ma turwepe pireye le pe ma peila nange leiye. Ye yoteteiye onom peiye teingine felkele. Mete pite uf tef yeflipiye ma pau rautuye wusoli ye kosape piti ye ingiepe il tuwopou.”
Ki kulwepe menmen pepei re fei, ki nou kuntoli le ki kulwepe wata pirpolo wingi potei pungo tani winem lite Ma Ili lele ratei yuwei le winem kumpu pire siye topungou pengleine le pe kantu nuwo leinginim piti Ma Ili ma lirpei fale winem kumpu fei nepe, ki kulwene winem kumpu nepe nile alepe nimin yawi. Leye lo ririm pire eti plen poungo te twinges, pe kapi singe piti ma watepe mete piti tef moingi pire eti plen poungo te twinges le ki kulwepe naro winem lite Ma Ili lepe pau. Pe pafo olongou teingipetei olo pininiye le foiyou nele pire gol pesio, pe pari lifei neinepe onom popo pelpe. Leye lo siye wasem twinges te twinges piti pile malfem pire Ma Ili, nele lelpe watepe ririm pire eti plen poungo te twinges pepe, le watepe waifilengi piti pire gol pesiepe, pe pire eti plen poungo te twinges, le waifilengi gol pepe, olo fale pire wain tipe wala singe. Wain tipe wala singe fei lolpepei lepe, le lilepe singe pite Ma Ili wem le onom kotu piti watepe mete moingi. Le Ma Ili piti ratei lingi wem wem. Nange ili le singe pite Ma Ili pele, pe weitei pire tuwange le winem lite Ma Ili lepe, tuwange fale lenglei olo, le minemple re ma pinki pe winem lite Ma Ili lepe kolo olo. Pe ma pungariepe ririm wuso pire eti plen poungo te twinges pepe, pungariepe watepe mete piti tef moingi pire eti plen poungo te twinges, le wem moingi fei pepe kere, pe miso pinki pe winem lite Ma Ili.

Copyright information for `ONG