John 12

Maria uh Jisas ohe danong ham gapgwesi tom amotip ohe meng oh

(Matyu 26:6-13; Mak 14:3-9)

Gahan Pasopa dik rih Isrer ihir Isip ire hrepdapat hat patim Got oh pisusa iraire mong Kenannong pihip ohe dik oh patin dophei dah hatiprio rim Jisaso nuhur Jisas oh Rasaras ohnong pamsuhup Betani apteinong pipa. Ama apteinong saperhan Rasaras ihir tambenir Jisas ohnong amam mar den yah tit atendeingopa. Atemtiperhan Rasaras ohsi nuhur tongnotperhan Mata uh den kan mat sara den namdengop.

Namdiporhan arwap Maria uh gapgwesi san dara ama gapgwesi oh ruumsan yan sar mohopti tom san oh dara Jisas ohe tongnong amongop. Amotporhan ama gapgwe oh ap mohsi gapgwewi hangop. Hatporhan uh urhe kak bat ohsi ahirdeingop. Ahirmatporhan Jisas orhe namgit napisapat han nuhur tit han orhornong ma nang hatipra han Judas oh Epe. Yan ruumsan mohopti tom san moh it mohoma yan ruumsan dara borop han ihirnong panggeitin hatin moh kianorim be durket mandao ringop. Judas ohe ama giritip oh borop han ihirnong daham na giritipmur. Oh nuranure den mohom dapti ohe mani oh ohe bes teinong mat patim oh kat mani gapah ham dar deo ihpat han ohoh ameng oh ritipmur.

Giritporhan Jisas oh Ei. Go uhnong gipotipra. Norhe sein gapgwesi naham ha nitingwe rim inahahmur. Ihan uhnong gipotipra. Borop han ihir gursi dipwi pateprimur. Noh kakun dir pati ohoh ihan uh nohnong ma inahah oh yah hahmur pongop.

Rasarassi Jisas ihitnong tap mat sutpero ritpa ohe meng oh

Gahan ihir Jisas oh Rasaras ohe aptei oh patmur ritperhan Juda trun han ihir amrapti Gin Jisas orhe pamsuhup han Rasaras ihitnong wamtipero rim apingopa. 10 Aprisa wamara Jisas oh Rasaras ohnong pamsuhuphe daham trun kuuhan ihir Ohwi inahatin hatin han ma hapat dahangopa. Ihtiperhan Got ohe ap yawar hanat bok ire duuptei han ihir Kuuhan ihir Rasaras ohnong wamara Jisas ohe danongwi hapti moho. Ihan dir Rasaras ohsi tap mat sutiprohemur rim ihir meng ama wanin matpa oh.

Jisas ohe danong ham armi mar mandap ambutpa ohe meng oh

(Matyu 21:1-11; Mak 11:1-11; Ruk 19:28-40)

12 Gahan kimsidapat Jisas oh Jerusarem ap mutuhnong moh gin apripatmur ritperhan Pasopa dik hat inperim ma apdori trun ihir amrapti Gin dir ohe danong ham armi matpera gosham ihir irat te rinsi orhor gatmat marim Jisas ohnong mandap ambutinmat apingopa. Aprisa Jisas ohnong

Isrer dire kakhan moh Got orhe mengtei apirmuro. Got orhe yah mar bapkei mat papat han oh gin apirmuro.
rit armi mat mandap apingopa.

14 Armi mat apriperhan gahan Jisas oh donki tit ambura ohe bas tongnoma sangop. 15 Donki bas ma tongnotip oh rih ma brak matpa meng oh dam tarpatipmur. Ama brak matpa oh

Saion ap mutuh kuuhan gur kas hatipri. Wamtin. Gure Kakhan ham napapat han oh donki bas tongnom ama apir ohmur.
rim brak matpamur.
16 Ama brak matpa meng oh Jisas orhe namgit napisapat han nuhur sashe orhora; dahatinnong oh na dahat pateshemur. Gahan Jisas oh masas Got ohe patnong saporhan nuhur Mameng moh Jisas ohnong por brak matpa meng ma hapat. Gin ma brak matpa mengru arpin ohnong imtipa ma hapat dahatpamur.

17 Ihama Jisas ohnong ma armi mat apdapa oh rih oh Rasaras ohnong sein itiri oh Gin go masas marona potporhan ohe ma mashup oh han trun han ihir apris wamat patin mashupmur. 18 Gahan ihir wandeipti susa kat han ihirnong ameng oh potpamur. Potperhan ihir am hat patin ohoh Gin ihir armi mat mandap ambur apingopa. 19 Armi mat apriperhan Parisi ihir Gin kuuhan ihirnong moh wamtin. Kuuhan gonsi ihir mihat ohe danongwi ham ohnong armi matipririm dire baso ma potpa meng oh ihir gin amkara dam timbas meng namar ohe danongwi gonsi hat apripti moho ama gigoshatpa oh.

Grik ihir kat han tit Jisas ohnong Nuhur wamtiper potpa ohe meng oh

20 Gahan Pasopa dik oh Got ohe danong ham armi matpero rim Jerusarem ap mutuhnong ma ruhpa han ihiroh Grik ihirhe kat han tit ire tapnong ham ama ruhpamur. 21 Rusa gahan ama Grik ihir Pirip oh Gariri mong Betsaida aptei han ihiro rim apris ohnong Nohana. Nuhur Jisas ohnong wamtiprohemur pongopari. 22 Potperhan oh susa Andru ohnong ameng oh porpat ihithe aprisa Jisas ohnong Grik ihir gonong Nuhur wamtiprohemur naporiyahe pongopa.

23 Potperhan Jisas oh Grik ihir amam naham apriya ma hapat. Ihirnong panggeitin dik oh kakduup hah ma hapat daham Gin hanip brer nohnong amam armisi nahatin dik oh gin hayamur. 24 Noh arpin meng napotiprohmur. Gur kon gwenong dahatinmur. Kon gwe oh itperhan na marahanoh ama kon gwe oh orhap mong tem ohom patahar timbas hapatmur. Marahanoh gwe ohe watah oh timbas ham marasa dam trun timapatmur. 25 Amaru hat orhor hanip gurhe Noh norhe ina mama hat pat orhor hat patepraneng dahayahanhe kakdah morhor timbas hatiprimur. Noh kakdah ohe ina moh mandama eimat paten ohe dasi hatipraneng dahayahanhe ama ihat dahaya gur eimat paten dasi hat pateprimur. 26 Gur Dir Jisas ohe atamreindin danongwi hat sasipera dahayahanhe ama han gur nohsiwi sasiprimur. Nohsi ma sasipri oh nohe ma sasipra teinonghe gursiwi sasiprimur. Ihat saptin at ohhe gurnong Ihir ohsiwi tap hat tamrein saptio rim winsi han nahatipramur napongop.

Jisas oh Nohnong irat bok sur gar naham nadaptuhutiprimur ritip ohe meng oh.

27 Gahan kwihan Jisas oh nuhurnong Nohhe ihir nohnong inaham nitipriwa daham ma da ruumsupsi hat pat moh at ohnong At go dat namdatinmur potiprohda. Basra. Noh ama batbet da oh datinmat apdor ohoh ihan noh na gipotiprohmur napongop.

28 Naporpat At go gorhornong oh win isipsi han hatinmur pongop. Potporhan nuhur amrayaoh meng tit aw teidapat Dawa. Noh rih orhor ihirnong norhornong winsi nahatin dasi mat papatmur. Ginhe it winsi nahatin da matiprohmur por hangop. 29 Gipor hahhan orhe duup ma pati han kat ihir meng amrapti minggihim ama ihpat ohwa goshangopa; kat nuhur Es. Got ohsi pati han enser ihir tit meng tit ohnong ama por hah ohwa goshatpa.

30 Gigoshatperhan Jisas oh Ama ginapor hah meng oh nohnong ha am hatinoh rim na napormur. Gurnong ha am hatingwe rim ameng oh ama napor hah ohmur. 31 Gin Got oh kakdah mohe erer sam imtim dik oh hahmur. Gin kakdah mohe erer oh orhe hrepnongwi mar papat er han ohnong sum er mat darhetin dik hahmur. 32 Norhornong oh nadaptuhutiprimur. Nadaptuhutperhan noh kuuhan gonsi gurnong ruprup naham norhe hrepnongwi nahatipramur napongop. 33 Oh nohnong nadaptuhutiprimur mama napotip oh orhornong irat bok sur gar matipri ohe meng oh napotipmur.

34 Napotporhan ama tarmuriya kuuhan kat ihir Wa. Nure sawa meng ohra Got oh Dire namburin han darhetipramur ma ritip han oh dipwi pat hanmur riptin amraptimur. Oh dipwi pat han ohoh ihan go kuuhan ihir Hanip Brer ohnong irat bok sur garmar daptuhutiprimur ma ri oh Hanip Brer nihnong imtipriri por dahandeingopa. 35 Dahamtiperhan oh Gure has nahat indin han oh kakun patmur. Oh patin orhor has teinongwi hat sonmur. Patem oh saporhan kwitem hatporhan kinhat it has teinong son ina hatiprohemur. Ihan oh has nahat napapatin orhor has teinong hat sonmur. 36 Gure has nahat indin han oh patin orhor ohnong Ohwi inahatin hatin hanwa dahatinmur. Dahatperhan ama ihat dahaya gur orhe han hatiprohemur napongop. Napotporhan ihirnong atei mandama Jisaso nuhur susa ihir wanahatipri rim tremdipa.

Aisaia ohe ma brak matip meng oh arpin dam timdip ohe meng oh

37 Jisas oh Juda ire kintei orhor hanip dire na imtin hatin da deipatin Juda ihir wamar am ham orhor Ohwi inahatin hatin han ma hapat na dahashemur. 38 Ohe danong ma na hashe oh Aisaia ohe brak matip meng oh arpin dam timdipmur. Ma brak matip meng oh mamarumur.

Hanipyaha. Nuhur meng poripti orhor ihir amratinnong na amraptimur. Hanipyah gwe kasip oh wandeipti orhor dahatinnong na dahaptimur
rim ma brak matip meng oh dam timdipmur.
39 Aisaia ohe tit meng rim ma brak matip oh

Got oh Noh ire kinnong akwi deio ire da aban deio mat papatmur. Nohe ma imat papat oh ihir watahamo dahamo ham nohe danong hayarit noh ire danong ayah matiprarim noh imat papatmur
ritporhan brak matipmur. Aisaia oh Juda ire bok mar imat brak matip ohoh ihan ihir ohe danong na hashemur. Aisaia ohnong ameng oh ritporhan ma brak matip oh Krais oh armi dasi han hatipra daham Got oh ameng oh ritporhan brak matipmur.

42 Ameng ritporhan brak matip orhor Juda bap be pati hano duuptei hat pati hano kat han ruumsan ihiroh ohnong Ohwi nambur inahatin hatin han ma hapat dahatpamur. Dahatpa orhor Parisi ihirnong kasa ham Nuhur ohe danong hat patimur na rim kimiritpamur. Ama ihat kas ham kimiritpa oh Parisi ihir Hanip ihirdapat nuhurnong amam naham armi nahayahan yahnapmuro. Got oh nuhurnong amam naham armi nahahhanoh oh hanip ire armi nahapti ohe hrepdapat hat patmuro ihat dahapti han bap ihir ohoh ihan Nuhur ihat patimuro riyahan oh ihir amrama nuhurnong Ihat ma Jisas ohe danong hat pati han bap gur Got ohe ap yawar apnong moh na marasiprimur napotipri rim ihirnong kasa ham kimiritpamur.

Jisas oh Noh at ohe wanin meng orhor gurnong naporpatmur potip ohe meng oh

44 Gahan Jisas oh kasip mengteiwi Gur nohnong Ohwi inahatin hatin hanwa ma dahapti kuuhan gur nohnongwi na ginaporiptimur. Ma ginaporipti oh at nutanutnong tap mat ginaporiptimur. 45 Amaru hat orhor nohnong ma wanahapti guroh Got ohsi nuhutnong tap mat wanahaptimur. 46 Noh gurnong yah da ohsi has nahatin han hat apripatmur. Noh has nahatin han hat ma apripat oh nohnong Ohwi inahatin hatin hanwa ma dahapti han gurnong noh nambur has teinong naham has nahat napaptenmat apripatmur. 47 Noh kakdah han bap gurnong dahanaham nasatinmat na apripatmur. Gurnong nambur yah nahatinmatwi apripatmur. Noh ihat apripat ohoh ihan nohe meng amram ma na dindeipti gurnong dahanaham Moh er hanhe. Moh yah hanhe napor na nasapatmur. 48 Nohe mengnong na amram kom asaripti han gurnong kaput komdapat ma nasatipra meng oh patmur. Norhe mama naporpat meng orhordapat kaput mong pepe dik oh nasatipramur. 49 Noh norhe dahapat da meng orhor na naporpatmur. Norhornong nadarhetip han at orhor Go ihirnong Mameng moh mihat daham meng potinmura; mameng moh mimat potinmur napor am nahatporhan noh gurnong at orhe am nahat napapat wanin meng orhorwi naporpatmur. Imat naporpatin orhor na amrapti han gurnong gure ma na amrapti meng orhordapat kaput nasam inahatipramur. 50 At oh eimat paten inasi hatin ohe da meng oh naporpat ma hapat. Ihan nohhe At orhe naporpat wanin meng orhor potpor daham naporpatmur napongop.

Copyright information for `OPM