John 20

Jisas oh masas saporhan watah ma ban mat itwi wamtipa ohe meng oh

(Matyu 28:1-8; Mak 16:1-8; Ruk 24:1-12)

Gahan tuperipti dik Sabat oh timbas hatporhan kimsidapat Sande oh Makdara kuu ihir Maria uh kutwi kopen mong na dahat patin orhor masasa sein itiri tei ama apdap oh. Aprisa wandeioh sein sar kwei tan apatiri oh ama tanput pat hatip oh. Tanput pathan uh wamara orhe han ihirnong potporo rim it ama pip oh. Susa Jisas orhe namgit napisasuh han Saimon Pita ohsi; orhe bopor nahat napapat han nohsi nute patinong sakat apingop. Aprisa Epe. Hanipyah ohe sein ma itiri oh tanput pathemur. Sein oh ti na pathemur. Sein oh denong matiri nuhur hanhan hayamur napongop.

Napotporhan nuhut sein itiri teinong sakat pipa. Sakat susa nohri hat sakat susa tem duup amdapat tangras rim wandeioh watah tanwi patgop. Pathan Pita oh kom aprisa rongop. Rosa wandeingop. Wamara kak ma tein matiri watah oh orhe teinong mar ban mat it hangopri. Ina ma ban matiri watah oh orhe tei pat hangopri. Ihat pat hatporhan nohnong napotporhan nohhe ros wamara Arpin Jisas oh masas pi ma hapat dahatip. Ama dahatip oh rih Jisas oh it masapramur rim ma brak matpa meng oh orhe han nuhur na daham gahan wamar masas pihan dahatpamur.

Maria uhe Jisas ohnong wamtip ohe meng oh

(Matyu 28:9-10; Mak 16:9-11)

10 Gahan nuhut it kot marasa sein itin tei oh Maria uh yimapatin nuhut apnong pipa. Saperhan Maria uh yimat orhor tangras rim sein itiri temnong ama wamtip oh. 12 Wandeipat Got ohsi pati da enser yot ihit has watah yot tit ara tit oh Jisas ohe sein itiri ohe kak apit pemdapat ama tongnot pat hatip oha; tit oh aduup apit pemdapat ama tongnot pat hatip oh. 13 Ihat tongnot patimdapat uhnong Go kinham yimapat potperhan uh Nohe hanipyah ohe sein moh timbashan denong matao rim yimapatmur ama potip oh. 14 Pora tandapurkes rim wandeioh Jisas oh ama pat hatip oh. Pathan uh ama hanhan matip oh. 15 Hanhan matporhan oh Kuua. Go nihnong angmar yimapat potporhan uh Mama han moh ru nita han ohkin daham uh Hana. Go sein oh pisus wan tei ithanoh ma it tei oh napotinmur. Napotporhan noh dar itiprohmur ama potip oh. 16 Potporhan Jisas oh Maria potporhan uh orhor ma hapat daham potahat tamburkes rim Hibru ire mengtei Raponai ama potip oh. Raponai ma poripti oh Grik ire mengtei tisa poriptimur.

17 Raponai potporhan oh Noh at ohe patnong it na ruhum pat ohoh ihan go nohnong namarindipra. Go susa norhe namgit napisapat han ihirnong Oh it nohe atsi; gure itasi nohe Hanisipsi; gure Hanisipsi ohe patnong it rupatmur rihe potinmur ama potip oh. 18 Potporhan uh aprisa Nuhurnong Noh Hanipyah wandeimur napora urhe wandei mengo ohe por mengo oh orhe han nuhurnong napongop.

Jisas oh orhe han ire mutuh tandeit patin wamtipa ohe meng oh

(Matyu 28:16-20; Mak 16:14-18; Ruk 24:36-49)

19 Gahan Sande orhor kwihan Jisas orhe namgit napisapat han nuhur ap rosa Juda ihirnong kas ham ap oh pomat taputpa. Tapura patin Jisas oh nure mutuh moh pitap ham tandeit patgop. Tandeit patdapat We. Gure da oh kas hamo hapri. Gure da oh watahpei ham kimirit patenmur napongop. 20 Napora orhe bes sur apito atoheitem ban temo oh namgingop. Namgitporhan nuhur wamara orhor ma hapat daham da yah hama amam isipnap tit hatpa. 21 Hatperhan oh it Gure da oh manap ham kimirit orhor patenmur. Nohnong at oh Go nohe meng moh pot pisonmur napor ma nadarhetipru mat orhor gurhe ihat nohe meng mohsi pot pisonmur napor nadarherpatmur napongop. 22 Napora orhe nah pupuka oh pamrasa nuhurnong naprisa Gin noh gurnong Got orhe Yahsup oh napirmur. 23 Gurnong Yahsup mama napir ohe pe oh gur susa ihirnong Got oh ire er hat sapti ohe yan oh dat amdama it yansi na matipra ma hapat dahaya kuuhan ihirnong oh Gure er hat sapti ohe yan oh Got oh gurnong it er yan oh na napripramur porinmur. Poriyahan arpin ire er hat sapti yan oh dat amdama it yansi na deipramur. Gurdapat ire er hat sapti yan moh Got oh yan apripra ma hapat dahaya kuuhan ihirnong oh Gure er hat sapti ohe yan oh pat ohoh Got oh it guragurnong napripramur poriyahanoh arpin Got oh ama giporiya ihirnong apripramur napongop.

Tomas oh Jisas ohnong wamara arpin masas pat ma hapat dahatip ohe meng oh

24 Jisas oh kopenat nure mutuh ma pitap hatip oh orhe namgit napisapat han nuhur tit han Tomas Ditimas oh na patin pitap hatipmur. 25 Pitap hama pi tei nuhur Tomas ohnong Hanipyah ohnong nuhur wamtamur potpa. Potperhan oh Noh ohe bes ohe sur apit tem wamar tipan oh adarhero atoheitem hanat tem wamar bes adarhero indeihanoh noh arpin orhor ma hapat dahatiprohmur. Noh na indeihanoh gur dasuh hatahe dahat patepramur napongop.

26 Napora patimdapat tit Sande rima Tomas ohsi nuhur ap ros pomat taputpa. Pomat tapura ap ohom patin Jisas oh nure mutuh pitap ham tandeit patgop. Tandeit patdapat Gur da oh manap ham kimirit patenmur napongop. 27 Naporpat Tomas ohnong Nohan Tomas go bes sur tem moh wamara tipnerip oh nadarhero atoheitem hanat apit tem moh tipnerip nadarhero nahatinmur. Nahama go Oh na mashum pat ma hapat dahat pat danong ohri hatipra. Arpin oh masas patwa dahatinmur pongop. 28 Potporhan Tomas oh wamara Ai. Nohe Hanipyah Got go arpin masas pat ma hapat dahahmur pongop. 29 Potporhan Jisas oh Go gin nohnong wanahamwi ihat dahahmur. Kat kuuhan ihir nohnong na wanahat patim orhor Oh arpin ihat masa pat han ma hapat dahaprimur. Ama ihat patepri ihir amam yahnap dasi hat patepri ihirmur pongop. Pora sangop.

Mama brak matip meng moh ohe duuptei meng oh mohmur potip ohe meng oh

30 Jisas oh orhe namgit napisapat han nure kintei hanip dire na imtin hatin da ma namgit napisasuh meng oh ruumsan pat orhor kat meng mama brak dei ohmura; kat meng na brak deimur. 31 Nohe mama brak dei oh Gur Jisas ohnong Oh Got orhe Noh ihirnong ambutin han darhetipramur ma ritip han oh oh ma hapat. Orhor Got ohe brer ma hapat. Oh orhe kasip eimat paten dasi nahatin han ma hapat daham eimat paten dasi ha hatingwe rim noh mama brak dei ohmur.

Copyright information for `OPM