a2:2Kal 6:14
b2:3Umen 18:9
d2:6Efes 4:13
e2:7Rom 16:25; Kol 1:26
g2:11Sion 16:13-14
h2:14Sion 8:47; 14:17
i2:16Rom 11:34

1 Corinthians 2

Ahi Rie Lati keke Selusien onen Pol vi Anatin Ka en Keihoen onen Ninin Votut

Tuak ka ahinkuli keil en demkatien, navong numai ven kami keke mahit lein rendemien onen Ahi koa mul suai min kami koa kei vothot eni, narmaitei vatal selusien koa kas keke maleh meatin keil eni, vuo vatal selusien ten meteisauen ten out netan. Vuo, navong naro ral min kami, namumon rendemien onak keke maselus usil Iesu Kristo enges, ka mukave kei mat en aiveave vinat ir. a  Anatin, namundemi navit nirselus en etai mun tounah. Ka navong naro ral min kami, nalonge suval namerau enges ka namaleilei houlu en metauen. b  Hihiseien ka selusien keil koa nasani min kami, narvitentei vatal mormore selusien ten meteisauen ten out netan. Vuo. Navong naselus, mikilea keke vi anatin veni miles keihoen ten Ninin onen Ahi mul mum. c  Namumoni mukonek keke demkatien onami nal entei meteisauen onen meatin keil ten out netan. !Vuo! Demkatien onami hel en keihoen onen Ahi enges.

Meteisauen Onen Ahi Ka en Ninin Onen

Ka min Kristin keil koa amatu tuai en demkatien one, asa koa meviteni vi meteisauen. d  Ka rovitei meteisauen ten avong kosa vuo koa ka en hetetamen keil ten out netan, veni Ahi mul mumon keihoen one mai vi heisav enges. Ka meteisauen koa komai memul mevitehiteni vi rendemien onen Ahi koa mul suai, koa kei ling suaini ran meatin keil. e  Anatin, mulamu en avong koa Ahi mumon out netan, kei ling rendemien onen keke houmoni hetahos minir en sise ten meteisauen onen. Ka hetetamen keil ten out netan arkileatei rendemien onen Ahi. Veni munak availea eni, keil arvati kattei more Asuv orer en aiveave. Ka suval koa Tus Votut viteni,

“Asa koa arlestei veah,
asa koa arraengontei veah,
asa koa armundemtei veah,
kei varei vi tounah koa Ahi sak meseni tuai
ven koakeil envatien one mul en kei.”(Aes 64:4)
10 Ka minir, Ahi vothot en ileilien suai onen ka en Ninin onen. Veni Ninin onen mul lei lekaek en tounah vasi, ka kilea emun tounah vasi koa mul en huinev ten ileilien onen Ahi koa meatin sakras vailea eni. f  11 En vati sise koa ninin enges koa mul en meatin kilea en rendemien vasi keil onen, Ninin onen Ahi enges kilea en rendemien vasi keil onen Ahi. g  12 Ir rorkurtei ninin koa ten out netan. !Vuo! Ir rokur Ninin koa Ahi sani keke reheilea en tounah keil koa atahos koa Ahi sa maeni minir ka mumoni venir.

13 Sakini, navong komai meselus min kami, merselustei en selusien keil koa meatin enges ten out netan avisein komai eni ka en meteisauen one. !Vuo! Mevisein meatin keil koa Ninin onen Ahi mul en keil en tounah keil koa Ninin mul sani min komai. 14 Ka meatin koa Ninin onen Ahi romultei eni, kei long sesein tounah keil koa ka ven Ninin onen Ahi. h  Vati meatin koanek sakras vailea en tounah keil enek, avi varu enges mini, veni Ninin Votut enges kilea vahit luvat anatinien teni en rendemien onen. 15 Ir koa Ninin onen Ahi mul en ir, rokilea rovalei kilea en tounah vasi koa Ninin mul vothot eni minir. Ka meatin koa Ninin Votut tovuol ien, kei sakras vandem kilea enir. 16 Suval Tus Votut viteni, i 

“?Isei kilea rendemien onen Asuv?
?Isei kilea vahiseini?”(Aes 40:13)
Ka ir varei ekek koa rovi Kristin, ir rokur rendemien onen Kristo mul enir.

Copyright information for `PMA