1 John 2

Iesu Kristo Mul Selus min Ahi en Usite Orer

Onak eli keil, namul namutis selusien koanik va min kami keke mehermontei tisaen. Ka munak meatin tai mumon tisaen, meatin tai mul vesesal ven Ahi Tamer koa kilea vaselus vatal mini en usite orer, kei vi Iesu Kristo koa mal revi. Kei san moulien onen vi sanien votut vahul lat tisaen keil orer. Ka rosantei moulien onen ven tisaen orer enges. Vuo, sani ven meatin vasi keil en out netan.

?Ir rehelei kilea keke rokilea revi en Ahi hemukave? Navong rolong kat mengkatien keil onen, rokilea keke rovailea kei. Ka munak meatin tai mul viteni vit kei kilea en Ahi, ka kei rolong kattei mengkatien keil onen, kei vi uti liluvosien ka anatinien tovuol ien. Ka munak rolong kat selusien onen, mul rie keke ervat Ahi en vati sakien koa kei envati. En sakien koanik rolei kilea keke rokapil ral min Ahi: munak roviteni rovit rokapil ral min Ahi, rehoumoni mok keke ualien orer hesuval ualien onen Iesu Kristo.

Rehousil Mengkatien ten Envatien

Onak eli keil, namul namutis usil mengkatien tai koa mihousili, ka mengkatien koanik rovitei heite hau. Vuo, vi mengkatien matu koa vit, “Erhehathat ir.” Kei, mikuri tuai navong mikur rohtoh en demkatien onami en Iesu. Anatin, mengkatien matu koanik vi selusien koa milonge tuai. Ka mukos, hesuval koa mengkatien koa namul namutisi kosa vat min kami vi heite hau, veni roles anatinien teni mul en moulien onen Iesu Kristo ka en moulien onami emun. Mankoli ka sakien tatisa keil orer koa romul ien mulamu mul vuol, ka meneai ten anatinien koa romul ien kosa mul ritin keih.

Ka munak meatin tai mul viteni vit, “Inau naro en meneai onen Ahi,” ka en hati avong koanik tin kat tunali keil, kei mules veah en mankoli ten tisaen. 10 Ka kei koa envat tunali keil, kei ro en meneai onen Ahi anatin. En vati meatin koanek, tounah tovuol val ien koa vasakini vamot en tisaen. 11 Ka meatin koa tin kat tunali keil, kei mules en mankoli ten tisaen. Kei mul mual eni ka rolei kileatei out kave mul va ien, veni mankoli ten tisaen onen mul mutaluh koe meten.

Selkatien Va min Koakeil ten Sios Keke Avousil Sakien Keil koa Mal

12 Namul namutis vat min kami, koa misuval titiali onak kati keil en demkatien,
mivailea keke tisaen keil onami herkattei mun kami, Iesu Kristo sakin methos onen Ahi mul en kami.
13 Namul namutis vat min kami, tata keil,
veni kami mikilea kei koa ro tuai mulamu en tounah sav vasi.
Namul namutis va min kami, meatin hau keil,
veni en vaeen ten demkatien, mimuli Temat tuai.
14 Anatin, namul namutis vat min kami, titiali onak keil,
veni kami mikilea Ahi Tamer.
Namul namutis vat min kami, tata keil,
veni mikilea kei koa ro tuai mulamu en tounah sav vasi.
Namul namutis vat min kami, meatin hau keil,
veni demkatien onami keih ka selusien onen Ahi mul moul en kami.
Anatin, en vaeen ten demkatien,
kami mimuli Temat tuai.
15 Veni koanik anatin, envatien onami naltei en tounah keil ten out netan. Munak meatin tai envat tisaen keil ten out netan vuo en sakien keil teni, envatien onen Ahi Tamer romultei en tin 16 veni tounah keil ten out netan rokatei ven Ahi Tamer. Tounah keil ten out netan amukok: sakien koa meatin vit hekur tounah vasi koa envati; sakien koa envati hekur tounah vasi koa lehei meten; ka sakien tahasien ven tounah koa kuri. 17 Out netan ka tounah vasi koa meatin keil teni evati mul vuol; ka koakeil amusil kat rendemien onen Ahi asakras avavuol, keil imoul lisenges.

Selkatien usil Vativieh Keil en Iesu Kristo

18 !Titak keil en demkatien, Avong Ekor mai vesesal! Meviteni tuai min kami keke kei koa hehi vativieh en Kristo hemai; ka kosa, rolesi keke meatin houlu koa avi vativieh en Kristo akikistal tuai. Koanik rie lati keke Avong Ekor mai vesesal. 19 Meatin keil enek alokovein lahruaien keil orer veni arkapiltei vatal minir en anatinien koa rovuli kati. Veni vahit keil avapil vatal minir anatin, keil avatos vatal minir. Ka navong keil uva, rolei kilea suk keke tovuol en keil vahi etai enir.

20 Ka kami, Iesu koa vi votut sien kami en Ninin Votut tuai, ka kami vasi mikilea anatinien onen Ahi. 21 Sakini, narmutistei vahat min kami veni mirkileatei anatinien. Vuo, namutis va ven kami veni mikilea eni tuai, ka mikilea emun keke anatinien onen Ahi sakras voumon etai liluvosien.

22 ?Isei mul liluvos? Koakeil avit Iesu rovitei Kristo anatin onen Ahi, keil amul aliluvos. Meatin keil enek avi vativieh en Kristo veni arkultei anatin keke Iesu vi Natin Ahi ka Ahi vi Tamen. 23 Anatin, veni koakeil asesein Natin Ahi, asesein Tamen. Ka koakeil akul anatin en Natin Ahi, akul anatin en Tamen emun.

24 Sakini, selusien ten anatinien koa milonge navong mikur rohtoh en demkatien, mihekur kati hel en moulien onami. Munak mivuli kat selusien enek koa vit Iesu vi Kristo anatin, hesakin kami miheto miheapil hetal min Iesu, Natin Ahi, ka Tamen. 25 Ka munak reheto reheapil hetal min keilu, rehekur asa koa Iesu Kristo vat kati vasani minir: moulien ten lisenges.

26 Namul namutis min kami keke masel kat kami usil koakeil asak aval avaluvos kami koa asieni en ninin ten liluvosien. 27 Ka kami, Iesu Kristo sien kami tuai en Ninin Votut onen. Sakini, navong Ninin Votut onen mules en kami, kei enges kilea vahisein kami en asa koa vi anatin ka asa koa vi liluvosien. Mirvistei meatin etai mun hemai hehisein ris kami en tounah sav keil. Sakini, mihetos miheapil hetal Iesu Kristo, suval koa Ninin Votut visein kami eni tuai.

28 Anatin, onak eli keil, mihetos miheapil hetal min Iesu keke navong hekistal eris ka rehelomal en meten, rehermemoutei. 29 Sakini, veni mikilea keke sakien keil onen Iesu Kristo mal revi mok, kami koa mimul mimusil sakien koa mal revi suval kei mul rie lati keke Ahi sakin kami mimai mivi heite hau mivi titan kati.

Copyright information for `PMA