1 John 5

Demkatien en Iesu Kristo Mul Sakin Titan Ahi Keil Amulin Sakvisien Keil ten Out Netan

Meatin koa kul anatin keke Iesu vi Kristo koa Ahi sani, mul rie lati keke Ahi sakin kei vi heite hau vi titan kati. Navong meatin tai envat tata tai, mul envat titan emun. Sakini, rokilea keke ervat titan Ahi keil anatin, navong ervat Ahi ka rolong kat mengkatien keil onen. Ir rorie lat envatien orer min Ahi navong rolong kat mengkatien keil onen. Ka mengkatien keil onen rokeih tei minir, veni koakeil vasi Ahi sakin keil avi heite hau titan kati keil akilea avasesein sakien keil ten out netan. Demkatien orer en Iesu Kristo mul sakin ir rokilea rovalin sakien tatisa keil ka sakvisien keil ten out netan. ?Isei kilea valin tounah tatisa keil koa mul en out netan? Koakeil enges akul anatin keke Iesu vi Natin Ahi anatin.

Ahi Mul Vothot eni Keke Iesu vi Natnali Anatin

Iesu Kristo, Natin Ahi, vi kei koa ka en out nesa mita, ka koa arang rinduni en oai ka ran mue en matien onen. Anatin, Ahi vothot eni keke Iesu vi anatin ral min oai ka ara, rovi teis en oai. Ka Ninin Votut, kei varei mul vothot en anatinien usil Iesu minir veni kei Ninin vi vatte ten anatinien. Tounah etel mul vothot en anatinien koanek keke Iesu ka ven Ahi: Ninin Votut, oai, ka ara.
5:8 Rokilea keke Iesu vi Natin Ahi anatin en sise keitel enek: navong Ninin Votut mul vothot eni en moulien orer; navong Sion rang rinduni en oai Ahi selus; ka navong ran mue en matien onen, Ahi sakin out mai malikelik ka alu mulu.
Keitel vasi enek telsan rendemien vatte tas keke Iesu vi onen Ahi anatin.
Navong meatin etai mul viten tounah tai minir, rokul anatin eni. Ka navong Ahi mul viteni, koanek rehekul anatin eni hekeih imok. Ka kei viteni vit Iesu vi Natnali. 10 Sakini, meatin koa mul ling demkatien onen en Iesu Kristo koa vi Natin Ahi, kei kul anatin en selusien onen Ahi. Ka meatin koa rokul tei anatinien en asa koa Ahi viteni usil Natnali, kei les Ahi suval kei vi uit liluvosien. 11 Asa koa Ahi mul viteni keie: Ahi san moulien ten lisenges minir, ka mumon Natnali vi sise teni. 12 Sakini, meatin koa kur Natin Ahi en moulien onen, kei kur moulien ten lisenges. Ka meatin koa rokurtei Natnali en moulien onen, kei rokurtei moulien ten lisenges.

Sise ten Moulien ten Lisenges

13 Namul namutis va min kami koa mikul anatin en Natin Ahi keke miheilea mikur moulien ten lisenges tuai. 14 Sakini ronametau tei navong rova ven Ahi. Anatin, navong rovisi en tounah keil koa mal en rendemien onen, rokilea keke kei mul raengoni. 15 Ka veni rokilea keke kei raengon hisien keil orer, rokilea emun keke rokur ui hisien keil orer tuai.

16 Munak tai en kami les tunali tai vuo tunahin tai mumon tisaen, tahos hehis min Ahi veni. Ka Ahi helonge ka hehilesi ran sise ten matien ka heling risi en sise ten moulien ten lisenges. Ka meatin tei amumon vati tisaen koa hesan keil iha imat en Ahang koa sakras vavus, ka narvitentei keke kami mihehis min Ahi ven keil.
5:16 Tisaen keil enek asuval koa aselus usili en Mat 12:31, Mak 3:29, Heb 6:4; 10:28-29.
17 Anatin keke sakkalkalien vasi keil vi tisaen, ka tisaen tei mul koa sakras vasan matien ten lisenges min meatin.

18 Ir rokilea keke koakeil Ahi sakin keil avi heite hau koa vi titan keil armultei avahikit tisaen. Anatin, Natin Ahi mul lei kokoe en keil keke Temat koa vi uti tisaen sakras vasut keil. 19 Ir rokilea keke rovi onen Ahi, avaseini meatin sav vasi keil ten out netan amul en hen Temat. 20 Rokilea keke Natin Ahi mai en out netan ka san ileilien minir keke rovailea kei eris koa vi anatin. Ka moulien orer mul kapil ral mini koa vi Natnali, Iesu Kristo. Kei vi Ahi anatin, ka kei enges mul san moulien ten lisenges min meatin keil.

21 !Onak eli keil, mihelei kat kami keke minousiltei ahi keil taliluvosien!

Copyright information for `PMA