1 Kings 11

Solomon Viles Eisilin ran Iahova

1 King 11:1-5,7-13

Asuv houlu Solomon, envatien onen mul en ahin keil houlu ten kantri savsav keil. Kur natnahin asuv houlu ten out Isip. Evus, retalihe mun ral min ahin savsav keil emun: koakeil ten out Hit, ten out Moab, ten out Amon, ten out Edom, ka ten out Saedon emun. Solomon retalihe ral min keil, avaseini Ahi sel kat me-Isrel keil keke irtetalihetei hetal min koakeil aka en kantri keil enek. Ahi kilea keke munak umoni hemukonek, keil isakin me-Isrel keil ihiles rani ka usil ahi savsav keil. Solomon retalihe ral min natnahin asuv houlu keil handred oulu (700) ten kantri savsav keil. Ka atou sav keil onen arokol handred etel (300). Ahin keil ekek asakin Solomon viles ran Iahova. Sakini, navong kei mai vi ulmatu, ahin onen keil asakin kei viles ka vita netan min ahi ten kantri sav keil. Kei romusil kat revitei mun Iahova vakeih koa vi Ahi kati onen vasuval tamen Deved mumoni mulamu. Ka vita netan min ahi koa vi ahin onen me-Saedon keil koa isen 'Astata', ka min ahi onen me-Amon keil koa isen vi 'Molek' koa tisa revi mok en meten Iahova.

En hoi hou tai koa mul en usite ist ten taon ten out Serusalem, Solomon mumon ahor ten sanien tai min ahi tisa onen me-Moab keil koa isen 'Simos', ka ahor tei mun min Molek, ahi tatisaso onen me-Amon keil. Solomon mumoni vati tas min ahi vasi keil onen ahin keil onen. Kei mumon ahor ten sanien min ahi keil enek keke ahin keil onen koa aka en kantri savsav keil akilea avaha netan min keil, avanit senta vaha min keil en hisien, ka avasan sanien keil one min keil.

Ven sakien onen keil enek, Iahova vuroh kat Solomon. Avaseini Iahova, Ahi onen me-Isrel keil, kistal mini avong elu (2) vasel kati keke nahatei netan min ahi savsav keil ten kantri sav keil, Solomon rolong kattei ren ka viles esuk ran mengkatien keil onen. 11 Sakini, Iahova viteni mini vit, “Veni komumon rendemien onom keke korali vas hatkatien takeih onak ka mengkatien keil onak koa nasani minuk, kosa navat kati minuk keke nisav lat keihoen ten asuv houlu ran hem, ka nisani suk min meatin toumien onom tai. 12 Ka ven usite onen tata onom Deved, nirmontei sakien enek hekistal en avong koa komoul koro veah. Numoni suk hemai hekistal min natmali navong hemai hekur vulum hehi asuv houlu. 13 Ka nirsav lattei mari vatiamal keil vasi ten out Isrel ran hen. Vuo, nimaeni helosil kati veah mari vatiamal tanges veni namundem usil Deved koa vi meatin toumien onak, ka namundemi mun usil taon ten out Serusalem koa nalei kani vahi out kati onak.”

Iahova Kulat Keihoen Tei Ran Hen Asuv Houlu Solomon

1 King 11:26-33,40,42-43

26 Koanek vi tunien usil hetamen tai onen asuv houlu Solomon koa viles rani ka sesein keihoen onen, isen Sereboam. Tata onen mat tuai koa isen Nebat ten out Seredah en provins ten out Ifriem. Ka mama onen vi vatina tai, isen Seruah.

27 En avong tai, Solomon meng kat meatin keil onen avasak revi vieh koa keih koa ring koe taon ten out Serusalem ral min vali hou koa mul en usite koa ist. 28 Navong Solomon va vales umen keil enek, lesi keke Sereboam vi meatin hau tai koa mum tahos. Sakini lingi vi avat onen vangi meatin toumien keil koa aka en mari vatiamal onen Manase ka Ifriem.

29 Avong vahis muli, ka en avong tai, navong Sereboam lokovein out Serusalem ka mul mual en out tai koa vi mesaiuai, kei visu min provet tai ten out Saeloh koa mual kei sasen enges ka musin en eisin hau keil, isen Ahisah. Keilu enges lumul en sise, meatin sav keil atovuol. 30 Evus, provet enek kulat kot hau omon enek koa musin eni ka rali vasi vi samureite teindan elu (12).

31 Navong rali vasi evus, viteni min Sereboam vit, “En samure eisin ekek, keik kikur halualim (10) ihi onom veni Iahova, Ahi onen me-Isrel keil, mul viteni vit, 'Inau nisav lat keihoen ten hiasuvien ran hen asuv houlu Solomon, ka niling mari vatiamal halualim (10) ten out Isrel il en hem. 32 Solomon helosil kat koakeil aka en mari vatiamal onen Sudah enges hetal min koakeil emun aka en vatiamal onen Bensamin veni inau namundem usil tata onen veah, Deved, koa vi meatin toumien onak. Ka namundem kat out Serusalem emun koa inau nalei kani ran meteimal sav keil ten out Isrel keke vahi out kati onak. 33 Numon koanek veni Solomon sesein nau, ka va netan min ahi sav keil: min Astata, ahi koa vi ahin onen me-Saedon keil; min Kimos, ahi onen me-Moab keil; ka min Molek, ahi onen me-Amon keil. Solomon romusiltei sise onak ka long sesein nau. Kei mum kalkali ka rolong kattei rek vasuval tamen Deved mumoni mulamu.”

40 Navong Solomon raengoni, kei sak visi vouas Sereboam vamat. Ka kei lohosai va les asuv houlu ten out Isip koa isen vi Sisak. Sereboam ro en out enek va vio ... asuv houlu Solomon mat.

42 Solomon vi asuv houlu ten out Serusalem ka losil kat me-Isrel keil sua hanumau elu (40). 43 Evus, mat ka arahini en out Serusalem, taon onen tata onen, Deved. Ka natnali, Rehoboam, kur vulin mai vi asuv houlu.

Copyright information for `PMA