1 Kings 17

En avong enek, provet tai ro en taon ten out Tisbe en atan ten out Kilead, isen Ilaetsa. Ahi sila va selus min asuv houlu Ehab vit, “Inau koa nuva netan min Iahova koa moul, Ahi onen me-Isrel keil, navit meseni minuk en Isen keke ous hermustei mun ka tilep hetovuol sua vahis hetokol avong koa inau nihiteni.”

Navong selus evus, Iahova viteni mini vit, “Kimea ran out ekok ka kiha en usite koa ist hetokol Poal Kerat koa mul en ist ten Oaisal Sodan. En out enek, kito suai keke asuv houlu Ehab hervotintei keik. Titi oaisal en poal enek hesan oai minuk kimuni, ka nameng kat aman keil koa avise keil en 'revan' keke imai ikur anien am.”

Sakini, Ilaetsa mumoni suval koa Iahova meng kati mini. Kei va ro en out enek. Ka en visokon ka mendilah vasi keil, mun oai en titi oaisal ka revan keil alah veret ka vuseri an mai. Ro mukonek avati vahis va vio ... titi oaisal enek memes esuk, veni ous tovuol varei.

Iahova Sakin Veret An Provet Ilaetsa ka Vatina Tai Sakras Vavus

1 King 17:8-24

Navong oai omon provet Ilaetsa vus, Iahova viteni mini vit, “Kosa, kiha en meteimal ten out Serafat, vesesal en taon ten out Saedon koa romultei en atan onen me-Isrel keil. En out enek, nameng kat vatina tai koa rovitei ahin Isrel keke hesan anien minuk.” 10 Sakini kei va en out Serafat, ka navong mai vesesal en meteau ten taon, votin vatina tai koa mul lah ruain angosis. Navong lesi, visi vit, “?Kokilea kovasan etai hati oai minau?” 11 Ka navong va vakuri, Ilaetsa viso vit, “Ka kikur etai hati veret emun niani.”

12 Ka vatina vit risi mini vit, “!Aue li! Nasakras. Navat kati li anatin en isen Iahova, Ahi onom koa moul, veret tovuol emun eli teim. Asa koa mul teim, kap pulaoa tas koa mul en pesin teni, ka hati oel koa havivis mul en veite, ka anien sav keil tovuol varei li. Numai ekok malah ruain angosis keitel ekek keke niha ris teim, nisak mesen hati anien vahi anien ekor eli amal min natkuli. Hevus, amai heat vini komal heha vio ... melhematmat esuk.”

13 Ilaetsa vit risi mini vit, “Konandemkotei. Kiha kumon asa koa koviteni. Ka helamu, kumon hati veret tai ka kikur risi hemai minau. Hevus, hati koa mul, kumoni hehi amil min natmali. 14 Kiha kumon asa koa naviteni veni Iahova, Ahi onen me-Isrel keil viteni vit, 'Pulaoa sakras vavus ran pesin koanek, ka vei oel sakras vamemes heha vio ... inau, Iahova, nisakin ous hous hekas tounah vasi en out netan.'”

15 Sakini, vatina va ris teim sen ka mumon asa koa Ilaetsa viteni mini. Ka lesi keke, anatin eli, anien vinvin min keitel vasi ten avong enek, ka ten avong houlu emun. 16 Suval koa Iahova viteni min Ilaetsa, pulaoa sakras vavus ran pesin, ka vei oel sakras vamemes.

17 Avati vahis muli, ka natin vatina koanek mesai. Mesaien koanek muasi va vio ... sehien onen vus varei ka mat. 18 Sakini vatina enek mai les Ilaetsa ka viteni mini vit, “!Aue li! ?Meatin onen Ahi, vensa komumon koanek minau? ?!Mukave, keik kumai venau kovoumon tisaen keil onak vamai en mesaiuai, ka keke kovoumon natkuli vamat!?”

19 Sakini, Ilaetsa viteni mini vit, “San natmali minau.” Kulati ran hen mama onen, vousi vina nesa en teim va en out tamatilien onen, ka lingi matil en avet onen. 20 Evus, kei mis ven Iahova vit, “?O Iahova, Ahi onak eli, vensa kopurun moulien onen vatina koanek? Kei lei kat revi nau, ka keik, kokulat moulien onen natinali. ?!Vensa komumon koanek!?” 21 Evus Ilaetsa retengeiril netan ka mutelan hen keilu en aven ehon enek. Mumoni mukonek hatte etel ka vis min Ahi vit, “!O Iahova, Ahi onak eli, san moulien onen ehon ekek vamai ris eni!” 22 Ka Iahova long hisien onen Ilaetsa ka san heite ten hisien onen. Sakini ehon enek leh ris eang ka moul.

23 Evus, Ilaetsa leh lat ehon enek, vousi va, san risi min mama onen ka viteni mini vit, “!Les visi! !Natmali moul enges!”

24 Sakini vatina enek vit kesi mini vit, “!Namasmasuk houlu mok! Kosa nalei kilea keke keik kovi meatin tai onen Ahi, ka selusien onen Iahova koa kistal ka en ongom vi anatin.”

Copyright information for `PMA