1 Kings 19

Iahova Vothot en Kei min Ilaetsa

1 King 19:1-18

Navong Ehab mu ris va vales ahin onen, Sesebel, run mini usil tounah keil koa Ilaetsa mumoni, ka mukave mu vinvini provet keil vasi onen ahi Baal ral min naef tavaeen. Sakini, Sesebel tin tisa houlu ka san selusien va min Ilaetsa vit, “Navat kati keih keke nuasuk kimat hesuval koa komumoni min provet onak keil. Ka navong nirmumontei heha hetokol mendilah visuvong, ahi onak keil akilea uas nau nimat.” Navong Ilaetsa kur longlongien koanek, kei metau houlu ka lohosai. Keilu meatin toumien onen, luva en taon ten out Bersiba en atan ten out Sudah.

Evus, Ilaetsa va ling meatin toumien onen en out enek,
ka, visokon rokol mendilah, kei mual sasen enges va en out volvol. Evus, rondan en nimal ten vatiei tai ka longe tisa, vit vamat enges. Sakini vis Ahi vit, “!O Iahova, moulien onak keih varei ka ekrovattei mun mamoul. Tahos imok kikulat moulien onak ka kuas inau nimat.”

Navong vis evus, kei matil en nimal ten vatiai koanek ka matil usai. Hatte tas, angelo tai mita rokoli ka viteni mini vit, “Mea, anian.” Navong Ilaetsa lele rahiti, kei les veret ral vei oai tai mul vesesal ven vatin. Sakini kuri, kani ka muni. Evus, kei matil eris. Evus, hatte tai ris, angelo onen Iahova mita rokoli ka vit, “Mea, anian. Munak kirkaniantei, ualien onom hekeih ramat minuk.” Sakini, Ilaetsa mea, kanian ka mun hati oai. Anien enek san keihoen mini voual en meneai ka vongien. Avong hanumau elu (40) romusehtei, mual va vio ... rokol Vatihou Saeon koa vi vatihou votut onen Ahi. En out enek, kei votin valengeihat tai, ka va matil ien.

Evus, Iahova selus mini vit, “?Ilaetsa, komul komumon sa ekok?”

10 Ka kei vit kesi mini vit, “O Iahova, Ahi ten out nesa, en moulien vasi onak, namum keih minuk. Ka me-Isrel keil aviles eisile ran hatkatien takeih koa komumoni ral min keil. Amu lin ahor ten sanien keil onom, ka amu vinvini provet keil vasi onom en naef tavaeen. !Inau sasok namoul, ka keil avit avouas inau mun mamat!”

11 Sakini Iahova viteni mini vit, “Ha hae, kilomal en hoi hou keke kiles nau navong nimai nili.” Ka navong ro veah en valengeihat, Ilaetsa long eang takeih tai mea koa sakin hou keil apas ka muti lin ahat keil ... ka Iahova romultei ien. Navong eang va, Ilaetsa long alu tai kulul ... ka Iahova romultei ien. 12 Alu vus, Ilaetsa les ahang tai kistal ka mukan ... ka Iahova romultei ien. Ahang evus, kei long rea tai koa mul selus merau. 13 Ka navong Ilaetsa longe, kei ling suain nan en kot omon ka va hae, mulomal en metareh ten valengeihat. Ka en out enek, rea koanek viteni mini vit, “?Ilaetsa, komul komumon sa ekok?

14 Ka kei vit kesi mini vit, “O Iahova, Ahi ten out nesa, en moulien vasi onak, namum keih minuk. Ka me-Isrel keil aviles eisile ran hatkatien takeih koa komumoni ral min keil. Amu lin ahor ten sanien keil onom, ka amu vinvini provet keil vasi onom en naef taveen. !Inau sasok namoul, ka keil avit avouas inau mun mamat!”

15 Evus, Iahova viteni mini vit, “Kiha ris, kusil sise onom. Kiha en out volvol en atan ten out Damaskas ka kihotin meatin tai, isen Hasael. Navong kovotini, kitah oel en vatin vatie lati keke kei hemai hehi asuv houlu ten out Siria. 16 Hevus, kihotin meatin tamun, isen Sehu, natin Nimsi, ka kitah oel en vatin vatie lati keke hemai hehi asuv houlu onen me-Isrel keil. Evus, kiha en meteimal ten out Ebel Mehola, ka kihotin Elisa, natin Savet. Kitah oel emun en vatin vatie lati keke kei hemai hekesuk hesuval provet onak. 17 Navat kati keke koa keitel ekek telhou motein kantri onak hetal naef tavaeen oneatel. Koakeil alohosai ran naef onen asuv houlu Hasael, Sehu houas keil imat. Ka koakeil alohosai ran naef onen Sehu, Elisa suk houas keil imat. 18 Ka avaseini koanek hekur out, inau naring koe meatin keil taosen oulu (7000) amoul veni keil amul amusil kat nau. Koakeil enek, arvatei veah netan min ahi Baal ka armusmustei veah nana keil onen.”

Ilaetsa Rie Lat Elisa Vamai Vahi Provet Koa Vakesi

1 King 19:19-21

19 Sakini Ilaetsa va, ka votin Elisa, natin Savet. Kei mul mum en mari ah tai ral min meatin sav keil koa amul aviles atan en aho keil koa buluk keil alehei.
19:19 Veni atan one keih, meatin keil ten out enek amumon buluk keil ose aleh aho keke vahiles atan.
Vangi buluk teindan elu (12) amul amum lualu. Ka koa katau en keil vasi, mul en hen Elisa. Sakini, Ilaetsa mai vesesal veni ka muli. Ka navong muli, kei son kot omon mutaluh koe, vatie lati keke lei kan kei vousili ka vakesi.
20 Hatte tas, Elisa lokovein buluk keilu osen ka muloh musili ka visi vit, “?Nakila maselus kor min tata ka mama onak? Hevus, nusiluk.”

Ka Ilaetsa vit kesi mini vit, “Tahos. Narring koetei keik. Kiha mau kumoni ka kindem usil asa koa namumoni minuk.”

21 Sakini, Elisa va ris ven buluk keilu osen, muas keilu lumat, ka rei pahas kat koa lulehi vahi av. Evus, lengas buluk keilu ka sani min meatin keil akani. Navong akanian evus, Elisa mea ka musil Ilaetsa suval meatin takataunien onen.

Copyright information for `PMA