1 Kings 3

Asuv Houlu Solomon Vis Iahova Vasan Meteisauen ten Losilkatien Mini

1 King 3:3-15; 4:20-21,25

Solomon envat Iahova ka musil kat asa koa tamen Deved viseini eni. Ka kei san sanien votut keil ka munit senta en hoi hou keil veni Eim Votut onen Ahi tovuol veah.

En avong tai, Solomon va en out Kipion keke vasan sanien votut vaha min Ahi en mari ahor en out enek koa houlu mok mulin ahor ten out sav keil. Ka en out enek, kei meng kati keke avouas buluk keil hehi taosen tai (1000) ka avanit lin keil en ahor enek en avong tas. En vongien enek, Iahova mai selus mini en matil vovoien tai vit, “Asa koa emvati, kihis inau eni, ka nisani minuk.”

Solomon vit kesi mini vit, “Lisenges, keik korie lat mari envatien onom min tata onak Deved koa vi meatin toumien onom. Komumoni mukonek veni kei vi meatin tai koa musiluk ral min moulien vasi keil onen, sakien onen mal, ka rendemien onen mutolas en metom. Ka kosa emun, kumules korie lat envatien onom mini en sakien koa kosan ehon tai mini vakur vulin. O Iahova, Ahi onak, keik komaenau makur vulin tata onak mamai mahi asuv houlu, avaseini navi meatin hau tai ka narkileatei malosil kat meatin keil hemukave. Keik koling nau navi meatin toumien onom mato luhu en vangi meatin keil koa kolei kan keil ka kosakin keil umai avi houlu ramat keke meatin sakras vahuli vasin keil. Sakini, navisuk kovasan meteisauen keke malosil kat revi meatin keil onom en sise koa mal keke malei kilea asa koa tahos ka asa koa tisa. ?Veni munak kirkatauntei nau, nilosil kat meatin onom keil koa avi houlu mok hemukave?”

10 Navong Ahi Asuv long hisien onen Solomon, kei si houlu veni. 11 Sakini, viteni mini vit, “Nasinau keke kovis nau ven meteisauen kovalosil kat revi meatin keil, ka korvistei nau masan moulien koa tetaveah, vuo mane, vuo matien onen vativieh keil onom minuk. 12 Sakini, inau nisani minuk asa koa kovis inau eni. Anatin, meteisauen koa nisani minuk helohlin meteisauen koa meatin sav keil koa amulamu enuk akuri, ka helohlin meteisauen koakeil ikatau enuk ikuri. 13 Ka tounah vasi koa korvistei inau eni, keil emun nisani minuk. En avong vasi koa komoul koro, keik kikur houhouen ka tounah vasi keil onom helohlin asuv houlu savsav keil ten out netan. 14 Ka munak kilong katnau ka kusil kat mengkatien keil onak hesuval koa tata onom Deved mumoni, inau nisakin moulien onom hetaveah.”

Navong Solomon muli mea, kilea suk keke Ahi selus mini ka en matil vovoien tai. Evus, va ris Serusalem, ka mulomal vesesal ven Bokis ten Hatkatien Takeih onen Iahova. En out enek, Solomon muas buluk koa ka munit lin keil en ahor keke vahi sanien votut onen min Ahi. Evus, muas buluk tei mun keke vahi sanien ten lahruaien ral min Ahi ka reh lat tei vuseri keil teni keke voumon mari anien tai ven hetetamen keil onen.

15 

Copyright information for `PMA