1 Peter 2

Ahi Mul Mumon Ir Romai Rovi Vangi Meatin Votut Tai

Veni Ahi sakin kami mivi heite hau ka en selusien onen, minoumontei mun sakien tatisa keilek: vurohien, sakluvosien, hieluen, karien, ka sakien koa mimutolas enges en hilivemi. Sakien onami heteisav hesuval tivava hau keil koa evati avasusu en more anien kati ae. En vati sakien koanik, veni Ahi mutut kami tuai, emihehati mok mivakur tamun en anatinien onen koa hesakin demkatien onami hemoul hemai hematu revi. Mihoumoni hemukonek veni “mikat visi tuai en moulien onami keke Ahi Asuv tahos imok.”
2:3 Sam 34:8


Amai vesesal ven Asuv Iesu, koa suval vatiai
2:4 Selusien kati vit 'ahat' veni me-Isrel keil amumon eim ome en ahat, ka ir romumoni en vatiai keil.
tai koa mul moul. Meatin houlu alei seseini avit rotahostei, ka Ahi lesi tahos imok ka rie lati vi vatiseng ten Eim Votut onen.
Ka kosa, Ahi envati voumon Eim Votut onen en moulien onami keke Ninin onen vato ien. Sakini, mihemaen moulien onami mini keke mimai misuval pos keil teni koa mul moul. Ka en Eim Votut ten demkatien enek, mihoum min Ahi hesuval pris keil onen koa mihesan sanien votut eni. Ven asa koa Iesu Kristo mumoni venir, Ahi si kei ven sanien votut keil enek ten demkatien onami koa vi sakien tetahos keil onami. Koanik suval asa koa Ahi vit usili en Tus Votut vit,

“Milesi, inau naling pos tai en out Serusalem,
kei narie lati keke hemai hehi more vatiseng ten Eim onak.
Ka meatin vasi keil koa aling desien one eni,
asakras avahotini keke aling desien one heisav enges.”
2:6 Aes 28:16

Min kami koa mikul anatin eni, vatiseng koanik vi moreite mok. Ka min koakeil arkultei anatin eni, suval Tus Votut viteni,

“Pos koa meatin keil toumien alei seseini,
kei varei mai vi more vatiseng kati ten eim mulin pos sav keil.”
2:7 Sam 118:22

Ka Tus Votut viteni mun vit,

“Pos koanik, meatin keil isavoi eni.
Anatin, keil isavoi ka imot varei eni.”
2:8 Aes 8:14

Keil amusavoi veni arkultei anatinien en selusien onen Ahi ka arlong kattei. Koanik musil etin rendemien keil koa Ahi ling kati hekistal en keil.

Ka kami, mivi vangi meatin tai koa Ahi rie lati. Kei vi Asuv Houlu ka mivi pris keil onen.
2:9 Eks 19:5-6; Dut 7:6
Anatin, mivi meatin keil ten kantri koa vi votut onen Ahi, koa rie lat kami mivahi onen kati keke mivahati lat isen ka mivahit usili min meatin sav keil. Anatin, rie lat kami keke mivahit usil kei koa vise lat kami ran mankoli ten tisaen ka ling kami mivato en more meneai onen.
10 Suval asa koa provet Hosea viteni vit,

“Mulamu, mirvitei meatin keil onen Ahi,
ka kosa, mivi meatin keil kati onen.
Mulamu, mirkurtei enmahisien onen Ahi,
ka kosa, mikur enmahisien onen.”
2:10 Hos 2:23

Sakien onen Meatin Keil onen Ahi Navong Akur Sakvisien Keil en Out Netan

11 Tuak onak eli keil en demkatien, kami miro en out netan ekek suval heou keil veni mivi horetan kati ten out nesa. Sakini, napeah kami mok, minoumontei sakien tatisa keil ten out netan vasakin avemi enges valonge vatahos eni, veni sakien vasi keilek mul vae ral min moulien ten demkatien onami ten out nesa. 12 Navong miro ral min koakeil areingeingen Ahi, sakien onami hetahos imok. Hesakini, navong keil asak visi avaselus karen kami ven sakien tatisa tai, keil ilei kilea mormore sakien keil onami. Ka sakien tetahos onami hesakin keil ihat lat isen Ahi en Avong ten Hakot koa kei hemai hesan hakot min meatin vasi keil.

Meatin keil onen Ahi Itie Sakien ten Houhouen min Hetetamen Keil ten out Netan

13 En vati rendemien koanik, mihesakin isen Asuv Iesu hehina nesa en meten hetetamen keil ten out netan. Sakini, miheling rendemien onami heha netan keke mihoum housil rendemien onen koakeil alingi keke avalosil kat meatin keil: avaseini kei hetetamen imok suval asuv houlu tai, 14 vuo kei vi avat ten kavmen koa losil kat out keil. Veni asuv houlu enek rie lati keke vasan hakot min koakeil amum tisa ka vasan masmasien min koakeil amum tahos. 15 Mihoumoni hemukonek veni Ahi envati keke sakien tetahos keil onami hesakin koakeil avi unoun koa aselus vau usil ir avahati keil en selusien keil one. 16 Anatin keke mirvitei slev one, veni Iesu sakin kami mimaluv tuai. Ka minandemtei minahit mikilea mivoumon tounah vasi, ka tisaen keil emun, veni mimaluv ran tounah vasi ten out netan. Vuo, tahos imok mihoum hesuval mihehi slev keil onen Ahi. 17 Sakini, mihehouhou min meatin vasi keil ka emi hehathat tuami keil en demkatien. Mihemot min Ahi ka mihehouhou min asuv houlu ten out Rom.

Eisisil Toumien Keil Itie lat Sakien ten Houhouen min Masta Keil One Suval Iesu Mumoni Navong Kur Mahien

18 Kami slev keil, mihoumon rendemien onami heha netan keke mihoum housil rendemien onen masta keil onami ka mihesan houhouen hemarite min keil. Minoumonteis min masta keil koa sakien one tahos, mihoumoni emun min koakeil sakien one keih. 19 Veni munak mikur mahien keil koa romaltei en sakien ten merauen veni mimusil Ahi, Ahi helele hetahos en sakien onami. 20 ?Ka munak amuas kami veni mimumon tounah koa tisa, asa tahos eni? !Tounah tovuol! Ka munak mikur mahien keil, mukos mimum tahos, Ahi hesi kei ven kami ka helele hetahos en kami veni.

21 Anatin, Ahi rie lat kami keke mihekur mahien keil en rendemien koa netan, suval Iesu Kristo emun kur mahien ven kami en rendemien koa netan. Tahos keke mihendem kat sakien keil onen ka mihelisungeini. 22 Tus Votut vit usil sakien onen vit,

“Kei romumontei tisaen,
ka selusien taliluvosien rokistaltei ien.”
2:22 Aes 53:9

23 Anatin, navong aselus kareni, Iesu rovit kes etai selusien tatisa min keil.
2:23 Aes 53:7
Ka navong kur mahien en he, rovitentei vahit hesa kesi min keil. Vuo, kei ling usite onen en hen Ahi ka mudesini keke kei hesan hakot koa mal min keil.
24 Iesu Kristo, kei varei, kur vasin mahien ten tisaen keil orer en aven navong murur en aiveave.
2:24 Aes 53:4
Matien onen sakin ir romaluv ran keihoen ten tisaen keke rokilea rovousil sise koa mal. Ka, manu keil koa kuri en aven sak revi avemi.
25 Mulamu, kami misuval sipsip keil koa avupuol en sise one,
2:25 Aes 53:6
ka kosa, kami mimai ris mimusil Iesu, Meatin ten Sipsip Keil ka Kei koa mul Lei Kokoe en moulien onami.

Copyright information for `PMA