1 Samuel 10

Navong Sol mai veni, Samuel kur vei oel tai, ka mutahi en vatin. Evus, ling hen eni ka viteni vit, “Kosa, Iahova rie latuk keke kimai kihi asuv houlu kovalosil kat meatin keil onen ka kovating koe keil ran vativieh keil one.”

17 Katau en tounah enek, Samuel vise ruain me-Isrel keil keke avahisu min Iahova en out lu ten out Mispah. 18 Navong umai out tas, kei viteni min keil vit, “Iahova, Ahi onen me-Isrel keil, mul viteni min kami vit, 'Inau nges, nalah lat kami ran atan ten out Isip ka ran he. Ka navong meatin keil ten kantri sav keil amum keih en kami, inau nalah lat kami ran he emun. 19 Inau navi Ahi onami koa mul mutut kami ran mahien keil onami ka avong takeih keil emun. Ka kosa, misesein losilkatien onak ka mivis nau masan asuv houlu tai min kami. Mukonek, almai, mihelomal ekok en metok housil mari vatiamal keil onami. Evus, mihetiti vas kami housil titi amal keil koa mika ien.”

Sakini, Iahova viteni min Samuel keke hehotin asuv houlu onen me-Isrel keil en sakien koa aleh eis. Ka Samuel mumoni en mari vatiamal keil, ka leh isen vatiamal onen Bensamin. Mumoni min titi amal keil, min famle keil ka min meahos keil emun ten famle koanek va vio ... Samuel leh isen Sol. Ka navong uva avahotin Sol, avotini ro suai en out koa meatin keil aling ateili one ien veni kei metau.

24 Evus, Samuel mulamun Sol va mulomal luhu en meatin keil ka viteni min keil vit, “Meatin koanek vi kei koa Iahova rie lati keke vahi houlu valosil kat kami. Meatin tovuol emun en kami vasuval kei.”

Navong alesi, meatin vasi keil avisohiso keih avit, “!Kei vi asuv houlu onomai, losilkatien onen hel hetaveah!”

Navong Sol mai vi asuv houlu onen me-Isrel keil, sua onen vi hanumau tai ka halualim emun (30). Ka me-Isrel keil koa arsitei keil ven hiasuvien onen ka aselus kututi. Ka kei vise ruai meatin tavaeen keil ten out Isrel ka mulamun keil uva avavae vatal me-Amon keil ka amu lin keil. Sakini, me-Isrel vasi keil asi keil suk ven hiasuvien onen.

Copyright information for `PMA