1 Samuel 17

Deved Mu Vini Kolaeot

1 Samuel 17:1-4,8-11,13-16,20-27,31-37,40-52

En avong enek, me-Filistia keil alah ruai keke avavae vatal min me-Isrel keil. Umai vesesal en taon ten out Sokah en atan onen koakeil aka en mari vatiamal onen Sudah. Keil amumon votevav keil ome luhu en taon ten out Sokah ka taon ten out Aseka, en out koa avise en Efes Damin. Ka Sol ka me-Isrel keil, keil emun alah ruai ka amumon votevav ome en Sesai Elah. En out enek, keil asak mesen keil keke avavae vatal min me-Filistia keil. Me-Filistia keil amul en usi hou tai, ka me-Isrel keil amul en usi hou sav, ka sesai mul vas keilu.

Evus, avkeih tai tavaeen ten out Kat kistal ran out koa me-Filistia keil amumon votevav ome ien, isen Kolaeot. Kei vi hetetamen imok en meatin tavaeen keil one ka taveah ramat, mulin mita etel (3).

Kolaeot mai mulomal ka visohiso keih eva min me-Isrel keil vit, “?Vensa kami vasi misak mesen kami keke mivavae? Tahos imok keke kami mihetie lat etai en kami keke vamai vavae en usite onami, ka inau, nivae en usite onen me-Filistia keil. Munak kei hevae helin nau ka houas nau nimat, komai vasi mehemai mehehi slev keil onami. Ka munak inau, nivae nilin kei ka nouasi hemat, kami vasi suk mihemai mihehi slev keil onomai. 10 Kosa, nasan selusien koanik vat min kami meatin tavaeen onen me-Isrel keil: munak etai en kami mundemi keke kei vi ame, kei varei hemai melhevae.”

11 Navong Sol ka meatin keil onen alonge mukok, ametau houlu.

13 Natin Tiese etel koa telmulamu en keil, telva telmusil meatin tavaeen keil onen Sol. Koa moeite en keil, isen Eliab, koa katau eni, isen Abinadab, ka koa vi etel en keitel, isen Samah. 14 Ka navong keitel enek telro ral min Sol, Deved, koa vi tasikor en keil, 15 kei mum min Sol suval eiloheh takataunien onen. Ka en avong koa, kei va ris teim sen en out Betlehem valosil kat sipsip keil osen tamen.

16 En visokon ka mendilah keil vasi va rokol avong hanumau elu (40), Kolaeot mai selus kekar en me-Isrel keil.

20 Avong tai, en visokon semau, Deved mea ka lokovein sipsip keil osen tamen en hen meatin sav valosil kat keil. Evus, lah anien koa tamen meng kati mini vakuri vaha min tunali keil. Navong rokol out ten vaeen, vi avong varei koa me-Isrel keil amul asak mesen keil keke avaha en out ten vaeen. Ka navong uva, keil avisohiso keih va kat vativieh one keil. 21 Meatin tavaeen keil ten out Filistia ka koakeil emun onen me-Isrel keil umai amulomal en vule, ka alei mamah en keil keke avavae. 22 Evus, Deved lokovein anien koa lahi mul en hen meatin koa mul lei kokoe en ateili keil onen meatin tavaeen keil. Evus, kei muloh va vales tunali keitel en out tavaeen ka vahis revi keitel keke telro mukave.

23 Ka navong kei mul veah selus ral min keitel, Kolaeot mai ris mulomal, ka selus kekar en me-Isrel keil suval koa mumoni lises. Ka Deved longe suk. 24 Navong me-Isrel keil ales Kolaeot, ametau houlu ka alohosai. 25 Keil aviteni min keil eris avit, “!Ei telmali! ?Miles meatin eke? Avong vasi kei selus kekar minir me-Isrel keil. ?Ka miraengoni? Asuv houlu Sol vat kati keke hesan mari sanien tai min meatin koa houasi hemat. Ka vat kati mun vit hesan natnahin hehi ahin onen. Ka kei, hetal min titi amal onen, keil irvultei mun takis.”

26 Deved vis meatin keil koa amul vesesal veni vit, “?Meatin enek koa rokileatei Ahi mundemi kei vi isei keke vamai vaselus kekar en meatin tavaeen keil onen Ahi koa moul? ?Munak meatin etai houasi hemat ka hekulat memouen ran me-Isrel keil, isan asa varei mini?” 27 Sakini, keil avit kilea mini asa koa Sol vat kati vasani min meatin koa houas Kolaeot hemat.

31 Meatin keil koa along asa koa Deved viteni, ka uva avit meseni min Sol. Sakini Sol sisil eni. 32 Navong Deved va lesi, kei viteni min Sol vit, “Asuv, kami minametauntei meatin koanek ten out Filistia. Inau niha nivae hetal mini en usite orer.”

33 Sol vit kesi mini vit, “!Keik kovi ehon tai enges! Kosakras kovaha kovavae vatali veni kei mai vi meatin tavaeen tuetin tuai, navong kei vi ehon semau rokol avong kosa.”

34 Ka Deved vit risi mini vit, “Asuv houlu, inau nalosil kat sipsip keil osen tata onak. Ka navong laeon vuo bear tai mai ka venan titi sipsip tai, 35 inau nalikati ka namu vini. Evus, nakulat titi sipsip koanek ran ongen. Ka navong laeon vuo bear tai viles minau, inau nuvut navuli kat hilin ten hiren, ka namu vini mat. 36 Inau namuas laeon ka bear keil umatmat, ka en sakien enek, nu vini meatin ekek ten out Filistia. Kei mul veah en mankoli, ka mul selus kekar en meatin tavaeen keil onen Ahi koa moul. 37 Ka inau, naling desien onak en Iahova koa mutut moulien onak ran laeon ka bear keil, ka namundesini keke houtut moulien onak ran hen meatin eke ten out Filistia.”

Sakini Sol vit risi mini vit, “Tahosis. Kiha kivae hetal mini, ka Iahova heto venuk.”

40 Deved kur eisal onen, va en valeinge poal, votin meralihat elim (5) koa vupu revi mok, ka sien keil uva en ateili onen. Evus, sak mesen kei ral min stirap talauien onen ka mual va ven Kolaeot.

41 Ka Kolaeot, kei mun mual mai ral min meatin tai koa mul vous eikokoe onen. Ka navong mai vesesal ven Deved, 42 lesi keke vi litetai tai enges koa aven malukuh ka veinan tahos. Ka navong lesi, lei maeni enges. 43 Les eisal onen Deved ka viteni mini vit, “?Ai enek ten sa? ?Keik komundemi kovit inau navi huli tai?” Ka viso va ven ahi keil onen keke imai ipurun Deved. 44 Evus, viso va min Deved vit, “!Amai! !Inau nisal vinik ka nisan teiai onom min aman ka tirendan keil iani.”

45 Ka Deved vit risi mini vit, “Keik kumai kovavae vatal minau ral min naef tavaeen ka ai takan keil. Ka inau, numai mavae vatal minuk en isen Iahova, Asuv Houlu ten Out Nesa. Kei varei vi Ahi onen meatin keil tavaeen onen me-Isrel keil koa komul koselus kekar eni. 46 !Ka kosa, Iahova helinguk kil en hek! !Nouasuk kimat ka nita koteh vatum! Hevus, nisan teiai onen meatin keil tavaeen ten out Filistia iha min aman ka tirendan keil iani. En sakien koanek, meatin vasi keil ten out netan ilea suk keke Ahi onen me-Isrel keil kur keihoen ka mul mum en usite onomai. 47 Kosa, meatin vasi keil koa amul ekok ilei kilea keke Ahi mul mutut moulien onen meatin keil onen. Ka romututtei keil en sise ten naef tavaeen keil ka metas keil. Vuo, kei varei hevae hetal min kami ka heling kami mihel en hemai.”

48 Navong Kolaeot mul mual mai ven Deved, Deved muloh kekerat va vesesal veni keke vavae vatal mini. 49 Kei san hen va en ateili onen, kur meralihat tai, ka lingi en stirap talauien onen. Evus, kuvini mal va ven Kolaeot ka meralihat enek va va vio ... pon vatin, ka kanu varei va neim. Ka Kolaeot mot, muas vatin en atan. 50 Evus, Deved muloh va, mulomal vesesal veni, ka kulat naef tavaeen onen Kolaeot ran ateili teni. Evus, sal vini mat ka ra koteh vatin. En sakien enek, Deved koa tounah keil tavaeen onen tovuol, kei muas Kolaeot mat ral min stirap talauien ka meralihat tanges.

Ka navong me-Filistia keil alesi keke avkeih tavaeen one mat, keil alohlohosai uva.
52 Evus, meatin tavaeen keil ten out Isrel ka Sudah amakul kat keil ka alikat keil va vio ... houlu en me-Filistia keil umatmat en vali sise koa ka en out Saeram. Teiai keil one mul retai en out vasi, en hakot ten out Kat va soutin rokol meteau ten taon ten out Ekron.

En avong enek, Sol kur Deved mai vi meatin tavaeen tai onen.

Copyright information for `PMA