1 Samuel 8

Me-Isrel Keil Avis Iahova Keke Vasan Asuv Houlu Tai min Keil

1 Samuel 8:1-22

Navong Samuel mai vi ulmatu, kei ling natnali keilu keke luvalei revi usite onen meatin keil ka luvasak revi titi vaeen keil onen me-Isrel keil. Moeite onen, isen Soel, ka koa katau, isen Abitsa. Keilu lumum en taon ten out Bersiba. Ka keilu luviles eisilealu ran sakien tetahos onen tata onealu. Keilu luvi uti mane enges, ka lumaen meatin keil avahul keilu vakataun usite one en avong koa lusak revi usite onen meatin keil.

Sakini, hetetamen keil onen me-Isrel keil alah ruai en en taon ten out Ramah avaha avales Samuel. Keil aviteni mini avit, “Samuel, keik komai kovi ulmatu ke. Ka natmali keilu, lurmusil revitei sakien tetahos keil onom. Ven koanek, komai memundemi keke hetahos kitie lat asuv houlu tai keke helosil kat komai hesuval kantri sav keil.”

Ka navong umai ka avisi keke vatie lat asuv houlu tai valosil kat keil, Samuel lesi romaltei, sakini va vis min Iahova veni. Iahova viteni mini vit, “Samuel, kum usil asa koa meatin keil amul avisuk eni. Veni keil arseseinuktei, amul aseseinau enges keke nirvitei mun asuv houlu one. Kosa, meatin keil enek amul amumoni minau suval koa amumoni minau en avong mulamu. Navong nalah lat keil ran out Isip rokol kosa, amul aviles eisile ranau ka uva netan min ahi sav keil. Sakini, kiha, kusil rendemien keil one. Ka kisel kat keil hekeih imok ka kihit kilea min keil sakien takeih keil onen asuv houlu koa hemai helosil kat keil.”

10 Evus, Samuel va ka vit vasin tounah koa Iahova viteni mini min meatin keil koa avisi valing asuv houlu tai vahi one. 11 Kei vit kilea min keil vit, “Koanek hehi sakien keil onen asuv houlu koa hemai helosil kat kami. Kei hemai hekur ehon keil iha ivae en usite onen: tei en keil iloh en hos osen keil, tei en keil iloh en kat tavaeen keil onen koa hos mul lehi, ka tei mun en keil ihi meatin taleikokoeien keil onen koa heloh helamu en kat keil onen. 12 Asuv houlu enek hesakin tei en keil imai ihi avat keil avalosil kat vangi meatin keil tavaeen koa meatin keil hanumau elu ka halualim emun (50) amul ien. Ka tei mun en keil, ihi avat keil avalosil kat vangi meatin keil tavaeen koa meatin keil taosen tai (1000) amul ien.

“Kei hekur tei mun en ehon keil onami keke um mini en mari ah esen keil. Keil ikah atan esen, ka evus, isuhut en anien teni hehi an. Keil umon kat talohien onen ral min tounah vasi keil tavaeen onen emun.
13 Kei hekur atouli keil onami emun keke iha um mini. Keil umon senta keil onen, anien an, ka itan veret an.

14 “Kei hekur more atan onami hetal min nei grep keil osami ka nei olip keil emun. Hevus, hesani suk min hetetamen keil onen koa amum en teim sen. 15 Kei helah taet ten anien ka grep keil osami keke hetiti min hetetamen keil onen ka min meatin keil toumien onen emun. 16 Kei hekur slev keil onami hetal min mormore buluk ka dongki osami keil keke imai ihi onen. 17 Kei helah lat tei en sipsip ka nani osami keil hesuval takis vasakini imai ihi osen.
8:17 Takis koanek suval taet koa amumoni vaha min asuv houlu tai.
Ka houmon kami mun mihemai mihoum mini suval mihehi slev keil onen enges.
18 Ka navong avong keil enek hemai, kami miheis kai minau keke mivamea ran sakien takeih koa asuv houlu enek mul mumoni min kami, asuv houlu koa kami enges mirie lati. Ka Iahova enhervattei vailea en uaien keil onami.”

19 Ka meatin keil amundem maen selkatien onen Samuel. Keil aviteni avit, “Avaseini hemukonek, ka komai emaivati mok keke asuv houlu helosil kat komai. 20 Hesakini, komai mehemai mehesuval kantri sav keil koa asuv houlu mul keke helosil kat komai ka helamun komai meheha en vaeen keil.”

21 Navong Samuel long asa koa meatin keil aviteni, va ka vit meseni min Iahova. 22 Ka Iahova viteni mini vit, “Kiha kum hesuval koa keil evati. Kiling asuv houlu tai one.”

Sakini, Samuel va ka vit meseni min me-Isrel keil. Evus, sila keil uva ris teim se.

Copyright information for `PMA